Ubutukilo 45 - MUKANDA USANDU WA ZAMBI 1975

¹ Henaho José kahashile kusúla kumeso ja waze eswe amanyineko; yateta ngwenyi, Katwisenu atu eswe kumeso jami. Kukwapwile mutu niumwe hamwe nenyi shimbu José yalisolola kuli ayayo.

² Yalila ni liji linene, ni A-Engitu evwile, ni akwa zuwo lia Falau evwile.

³ José yamba kuli ayayo ngwenyi, Yami José. Tata achili ni mwono? Alioze ayayo kahashile kumukumbulula mumu alipikalile chikolo kumeso jenyi.

⁴ José yamba kuli ayayo ngwenyi, Kundamenu kama kuli yami. O yakundama. Iye yamba ngwenyi, Yami mwanakwenu José, nwangulanjishile ku Engitu.

⁵ Alioze haliapwila kanda nwivwa kupiha hanji utenu ha kungulanjisa mumu Zambi wangutetekesele kulutwe lia yenu ngukalamwine mwono.

⁶ Mumu miaka yino yiali hikwapwa kapunga ku chifuchi ahoze kwasala miaka yitano kukuchi kupwa chipwe kuchipa chipwe kucha.

⁷ Kashika Zambi wangutetekesele kunufungila kamwe ka munyachi hano hashi, kunulamwina amwono nukapwe mbunga yinene.

⁸ Kashika hi yenu ko nwangutumine kuno, Zambi. Mba iye hangupwisa ngwe chisemi kuli Falau, mwenya zuwo lienyi heswe kanda mukwa kuyula chifuchi cheswe cha Engitu.

⁹ Tambukenu, yénu kuli tata nukambe kuli iye ngwenu, Mwané José kanambe ngwenyi, Zambi hangupwisa mwenya Engitu. Tweya kuli yami, kanda ulaluka.

¹⁰ Munukatwama mu chifuchi cha Ngoshone. Munukapwa hakamwihi ni yami, ni yenu ni ana jenu, ni ajikulu jenu, ni yimuna jenu, ni ngombe jenu ni yikwata yenu yeswe.

¹¹ Kwenako mungukanuhoka, mumu kwasala miaka yitano ya kapunga, kuchina munwiza kuswalajala, ni yena, ni akwa zuwo lie ni yikwata ye yeswe.

¹² Ni yenu, meso jenu anamono, ni meso ja mwanakwetu Mbenjamine, ngwami, Kanwa lia yami mwene linahanjika ni yenu.

¹³ Munwambulwila tata uhenya wami weswe mu Engitu, ni yeswe nwamona. Munutambuka nukanehe tata kuno.

¹⁴ Mbenjamine yalizewilaye, yalila ha kota yenyi, ni Mbenjamine neye yalila ha kota ya José.

¹⁵ Yahanahana mbeju kuli ayayo eswe, yalila hali ayo, mba kulutwe ayayo ahanjikile nenyi.

¹⁶ Lufuma wacho yaheta mu zuwo ha Falau ngwo, Ayayo a José heza. Chapemenene kuli Falau ni atu jenyi eswe.

¹⁷ Falau yamba kuli José ngwenyi, Amba kuli ayayenu ngwe, Lingenu chino. Twikenu yimbulu jenu, nuye ku chifuchi cha Kanana.

¹⁸ Nukasake tatenu ni akwa mazuwo jenu, nukeze kuli yami, mba mungukanwaha ye yipema ya chifuchi cha Engitu. Munukalia ya maji a mu chifuchi.

¹⁹ Hinanwaha shimbi, lingenu chino. Munuya ni matemba a mu chifuchi cha Engitu nukambachilemo anenu, ni mapwo jenu, nukanehe tatenu nukeze.

²⁰ Kanda nusa mbunge ha upite wenu se yipema yeswe ya chifuchi cha Engitu hiyapwa niyenu.

²¹ Ana ja Izalele yalinga chocho. José yaaha matemba nikulita ni shimbi ya Falau, ni ngaso ya kulia mu jila.

²² Yahana kuli eswe mazalo, alioze kuli Mbenjamine yahana makulakaji atatu a mbongo ja prata, ni mazalo atano.

²³ Kuli tato yatuma yuma yino; kumi lia yimbulu ni yiteli yo ya yuma yipema ya Engitu, ni kumi lia yimbulu a yihwo ni yiteli yo ya mbuto, ni mbolo, ni kulia hali tato mu jila.

²⁴ Chocho yashika ayayo, o yakatuka. Yamba kuli ayo ngwenyi, Kanda nuzwela mu jila.

²⁵ Chocho yakatuka ku Engitu yeza ku chifuchi cha Kanana kuli tato Yakomba.

²⁶ Yamwambulwila ngwo, José hindu ni mwono ali. Hapwa mukwa kuyula chifuchi cheswe cha Engitu. Mbunge yenyi yiyilezumuka mumu kaafulielele.

²⁷ Yamwambulwila maliji eswe a José aze aahele, mba muze amwene matemba atumine José kumumbata, mbunge ya tato Yakomba yahuzulukile.

²⁸ Izalele yamba ngwenyi, Kunahu, mwanami José hindu kali ni mwono. Munguya ngukamutale shimbu kanda ngufwa.