Ubutukilo 47 - MUKANDA USANDU WA ZAMBI 1975

¹ José yanjila, yalweza Falau ngwenyi, Tata, ni ayaya, ni mapanga, ni ngombe, ni upite wo weswe hanakatuka ku chifuchi cha Kanana, haliapwila hanahete ku chifuchi cha Ngoshone.

² Yasakula malunga atano hakachi ka ayayo, yaasolola kuli Falau.

³ Falau yamba kuli ayo ngwenyi, Milimo yenu yika? O yamba kuli Falau ngwo, Etu ngamba jenu tuli tufunga, ni yetu ni atata.

⁴ O yamba nawa kuli Falau ngwo, Hitweza mukutwama njize mu chifuchi, mumu kelo jakuhi ja yimuna jetu se kapunga mukalu mu chifuchi cha Kanana. Kashika tunasakwila, nututayize yetu ngamba jenu tutwame mu chifuchi cha Ngoshone.

⁵ Mba Falau yahanjika ni José ngwenyi, Tatenu ni ayayenu haneza kuli yena.

⁶ Chifuchi cha Engitu chili kumeso je, kashika tungisa tatenu ni ayayenu mu chihanda chipema cha chifuchi. Atunge mu Ngoshone. Nyi unanyingika amwe akwa kujama hakachi ko Ukaapwise akwa kuyula ha ngombe jami.

⁷ José yaneha tato Yakomba, yamusela kumeso ja Falau. Yakomba yawahisa Falau.

⁸ Falau yahula Yakomba ngwenyi, Matangwa a miaka ya mwono we angahi?

⁹ Yakomba yamba ngwenyi, Matangwa a miaka ya unjize wami kulakaji lia miaka ni makumi atatu a miaka. Miaka ya mwono wami yapwa yikepe, yipi tuhu. Kuyahetele ku miaka ya mwono wa atata mu matangwa a unjize wo.

¹⁰ Chocho Yakomba yawahisa Falau, yakatuka kumeso jenyi.

¹¹ Mba José yatungisa tato ni ayayo. Yaaha chifuchi mu Engitu, mu chihanda chipema cha chifuchi mu Ramese nikulita ni shimbi ya Falau.

¹² José wahokele tato, ni ayayo, ni akwa zuwo lia tato eswe. Yaaha kulia nikulita ni majiko jo.

¹³ Kukwapwile kulia mu chifuchi cheswe, mumu kapunga wapwile mukalu. Chocho chifuchi cha Engitu ni chifuchi cha Kanana yalezumukine mumu ha kapunga.

¹⁴ José waswekele mbongo jeswe ja mu chifuchi cha Engitu ni mu chifuchi cha Kanana ha kulanjisa kulia. José yaneha mbongo jeswe mu zuwo lia Falau.

¹⁵ Muze mbongo jeswe hajihana mu chifuchi cha Engitu ni mu chifuchi cha Kanana, A-Engitu eswe ejile kuli José ngwo, Twehenu kulia, mumu kuchi te mutufwa kumeso jenu? Mbongo jetu hijahwa.

¹⁶ José yamba ngwenyi, Ngwehenu yimuna jenu. Mungunulanjisa kulia ni yimuna nyi mbongo jenu hijahwa.

¹⁷ Chocho anehene yimuna jo kuli José, mba iye waahele kulia cha kusumbakenya ni tuvwalu, ni mapanga, ni ngombe, ni yimbulu. Yaalisa ni kulia cha kusumbakenya ni yimuna jo ha mwaka uze.

¹⁸ Muze mwaka uze hiwahwa, ejile kuli iye mwaka wamuchiali ngwo, Kutuchi kusweka kuli yenu mwata, ngwetu, Mbongo jetu hijahwa. Matanga eswe a yimuna hapwa a mbala a yenu mwata wetu. Nichimwe chuma chasala kumeso ja yenu mwata wetu shina mijimba yetu ni minda yetu.

¹⁹ Kuchi te mutufwa ni yetu ni chifuchi chetu kumeso jenu? Utulande ni kulia ni yetu ni minda yetu, mba yetu ni minda yetu mutupwa a mbala a Falau. Twehenu mbuto tutwame ni mwono, kanda tufwa, kuchina chifuchi muchisala chahululu.

²⁰ Chocho José yalanda chifuchi cheswe chikapwe cha Falau, mumu A-Engitu eswe alanjishile minda yo, mutu niyenyi, mutu niyenyi ha mukunda wa kukala cha kapunga. Chocho mavu eswe alumukine a mbala a Falau.

²¹ Mba e atu waatutulwile ku membo ku songo lia Engitu ndo ku songo likwo ndusu chifuchi cheswe.

²² Chifuchi cha asasendote wika kachilanjile, mumu asasendote te kali ni chihanda cho cha kuli Falau. O alile chihanda chize Falau waahele kashika kalanjishile minda yo.

²³ Henaho José yamba kuli e atu ngwenyi, Talenu hinanulanda musono, ni yenu ni minda yenu nukapwe a mbala a Falau. Wenu mbuto nukayilime mu minda.

²⁴ Mba muchipwa ha mwaka wa kucha chihanda chimuwika munuhana kuli Falau, yihanda yikwo yiwana muyipwa ya yenu, mbuto ya kulima, ni ya kulia yenu ni akwa mazuwo jenu ni ana jenu.

²⁵ O yamba ngwo, Hiwatulamwina mwono wetu, utuvwile kama vumbi mwata, mba mutupwa ngamba ja Falau.

²⁶ José wachikolesele shimbi mu Engitu ndo musono, ha yihanda yeswe yitano Falau akatambule chihanda chimuwika. Chifuchi cha asasendote wika kuchalumukine cha Falau.

²⁷ Mba A-Izalele atwamine mu Engitu mu chifuchi cha Ngoshone. Apichilemo upite wunji, asemene chikolo, okelele kuhiana.

²⁸ Yakomba watwamine mu Engitu kumi lia miaka ni miaka shimbiali, chocho miaka ya mwono wenyi yahetele ku kulakaji lia miaka ni makumi awana a miaka ni miaka shimbiali.

²⁹ Mba miaka hiyaheta ya kufwa cha Izalele. Yasanyika mwanenyi José, yamba kuli iye ngwenyi, Nyi hinawana vumbi kumeso je sako kama kwoko lie kushi lia shina lia kulu liami ulilakenye kulinga kuli yami ni utu ni umwenemwene; ngunalembe, kanda ungufunda mu Engitu.

³⁰ Alioze muze munguya tulo hamwe ni tulamba, akanguchize ku Engitu ukangumbate nikungufunda mu chifuka cho. José yamba ngwenyi, Mungulinga nikulita ni liji lie.

³¹ Yamba ngwenyi, Ulishinge. Mba iye yalishinga. Mba Izalele yalihetamisa ha muhela.