Usolwelo 12 - MUKANDA USANDU WA ZAMBI 1975

¹ Chilayi chinene chamonekene mwilu: pwo kanazala tangwa, ni kakweji kushi lia yiliato yenyi, ni ha mutwe wenyi chipangula cha kumi lia matongonoshi ni matongonoshi aali.

² Iye kali ni ufumba; kanatete nikufumbajala, ni kupinda aseme.

³ Chilayi chikwo chamonekene mwilu: kumanyi, ndragau muchila munene, kali ni mitwe shimbiali, ni kumi lia mbinga, ni ha mitwe yenyi yipangula shimbiali.

⁴ Ni muchila wenyi wakokele chihanda chimuwika cha ku yihanda yitatu ya matongonoshi a mwilu, iye waanyashine hashi: ni ndragau yamana kumeso ja pwo yoze himasema, hanga muze hasema, akawumbule mwanenyi.

⁵ Iye wasemene mwana-lunga, yoze mayula mavungu eswe ni mbwechi ya utale; apindumwine mwanenyi kuli Zambi, ni ku ngunja yenyi.

⁶ Ni pwo wachinyinyine ku puya, kuze kuma akwete kwa kululika kuli Zambi, hanga akamuhokeleko kanunu ka matangwa ni kulakaji aali a matangwa, ni makumi asambano a matangwa.

⁷ Mba mwapile jita mwilu, Mikele ni angelo jenyi ashile jita ni ndragau; ni ndragau ni angelo jenyi ashile jita;

⁸ aiioze kakumbileko, chipwe chihela cho kachiwanyine nawa mwilu.

⁹ Ni ndragau munene amunyashine hashi, mwe kapela wa shakulu, jina lienyi ngwo, Ndiapu kanda Satana, mwe mukwa kupiangula yifuchi yeswe ya hashi; amunyashine ndo hashi, ni anyashine angelo jenyi hamwe nenyi hashi.

¹⁰ Mba nevwile liji linene mwilu ngwo, Haliapwila ulamwino, ni tachi, ni wanangana wa Zambi yetu hiuneza, ni yiyulo ya Kristu yenyi: mumu hananyase hashi mukwa kusuma mandumbu jetu, yoze wakwasuma kumeso ja Zambi yetu mwalwa ni ufuku.

¹¹ O amukumbile, mumu ha manyinga ja Mwana-panga, ni mumu ha liji lia Shindakenyo yo; kalemesene mwono wo, ewa chipwe ndo ku kufwa.

¹² Kashika ivwenu chiseke, yenu malilu, ni yenu nwakutwamamo. Lamba kuli akwa hashi ni ku kalunga-lwiji: mumu Ndiapu hanahulumuka kuli yenu, kali ni ufwatulo unene, kananyingika mwaka ukepe wika akwete.

¹³ Muze ndragau amwene hanamunyase hashi, wahungumionene pwo yoze wasemene mwana-lunga.

¹⁴ Alioze ahanyine kuli pwo mapulwa aali a pupa munene, hanga akahumuke ku puya kuma kwenyi kuze akumuhokela mwaka, ni miaka, ni chihanda cha hakachi cha mwaka, kanamusweke kuli kapela.

¹⁵ Ni kapela watuhwishile mu kanwa lienyi kunyima lia pwo meya ngwe lwiji, hanga akamuhungumune ku mihwiji.

¹⁶ Ni hashi hakwashile pwo, ni hashi hapakwile kanwa liaho ni hashi haminyine mihwiji yize ndragau Watuhwishile mu kanwa lienyi.

¹⁷ Ni ndragau watenukine ni pwo, wayile mukwasa jita ni masalila ja munyachi wenyi, waze akufunga shimbi ja Zambi, kanda waze ali ni Shindakenyo ya Yesu.