Usolwelo 11 - MUKANDA USANDU WA ZAMBI 1975

¹ Anguhele lumbungu ngwe mulumbu ngwo, Katuka, weseke tembele ya Zambi, ni chilumbilo, ni waze akuwayilamo.

² Alioze yize, yize yili haze lia tembele, hichika, kanda uyeseka; mumu hanayihana kuli akwa mavungu: ni limbo lisandu kumakaliliata kushi lia yiliato makumi awana a tukweji ni tukweji aali.

³ Mba mungukahana tachi kuli yela jami aali, o makaprofeteza kanunu ka matangwa, kulakaji aali a matangwa, ni makumi asambano a matangwa, kanazala yikeleyi.

⁴ Wano kanapu mitondo yiali ya olevwe kanda yikwachilo yiali ya ndeya, yize yakumana kumeso ja Mwenya hashi.

⁵ Nyi kachi umwe mazanga kwalemeka, kachi kahia mukatuhuka mu makanwa jo, mukulesa akwa kole jo; kachi umwe mazanga kwapinjisa, kachi chocho chatamba kumushiha.

⁶ Wano chiyulo akwete cha kuyika lilu, hanga vula kechi kanoka ha matangwa ja uprofeto wo: o chiyulo akwete ha meya cha kwaalumuna manyinga, ni cha kulamba hashi ni lamba lieswe lieka ni lieka, cheswe mazanga.

⁷ Muze hamanununa Shindakenyo yo, ngongo yoze matuhuka mu jondo makasa jita no, makaakumba, makaashiha.

⁸ Ni mijimba yo yinapombo mu tapalo lia limbo linene, lize anavuluka ha uspiritu ngwo, Sondome, ni ngwo, Engitu, kuze nawa ahachilile Mwene wo ha kulusu.

⁹ Mba amwe a kuli atu, ni ku minyachi, ni ku malimi, ni ku mavungu, yatala mijimba yo matangwa atatu, ni chihanda cha hakachi, keshi kutayiza kusa mijimba yo mu fuka.

¹⁰ Akwa hashi yawahilila hali ayo, yasehejela; makatumisa yawana umwe kuli mukwo ni mukwo: mumu wano aprofeta aali amwesene lamba akwa hashi.

¹¹ Kulutwe lia matangwa atatu ni chihanda cha hakachi, mwiku wa mwono wa kuli Zambi wanjilile muli ayo, o amanyine ha molu jo; ni woma unene wejile hali waze apwile nikwatala.

¹² Mba nevwile liji linene lia kukatuka mwilu, lia kwamba kuli ayo ngwo, Zezukenu, nwize kuno, o azezukile mu lelwa; ni akwa kole jo aatalile.

¹³ Ha ola yize yene kwapwile minyiko yinene, ni chihanda chimuwika cha ku kumi lia yihanda ya limbo chapuzukile; ashihile mu minyiko tununu shimbiali a atu: ni masalila azalile tò ni woma, mba achichimiekene Zambi ya mwilu.

¹⁴ Lamba liamuchiali hilinapalika; lamba liamuchitatu muliza nikawashi.

¹⁵ Mungelo wamuchishimbiali wembile chitavwi chenyi; kwapwile maliji anene mwilu, ngwo, Wanangana wa hano hashi hiwapwa wa Mwene wetu, ni wa Kristu yenyi: iye kumakayula ndo ku miaka yeswe ya mutolo.

¹⁶ Ni makumi aali a makulwana ni makulwana awana, waze atwama ha ngunja jo kumeso ja Zambi, afulamanyine, nikuwayila Zambi.

¹⁷ Ngwo, Tunakusakwila, Mwene Zambi ya Ndundo-Jeswe, yena hwoli, wapwile; mumu hiunande tachi je jinene, hiunayulu.

¹⁸ Ni mavungu atenukine, ni utenu we hiuneza, ni mwaka wa kupatwila afu, ni wa kwononona ndungo je, aprofeta ni asandu, ni waze akwivwa woma wa jina lie, ni akepe ni anene, mukwonwona waze akwonwona hashi.

¹⁹ Azulwile tembele ya Zambi mwilu; ni mushete wa usendo wenyi wamonekene mu tembele yenyi; mba kwapwile mihenyo, ni maliji, ni kukulunguza, ni minyiko ni chiwe chinene.