Ubutukilo 49 - MUKANDA USANDU WA ZAMBI 1975

¹ Mba Yakomba yasanyika anenyi a malunga ngwenyi, Kungulukenu hamuwika ngunwambulwile chize muchinuwana ku matangwa a ku songo.

² Kungulukenu nwivwe, enu ana ja Yakomba Panjikenu kuli tatenu Izalele.

³ Rupene, ena uli mwe kapula-jimo, uli ndundo jami, we uputukilo wa tachi jami. Wahiana ulemu, Wahiana ngolo.

⁴ Wafulukila ngwe meya, kuchi kukumba, mumu wakundamine ku muhela wa tatenu. Wauchishile, wakundamine ku muhela wami.

⁵ Simeone ni Levi, songo ni mutu. Tutana two twapwa yitwa ya tachi.

⁶ Mbunge yami kanda ukanjila mu punga yo; uhenya wami kanda ulifutula no muze makunguluka. Mumu mu utenu wo ashihile atu. Mu pami jo apatwile tujilolo twa ngombe.

⁷ Utenu wo ukashingiwe mumu wasashile chikolo. Ufwatulo wo ukashingiwe mumu wapwile wa uswi. Mungwahandununa muli Yakomba. Mungwamwanga muli Izalele.

⁸ Yunda, akwenu makuchichimieka. Kwoko lie mulikakwata ha kota ja akwa kole je. Ana ja tatenu makalihetamisa kuli yena.

⁹ Yunda iye mwevu wa ndumba. Mwanami, unachikatuka ku yifwo ya kushiha. Iye wautamine, waliumbile ngwe ndumba, ngwe chihwo cha ndumba. Iya mamuhindwisa?

¹⁰ Lukanda kechi kakatuka kuli Yunda; mbwechi ya mukwa kuyula kuyichi kakatuka hakachi ka yiliato yenyi, ndo mwenyayo makeza mba kuli iye atu makazeyela.

¹¹ Yakashila mwana-chimbulu ku muuva, yakashila mwana-chimbulu ku muuva upema. Yakosela mazalo jenyi mu vinyu, yakosela chikuto chenyi mu manyinga a uva.

¹² Meso jenyi machila ni vinyu, mazo jenyi matoma ni yamwa.

¹³ Zapulone makatwama ku ngenge ya kalunga-lwiji. Makapwa zuzu ya mato. Njiza yenyi muyikapwa ku Sendone.

¹⁴ Isaka kapwa ngwe chimbulu wa tachi, kanapatamina hakachi ka malimba a mapanga.

¹⁵ Yamona uhwimino upema. Yamona chifuchi chinawaha. Wahetamishine chipaya chenyi akambate, yalumuka kapinji mu milimo ya undungo.

¹⁶ Ndane makapatwila atu jenyi, ngwe vungu hakachi ka mavungu a Izalele.

¹⁷ Ndane makapwa kapela mu jila. Makapwa ngwe yenge mu jila, makasuma tujilolo twa kavwalu, mba mwenya kavwalu malimbukila kunyima.

¹⁸ Yehova, ngunatwaminyina ulamwino we.

¹⁹ Ngate, chizavu cha atu makamushinda, alioze iye makashinda kashijino ko.

²⁰ Kulia cha Ashe muchikapwa cha kulumbama. Neye makahana kulia cha mianangana.

²¹ Napatali kapwa ngwe kai hamutusula. Kakuhana maliji apema.

²² José iye mutango wa kwima mihuko, mutango wa mihuko ku fuji ha meya. Ana jenyi kakutanjila ndusu sali lia chipanga.

²³ Ngashi amupinjishile chikolo, amwashile, amuhungumionene.

²⁴ Hindu uta wenyi watwama ni tachi. Moko jenyi aatakamishine ku moko ja Mukwa-Ndundo wa Yakomba. (Kwenako mukukatuka mwe kafunga, lie liwe lia Izalele;)

²⁵ Kwe kuli Zambi ya tatenu yoze makakukwasa. Kuli mwe Mukwa-Ndundo-Jeswe yoze makakuwahisa ni yiwape ya mwilu, ni yiwape ya kalunga-lwiji watwama kushi. Ni yiwape ya mele, ni yiwape ya jimo.

²⁶ Kuwahisa cha tatenu hichahiana helu lia yiwape yeswe ya tulamba, Yiwape ndo ku njiza yasula ya milundu ya mutolo. Kumuyikapwa ha mutwe wa José. He ha mbanda-mutwe wa yoze amuhandunwine kuli akwo.

²⁷ Mbenjamine kapwa ngwe kangunga yoze mapozonoka. Ha chimene malia yifwo ya kushiha. Ha chingoloshi matetateta yize hakwata.

²⁸ Wano e mavungu kumi ni aali a Izalele. Chino tato wambile kuli ayo nikwawahisa. Eswe umwe ha umwe haawahisa nikulita ni kuwahisa chenyi.

²⁹ Mba yaaha shimbi ngwenyi, Mangutwala kuli atu jami. Nungufunde hamuwika ni atata mu chivwenge chili mu musenge wa Efrone mwe Ka-Hete.

³⁰ Mu chivwenge chili mu musenge wa Makapela hatalanganyi ni Mamare mu chifuchi cha Kanana. Chize Apalahama walanjile ni we musenge kuli Efrone mwe Ka-Hete chikapwe chifuka cha kuhinga.

³¹ Kwenako afunjile Apalahama ni mukwo-pwo Sara. Kwenako afunjile Izake ni mukwo-pwo Rebeka. Kwenako nafunjile Liya.

³² Mu musenge mu chivwenge chilimo, achilanjile kuli ana ja Hete.

³³ Muze Yakomba hamana kushika anenyi a malunga watandulwile molu jenyi ha muhela, yafwa, yaya kuli atu jenyi.