Ubutukilo 8 - MUKANDA USANDU WA ZAMBI 1975

¹ Alioze Zambi yewuluka Noe ni akwa mwono eswe ni yimuna eswe apwile hamwe nenyi mu ulungu. Zambi yapalikisa fuji hashi chocho meya ahuwile.

² Mafuji a jondo nawa yaajika hamwe ni manjanela a mwilu, mba vula wa mwilu yapatuka.

³ Meya akatukile hashi tangwa ha tangwa, mba ha kulakaji ni makumi atano a matangwa meya yahuwa.

⁴ Ha tangwa kumi ni shimbiali lia kakweji wamuchishimbiali ulungu yiutula ha milundu ya Ararate.

⁵ Meya yaya nikuhuwa tangwa ha tangwa ndo kakweji wamuchikumi. Mba ha tangwa litangu lia kakweji wamuchikumi masongo a milundu yamoneka.

⁶ Kulutwe lia makumi awana a matangwa Noe yazulula njanela yize alingile mu ulungu.

⁷ Yatuma chikwakwalo, yaya nikwendangana ndo meya homa hashi.

⁸ Kulutwe yatuma katele akanyingike nyi meya hahuwa hashi.

⁹ Alioze katele kawanyine haze mapwila ni chiliato chenyi mba yahilukila kuli iye ku ulungu mumu meya te hwali hashi heswe. Mba yazoza kwoko lienyi, yamukwata, yamunjisa kuli iye mu ulungu.

¹⁰ Yashimbula matangwa akwo nawa shimbiali mba cheka nawa yatuhwisa katele mu ulungu.

¹¹ Ha chingoloshi katele yahilukila kuli iye. Kumanyi mu muvumbo wenyi lifwo lia olevwe lia wisu lia kupatula. Chocho Noe yanyingika ngwenyi, Meya hahuwa hashi.

¹² Yashimbula nawa matangwa akwo shimbiali, mba yatuma nawa katele alioze kahilukilile nawa kuli iye.

¹³ Kwapwile ha mwaka makulakaji asambano ni kashi, ha kakweji mutangu, ha tangwa litangu lia kakweji meya hanomu hashi mba Noe yafukula ulungu, yatala, kumanyi ha mavu hanomu chau.

¹⁴ Mba ha kakweji wamuchiali, ha tangwa makumi aali ni shimbiali a kakweji hashi homa.

¹⁵ Zambi yamba kuli Noe ngwenyi,

¹⁶ Tuhuka mu ulungu, ni yena, ni mukwenu-pwo, ni ané a malunga ni mapwo ja ané hamwe ni yena.

¹⁷ Tuhuka ni a mwono eswe aze uli no a musunya weswe, ni tujila, ni yimuna, ni akwa kukalala aze akukalala hashi, akaseme chinji hashi, akaliokese, akalumbame hashi.

¹⁸ Chocho Noe yatuhuka ni anenyi a malunga, ni mukwo-pwo, ni mapwo ja anenyi hamwe nenyi.

¹⁹ Ni tushitu eswe, ni akwa kukalala eswe, ni tujila eswe, aze eswe akwenda hashi, nikulita ni mavungu jo yatuhuka mu ulungu.

²⁰ Mba Noe yatunga chilumbilo kuli Yehova. Yanda a kuli tushitu eswe akulinanga, ni a kuli tujila eswe akulinanga, yalambula milambu ya kulumba ha chilumbilo.

²¹ Yehova yevwa lupembo mupema; Yehova yamba mu mbunge yenyi ngwenyi, Chichi kashinga nawa mavu mumu hali atu, mumu kunyonga cha mbunge jo chapiha chize ku wanuke wo. Chichi kulamba nawa akwa mwono eswe ngwe hinalinga.

²² Shimbu hashi muhasala mwaka wa kukuwa ni mwaka wa kucha, ni chishika ni chivukuminya ni lwiza ni lushiho, ni mwalwa ni ufuku kuyichi kahwa.