Ubutukilo 5 - MUKANDA USANDU WA ZAMBI 1975

¹ Uno we mukanda wa yisemuko ya Alama. Ha tangwa lize Zambi watangile mutu, yamulinga mu kulifwa chenyi.

² Yaatanga lunga ni pwo. Yaawahisa nikwaluka jina ngwenyi, Alama, ha tangwa lize yaatanga.

³ Alama yatwama kulakaji lia miaka ni makumi atatu a miaka mba yasema mwana wa lunga wa kulifwa nenyi, mwe mu chano chenyi. Yamuluka jina ngwenyi, Sete.

⁴ Matangwa ja Alama kulutwe lia kusema Sete apwile makulakaji nake a miaka, nikusema ana a malunga ni ana a mapwo.

⁵ Kashika matangwa eswe a mwono wa Alama makulakaji livwa a miaka ni makumi atatu a miaka, mba yafwa.

⁶ Sete yatwama kulakaji Ha miaka ni miaka yitano, yasema Enoshe.

⁷ Mba kulutwe lia kusema Enoshe Sete yatwama nawa makulakaji nake a miaka ni miaka shimbiali nikusema ana a malunga ni ana a mapwo.

⁸ Kashika matangwa eswe a Sete apwile makulakaji livwa a miaka ni kumi lia miaka ni miaka yiali, mba yafwa.

⁹ Enoshe yatwama makumi livwa a miaka, yasema Kenane.

¹⁰ Mba kulutwe lia kusema Kenane Enoshe yatwama nawa makulakaji nake a miaka ni kumi lia miaka ni miaka yitano nikusema ana a malunga ni ana a mapwo.

¹¹ Kashika matangwa eswe a Enoshe apwile makulakaji livwa a miaka ni miaka yitano, mba yafwa.

¹² Kenane yatwama makumi shimbiali a miaka, yasema Mahalale.

¹³ Mba kulutwe lia kusema Mahalale Kenane yatwama nawa makulakaji nake a miaka ni makumi awana a miaka, nikusema ana a malunga ni ana a mapwo.

¹⁴ Kashika matangwa eswe a Kenane makulakaji livwa a miaka ni kumi lia miaka, mba yafwa.

¹⁵ Mahalale yatwama makumi asambano a miaka ni miaka yitano, yasema Yara.

¹⁶ Mba kulutwe lia kusema Yara Mahalale yatwama nawa makulakaji nake a miaka ni makumi atatu a miaka, nikusema ana a malunga ni ana a mapwo.

¹⁷ Kashika matangwa eswe a Mahalale makulakaji nake a miaka ni makumi livwa a miaka ni miaka yitano, mba yafwa.

¹⁸ Yara yatwama kulakaji lia miaka ni makumi asambano a miaka ni miaka yiali, yasema Enoke.

¹⁹ Mba kulutwe lia kusema Enoke Yara yatwama nawa makulakaji nake a miaka nikusema ana a malunga ni ana a mapwo.

²⁰ Kashika matangwa eswe a Yara makulakaji livwa a miaka ni makumi asambano a miaka ni miaka yiali, mba yafwa.

²¹ Enoke yatwama makumi asambano a miaka ni miaka yitano, yasema Metusela.

²² Mba kulutwe lia kusema Metusela Enoke waliendelele ni Zambi makulakaji atatu a miaka nikusema ana a malunga ni ana a mapwo.

²³ Kashika matangwa eswe a Enoke apwile makulakaji atatu a miaka ni makumi asambano a miaka ni miaka yitano.

²⁴ Enoke waliendelele ni Zambi, hikeshiko, mumu Zambi yamuchizako.

²⁵ Metusela yatwama kulakaji lia miaka ni makumi nake a miaka ni miaka shimbiali, yasema Lameke.

²⁶ Mba kulutwe lia kusema Lameke Metusela yatwama nawa makulakaji shimbiali a miaka ni makumi nake a miaka ni miaka yiali nikusema ana a malunga ni ana a mapwo.

²⁷ Kashika matangwa eswe a Metusela makulakaji livwa a miaka ni makumi asambano a miaka ni miaka livwa, mba yafwa.

²⁸ Lameke yatwama kulakaji lia miaka ni makumi nake a miaka ni miaka yiali, yasema mwana wa lunga.

²⁹ Yamuluka jina ngwenyi, Noe, mumu ngwenyi, Yono kumakatuwahisa ha milimo yetu ni kukilikita cha moko jetu mumu ha mavu aze Zambi washingile.

³⁰ Kulutwe lia kusema Noe Lameke yatwama nawa makulakaji atano a miaka ni makumi livwa a miaka ni miaka yitano nikusema ana a malunga ni ana a mapwo.

³¹ Kashika matangwa eswe a Lameke makulakaji shimbiali a miaka ni makumi shimbiali a miaka ni miaka shimbiali, mba yafwa.

³² Noe wapwile ni makulakaji atano a miaka, Noe yasema Sheme, ni Hame, ni Yafwe.