Ubutukilo 50 - MUKANDA USANDU WA ZAMBI 1975

¹ Mba José walimbilile ha meso ja tato, yalililaho, yamwaha mbeju.

² Yatu ma ngamba jenyi ndotolo akase yitumbo hali tato kuchina mapola, mba ndotolo chocho yalinga kuli Izalele.

³ Amumanwine makumi awana a matangwa hali iye, mumu chocho chakupwa matangwa a kusa yitumbo yize. A-Engitu amulilile makumi shimbiali a matangwa.

⁴ Muze matangwa a kumulila hahwa, José yamba kuli akwa zuwo lia Falau ngwenyi. Nyi nwanguvwila vumbi kumeso jenu, hanjikenu mu matwi ja Falau ngwenu, José yamba ngwenyi,

⁵ Tata wangushingishile ngwenyi, Mungufwa, alioze ukangufunde mu fuka lize nafulile mu chifuchi cha Kanana. Kashika ngutayize kama, nguye ngukafunde tata, mba mungwiza nawa.

⁶ Falau yamba ngwenyi, Yénu nufunde tatenu, se anushingishile.

⁷ José yaya mukufunda tato. Kwayile hamwe nenyi ngamba eswe a Falau, ni makulwana a mu zuwo lienyi, ni makulwana eswe a chifuchi cha Engitu.

⁸ Ni akwa zuwo lia José, ni ayayo, ni akwa zuwo lia tato. Ahichikile ana jo wika mu chifuchi cha Ngoshone, hamwe ni yimuna jo.

⁹ Wayile ni matemba ni akwa tuvwalu, mbunga yinene.

¹⁰ Chocho yaheta ku chizungwilo cha Atate sali lize lia Yordau. Kwenako alilile mbimbi nikulishimwoka kuhiana. Walilile tato matangwa shimbiali.

¹¹ Muze enyembo, e A-Kanana, hamona kulila chize ku chizungwilo cha Atate yamba ngwo, Chino chapwa kulila chikalu cha chinyengo kuli A-Engitu. Kashika yalukako ngwo, Abele-mizerame, sali lize lia Yordau.

¹² Ana jenyi a malunga yamulinga chizechene yaatuma iye.

¹³ Ana jenyi a malunga amumbachile nikumutwala ku chifuchi cha Kanana. Yamufunda mu chivwenge mu musenge wa Makapela chize Apalahama walanjile hamuwika ni we musenge, chikapwe chifuka cha kuhinga. Wachilanjile kuli Efrone mwe Ka-Hete kulutwe lia Mamare.

¹⁴ Mba muze hafunda tato José yahiluka ku Engitu, ni ayayo, ni waze eswe ayile no mukufunda.

¹⁵ Muze ayayo a José amwene tato hanafu ambile ngwo, Hanji José matuvwila kole nikutufwetesa chipi cheswe twamulingile.

¹⁶ Kashika yatuma liji kuli José ngwo, Tatenu wahanyine shimbi shimbu kandafwa ngwenyi,

¹⁷ Ambenu kuli José ngwenu, Ukonekene kama mutonga wa ayayenu ni shili yo ha kukulinga chipi. Kashika tunaliumbu, utukonekene mulonga wetu, yetu ngamba ja Zambi ya tatenu. José yalila muze ahanjikile chocho.

¹⁸ O yaya nawa yafulamana kumeso jenyi ngwo, Talenu, tuli ngamba jenu.

¹⁹ José yamba ngwenyi, Kanda nwivwa woma. Te yami nguli mu chitwamo cha Zambi?

²⁰ Nyi yenu, e, nwangunyongenene chipi, alioze Zambi wangupalilecho chipema, hanga akachilinge akafunge atu anji ni mwono; chocho chapwa musono.

²¹ Kashika kanda nwivwa woma. Mungunuhoka hamuwika ni ana jenu. Chocho yaalembejeka nikuhanjika ku mbunge jo.

²² José yatwama mu Engitu hamuwika ni akwa zuwo lia tato eswe. José Watwamine ni mwono kulakaji ni kumi lia miaka.

²³ José yamona ana ja Eframe ndo ku chisemuko chamuchitatu. Ni e ana ja Makire mwana wa Manase asemukine mu kondo ya José.

²⁴ Mba José yamba kuli ayayo ngwenyi, Mungufwa alioze Zambi pundu makeza kuli yenu, manuchiza ku chifuchi chino akanutwale ku chifuchi chize achilakenyene ni shingo kuli Apalahama, ni kuli Izake, ni kuli Yakomba.

²⁵ José yashingisa ana ja Izalele ngwenyi, Pundu Zambi makanunangisa mba munukambata yifwaha yami nukayichize ku kuno.

²⁶ Chocho José wafwile ni kulakaji lia miaka ni kumi lia miaka. Yamusa yitumbo kuchina mapola, yamusa mu kashau mu Engitu.