Ubutukilo 43 - MUKANDA USANDU WA ZAMBI 1975

¹ Alioze kapunga wapwile mukalu mu chifuchi.

² Kashika muze te halia mbuto yize yeswe asakile ku Engitu, tato yamba kuli ayo ngwenyi, Yénu cheka nawa, nukatulanjile kakulia.

³ Yunda yamba kuli iye ngwenyi, Mwe lunga watushikile pundupundu ngwenyi, Meso jami kunuchi kwamona ndo mwanakwenu munwiza nenyi.

⁴ Nyi mutuma mwanakwetu hamwe ni yetu mutuya mutunulanjila kulia.

⁵ Alioze nyi kwatayile kumutuma kutuchi kuyako. Mumu mwe lunga wambile ngwenyi, Meso jami kunuchi kwamona ndo mwanakwenu munwiza nenyi.

⁶ Izalele yamba ngwenyi, Chuma chikalu nwangulingile. Kuchi te nwamulwezele ngwenu, Umwe mwanakwetu tuli nenyi?

⁷ O ngwo, Mwe lunga yatuhulahula ha kutwala kuli yetu ni usoko wetu ngwenyi, Tatenu ni mwono ali? Mwanakwenu mukwo nuli nenyi? Chocho twamulwezele nikulita ni maliji ano. Te mutuhasa kunyingika ngwetu, Matutuma kusaka mwanakwetu?

⁸ Yunda yamba kuli tato Izalele ngwenyi, Tuma mwe mukweze ni yami, mba mutuka tuka, mutuya, hanga tukamone mwono, kanda tufwa ni yetu ni yena ni ana jetu.

⁹ Yami mungupwa chifungo hali iye, ku kwoko liami muwiza kumuhula. Nyi chamunehene nawa kuli yena ngukakukunjikileye mba mulonga upwe niwami wa mutolo.

¹⁰ Mumu nyi kutwalalukile kachi hitweza chisuho chamuchiali.

¹¹ Mba tato Izalele yamba kuli ayo ngwenyi, Nyi chocho chapwa lingenu chino; mbatenu mihuko yimwe yipema ya chifuchi mu yikwachilo yenu nuyitwale kuli mwe lunga mulambu, yimwe yitumbo ya ulilila, ni kamwe kawuchi, ni especiaria, ni mira, ni katapi, ni amendoa.

¹² Numbate nawa ndando jiali hamuwika ni mbongo jize ajihilwishile mu njeke jenu, nejo nujimbate, hanji kanakajivulama.

¹³ Twalenu nawa mwanakwenu, nukatuke, nuye kuli mwe lunga,

¹⁴ ni Zambi Mukwa-Ndundo-Jeswe akanwehe keke kuli mwe lunga akanwehe yayenu mukwo hamuwika ni Mbenjamine. Nyi ana jami mangutoka, mangutoka lume.

¹⁵ Chocho malunga atwalile ni we mulambu, ni ndando jiali mu moko jo, ni Mbenjamine. Yakatuka, yapalumuka ku Engitu, yamana kumeso ja José.

¹⁶ Muze José wamwene Mbenjamine hamwe no, yamba kuli kaselo ka zuwo lienyi ngwenyi, Neha malunga wano mu zuwo, ukashihe yifwo, ukalulike kulia, mumu malia ni yami tangwa ha muchima.

¹⁷ Mba kaselo yalinga chize José hamutuma, yatwala malunga mu zuwo lia José.

¹⁸ O yevwa woma mumu haatwala mu zuwo lia José. Yamba ngwo, Hatuneha muno mumu ha mbongo jize ahilwishile mu njeke jetu jila yitangu. Kashika anatutambila mulonga hanga atukwate hamwe ni yimbulu jetu, tukapwe tupinji.

¹⁹ Yakundama kuli mwe kaselo ka zuwo lia José nikuhanjika nenyi ku chikolo cha zuwo.

²⁰ Ngwo, Mwata, twejile jila yitangu mukulanda kulia.

²¹ Alioze ha kuheta ku chipombelo twajitwile njeke jetu, kumanyi mbongo ja mutu mweswe twajiwanyine mu njeke yenyi, mbongo jeswe nikulita ni pezu. Kashika hitwajineha mu kwoko.

²² Ni mbongo jikwo nawa hitwaneha mu kwoko tukalande kulia. Kutwanyingikine yoze asele mbongo jetu mu njeke jetu.

²³ Iye yamba ngwenyi, Hwimenu mbunge, kanda nwivwa woma, Zambi yenu, Zambi ya tatenu hananwehe upite mu njeke jenu. Mbongo jenu nguli najo. Mba yaneha Simeone kuli ayo.

²⁴ Mwe kaselo yatwala malunga mu zuwo lia José, yaaha meya, yasanyisa molu jo, yahana kulia kuli yimbulu jo.

²⁵ O yalulika mulambu wo akauhane muze José heza tangwa ha muchima, mumu te hevwa ngwo, Munulia kuno.

²⁶ Muze José yaheta o yaneha mulambu mu kwoko lio mu zuwo, yahetamina hashi kuli iye.

²⁷ Yaahula nyi anahinduka, yamba ngwenyi, Tatenu kanahinduka, mukulwana nwamwambulwile? Hindu kali ni mwono?

²⁸ O ngwo, Ngamba yenu tata kanahinduka, kali ni mwono. Yahetamisa mitwe yo, yamuwayila.

²⁹ Iye yahetula meso jenyi, yamona mwanakwo Mbenjamine, mwe mwana wa naye, mba yamba ngwenyi, Yono mwanakwenu kasulasongo nwamwambulwile kuli yami, nyi? Kuli iye yamba ngwenyi, Mwanami, Zambi akulinge vumbi.

³⁰ José yakatuka kapupushi akafupe kuze malilila, mumu mbunge yenyi yevwile usona wunji hali mwanakwo. Yanjila mu chipatulo cha kupomba, yalililamo.

³¹ Yasana ku meso, yatuhuka nikusúla, yamba ngwenyi, Nehenu kulia.

³² Yamunehena kulia kwa ukawenyi, no nawa kwa ukawo, ni A-Engitu aze alile nenyi, no kwa ukawo. Mumu A-Engitu keshi kulia ni A-Hepreu. Acho kulijilula kuli A-Engitu.

³³ Yatwama kumeso jenyi, mukulwana nikulita ni kusemuka chenyi, kanuke nikulita ni wanuke wenyi. Chocho malunga akomokene.

³⁴ Yanda nawa kulia ku mesa yenyi nikuchituma kuli ayo, alioze kulia cha Mbenjamine chahianyine nicho yisuho yitano. Chocho anwine nikusehejela nenyi.