Ubutukilo 9 - MUKANDA USANDU WA ZAMBI 1975

¹ Zambi yawahisa Noe ni anenyi, yamba kuli ayo, ngwenyi, Semenu, nuliokese, nukazalise hashi.

² Woma wa yenu ni mwongo wa yenu muukakwata tushitu eswe a hashi, ni tujila eswe a mu tetela, ni akwa kukalala eswe, ni yishi eswe a mu kalunga-lwiji. Eswe mu kwoko lie naakunjika.

³ Tushitu eswe akwenda ni mwono kumapwa kulia che, ngwe nakuhele mafwo a wisu chocho ngunakwehe yeswe.

⁴ Alioze kuchi kulia yifwo yize yikwete manyinga jayo, acho chinalumbunuka we mwono.

⁵ Chikwo nawa manyinga jenu a mwono wenu mungwakala, ni kuli kashitu mweswe ni ku kwoko lia mutu, pundu we mwono wa mutu mungukala hali mutu ni mukwo mweswe.

⁶ Mweswe mamwanga manyinga ja mutu neye mamumwanga manyinga jenyi kuli mutu. Mumu Zambi walingile mutu mu kulifwa chenyi.

⁷ Alioze yenu, semenu, nukaliokese, nukapwe anji hashi nikulumbama.

⁸ Zambi yahanjika ni Noe hamwe ni anenyi ngwenyi,

⁹ Ni yami, usendo wami ngunakolesa ni yena ni munyachi we kulutwe.

¹⁰ Ngunaukolesa ni akwa mwono eswe aze ali hamwe ni yena, ni tujila, ni yimuna, ni tushitu eswe a hashi hamwe ni yena, waze eswe matuhuka mu ulungu chipwe ni tushitu eswe a hashi.

¹¹ Kumungukolesa usendo wami ni yena, mba chichi kujimuna nawa musunya weswe ni sanga lia meya; ndo ku miaka ya mutolo kukuchi kupwa sanga lia kunongesa hashi.

¹² Mba Zambi yamba ngwenyi, Chino muchipwa chinyingi cha usendo uze mungukolesa hakachi ka yami ni yena ni akwa mwono aze eswe ali hamwe ni yena, ndo ku yisemuko yeswe.

¹³ Hinasa kongolo yami mu lelwa, kumakapwa chinyingi cha usendo hakachi ka yami ni akwa hashi.

¹⁴ Kumuchikapwa muze munguneha lelwa lia kuzulamina hashi mba kongolo makamoneka mu lelwa.

¹⁵ Chocho mungwiwuluka usendo wami uze uli hakachi ka yami ni yena ni akwa mwono eswe a musunya weswe, mba meya kechi kapwa nawa sanga akanongese musunya weswe.

¹⁶ Kongolo kumakapwa mu lelwa, ni yami mungutalako hanga ngukewuluke usendo wa mutolo hakachi ka Zambi ni akwa mwono eswe a musunya weswe atwama hashi.

¹⁷ Zambi yamba kuli Noe ngwenyi, Che chinyingi chenacho cha usendo nakolesa hakachi ka yami ni musunya weswe watwama hashi.

¹⁸ Ana a Noe aze atuhukile mu ulungu majina jo wano, Sheme ni Hame ni Yafwe. Hame iye tato ya Kanana.

¹⁹ Wano atatu e ana a Noe mba kuli ayo atu azalishile hashi heswe.

²⁰ Noe waputukile kupwa njimi. Yalima munda wa uva.

²¹ Yanwa ye vinyu, yazengewa. Chocho yalifukula mu mbalaka yenyi.

²² Mba Hame tato ya Kanana yamona uselesele wa tato. Yaya akambulwile yayo ni mwanakwo haze.

²³ Mba Sheme ni Yafwe yanda hina alise ha yipaya yo, yenda unyimenyime akafuke uselesele wa tato. Meso jo anatale kunyima kamwene uselesele wa tato.

²⁴ Noe yalaula ku vinyu yenyi, yanyingika chize mwanenyi wa kanuke yamulinga.

²⁵ Yamba ngwenyi, Kanana akashingiwe; akapwe ndungo ya ndungo kuli ayayo.

²⁶ Yamba nawa ngwenyi, Yehova Zambi ya Sheme akafumane; Kanana akapwe ndungo yenyi.

²⁷ Zambi akatohese Yafwe, akatwame mu mbalaka ja Sheme, Kanana akapwe ndungo yenyi.

²⁸ Noe yatwama ni mwono kulutwe lia sanga lia meya makulakaji atatu a miaka ni makumi atano a miaka.

²⁹ Matangwa eswe a Noe apwile makulakaji livwa a miaka ni makumi atano a miaka, mba yafwa.