Ubutukilo 44 - MUKANDA USANDU WA ZAMBI 1975

¹ José yatuma kaselo ka zuwo lienyi ngwenyi, Zalisa njeke ja malunga wano ni kulia cheswe mahasa kumbata, ukase mbongo ja mutu mweswe kwilu lia njeke yenyi.

² Sako nawa musenge wami wa prata mu njeke ya mwe kasulasongo hamuwika ni mbongo jenyi ja mbuto. Iye yalinga nikulita ni liji lia José.

³ Muze hikwacha chimene yalishika ni malunga, o yakatuka, yaya ni yimbulu jo.

⁴ Muze hatuhuka mu limbo alioze kandaya kusuku, José yamba kuli kaselo kenyi ngwenyi, Katuka, ukaule waze malunga. Muze mwawana amba ngwe, Kuchi te hinwangulinga yipi ha yipema yami?

⁵ Uno ngwami musenge mwata wami akunwinamo. Chipwe kutaha kakutahilamo ngombo. Chino nwalinganga, chipi.

⁶ Iye yaawana, yahanjika no maliji ano.

⁷ O yamukumbulula ngwo, Mwata kuchi te unambe maliji apwa haha? Chikapwe kusuku ni yetu ngamba je kulinga chuma chino.

⁸ Mbongo jize twajiwanyine mu njeke jetu twajinehene kuli yena, chize ku chifuchi cha Kanana. Mba kuchi mutuhasa kwiya prata hanji oru ku zuwo lia mwata we?

⁹ Mweswawo hakachi ketu ngamba je mumuwana nawo, akafwe lume, mba yetu akwo eswe mutupwa tupinji kuli mwe mwata.

¹⁰ Iye ngwenyi, Chikapwe chocho ngwe hinwamba. Mweswawo mutumuwana nawo mapwa kapinji kami; akwo eswe masamba.

¹¹ O yalipupwisa, yachiza mutu ni mutu njeke yenyi, yajisa hashi, yajitula mutu ni mutu njeke yenyi.

¹² Iye yapolongoza, putu kuli mukulwana ndo kuli kanuke. Yawana musenge mu njeke ya Mbenjamine.

¹³ O yapula mazalo jo, mutu ni mutu yatwika yimbulu jo, yahiluka ku limbo.

¹⁴ Yunda ni akwo yeza ku zuwo lia José, yamuwana te kwali. O yafulamana hashi kumeso jenyi.

¹⁵ José yamba kuli ayo ngwenyi, Chuma chino nwalinga kuchi chinalumbunuka? Te kunwanyingikine mutu chize napwa yami mahasa kutaha, nyi?

¹⁶ Yunda yamba ngwenyi, Kuchi mutwamba kuli yenu mwata? Tuhanjike kuchi? Kuchi mutuhasa kulisambisa? Zambi hatuwa uhenge wa yetu ngamba jenu. Tuli tupinji twa yenu mwata. Ni yetu ni yoze wamuwana ni we musenge.

¹⁷ Iye yamba ngwenyi, Chikapwe kusuku ni yami kulinga chocho. Mwe mutu twamuwana ni musenge iye mapwa kapinji kami. Alioze yenu akwo, yénu ni sambukila kuli tatenu.

¹⁸ Aho Yunda yakundama kuli iye, yamba ngwenyi, Mwata wami, ngutayize kama kuhanjika liji limuwika mu matwi ja yenu mwata, yami nguli ngamba yenu. Utenu wenu kanda usasaminya hali yami ngamba yenu, mumu yenu chimuwika wapwa ni Falau.

¹⁹ Enu mwata watuhulile yetu ngamba jenu ngwenu, Tatenu nuri nenyi? Mwanakwenu nuli nenyi nyi?

²⁰ Etu yitukumbulula kuli yenu mwata ngwetu, Tata tuli nenyi, kashinakaji, ni mwe kasulasongo wa ukulwana wenyi, iye kanuke. Yayo hafwa, iye wika wasala wa naye, kashika tato kamuzanga chinji.

²¹ Enu nwambile ngwenu, Numunehe kuli yami hanga ngumutale kama.

²² Etu twambile kuli yenu mwata ngwetu, Mukweze kahashile kuhichika tato mumu nyi mamuhichika tato kumafwa.

²³ Alioze yenu nwambile ngwenu, Nyi mwanakwenu kasulasongo kunwejile nenyi kunuchi kangumona meso jami.

²⁴ Muze twayile kuli ngamba yenu tata, yitumwambulwila maliji a yenu mwata.

²⁵ Tata ngwenyi, Yénu nawa, nukatulanjile kakulia.

²⁶ Twambile ngwetu,. Kutwahashile kuya. Nyi mwanakwetu maya mba ni yetu mutuya. Mumu kutuchi kuhasa kumona meso ja mwe lunga ndo ni mwanakwetu mutuya nenyi.

²⁷ Mba ngamba yenu tata wambile kuli yetu ngwenyi, Nunanyingika pwo liami wangusemenene ana-malunga aali.

²⁸ Umwe yangukatuka mba nambile ngwami, Hanamupapulula. Chamumwene nawa.

²⁹ Nyi mununguta-mbula yono nawa mba chimwe chuma chipi muchimuwana, kambu jami jitoma munujikoka ni chinyengo ku Shiole.

³⁰ Kashika muze munguya kuli ngamba yenu tata ni mwana wakuhi hamwe ni yetu, se mwono wenyi unalinungu ni mwono wa mwana;

³¹ muze mamona mwana wakuhi, kumafwa. Mba yetu ngamba jenu kumututwala kambu ja ngamba yenu tata ku Shiole ni chinyengo.

³² Mumu yami ngamba yenu nalisele chifungo hali mwana kuli tata, ngwami, Nyi chamunehene kuli yena mba mulonga mungutwama nawo wa mutolo kuli tata.

³³ Kashika, ngutayize kama, yami ngamba yenu, ngusalakane mwe mukweze mu undungo kuli mwata. Mwe mukweze akaye ni akwo.

³⁴ Mumu kuchi munguhasa kuya kuli tata nyi mukweze chayile nenyi? Kuchina mungumona che chipi muchiwana tata.