Usolwelo 10 - MUKANDA USANDU WA ZAMBI 1975

¹ Namwene mungelo mukwo wa ngolo kanahulumuka mwilu, unazala lelwa; ni kongolo wapwile ha mutwe wenyi, ni meso jenyi ngwe tangwa, ni molu jenyi ngwe manguji a kahia.

² Iye wapwile ni kamukanda ka kupakula ha kwoko lienyi: iye wasele chiliato chenyi cha chindume ha kalunga-lwiji, ni chiliato chenyi cha chimeso hashi.

³ Iye wakololokele ni liji linene, ngwe ndumba mahanjika lundunjila: ni muze akololokele, kukulunguza shimbiali chahanjikile maliji jacho.

⁴ Muze kukulunguza shimbiali chahanjikile, nambile kusoneka, nevwile liji lia kukatuka mwilu, ngwo, Jika ni Chijikilo yuma yize kukulunguza shimbiali hahanjika, kanda uyisoneka.

⁵ Mungelo yoze namumwene nikumana ha kalunga-lwiji ni hashi, wazundwile kwoko lienyi lia chindume kwilu.

⁶ Walishingile ni yoze mukwa mwono ndo ku miaka yeswe ya mutolo, yoze watangile lilu, ni yuma yize yilimo, ni hashi, ni yuma yize yiliho, ni kalunga-lwiji, ni yuma yize yilimo, ngwenyi, Kukuchi kapwa kushimbula nawa.

⁷ Alioze ha matangwa ja liji lia mungelo wamuchishimbiali, muze memba chitavwi, hohene chijimbikilo cha Zambi muchimanunuka, nikulita ni sango lipema lize hanambujola kuli ndungo jenyi aprofeta.

⁸ Liji lize nevwile lia kukatuka mwilu, nalivwile kuhanjika ni yami cheka nawa, ngwo, Yako, wande kamukanda kaze kanapakuka ha kwoko lia mungelo yoze unamana ha kalunga-lwiji ni hashi.

⁹ Mba nayile kuli mungelo ngwami, Pe kamukanda. Iye yamba kuli yami ngwenyi, Tambula, ulie; mukapwisa jimo lie lisasu, aiioze mu kanwa lie mukayekemena ngwe wuchi.

¹⁰ Natambwile kamukanda ku kwoko lia mungelo, nakalile; mba kapwile mu kanwa liami kakuyekemena ngwe wuchi; aiioze muze hinakalia, jimo liami liapwile lisasu.

¹¹ O yamba kuli yami ngwo, Chakutamba kuprofeteza cheka nawa ha kutwala kuli atu anji ni mavungu ni malimi ni mianangana.