Ubutukilo 41 - MUKANDA USANDU WA ZAMBI 1975

¹ Muze miaka yiali hiyahwa Falau yalota. Mu chilota chenyi kanamana ku lwiji.

² Kumanyi mwatutukile mu lwiji ngombe shimbiali apema, atoha. Yalia mwambu wa mu chikulo.

³ Kumanyi mwatutukile mu lwiji nawa ngombe akwo shimbiali nikwakaula, o api, awangama, yamana hamuwika ni ngombe akwo ku mungilingili wa lwiji.

⁴ E ngombe api, awangama yalia ngombe akwo apema, atoha. Mba Falau yalaula.

⁵ Yapomba, yalota nawa chisuho chamuchiali. Yamona nona shimbiali jasoka ha chihupu chimuwika, jatoha, jipema.

⁶ Kumanyi yijikaula nona jikwo shimbiali jahuhuka, jakonyata ni fuji ya ku Chivumbuko.

⁷ Nona jize jahuhuka yijilia nona jikwo jize jatoha, jipema. Falau yalaula, kumanyi chapwile chilota.

⁸ Mu kwacha chimene mbunge yenyi yiyilipikala, yatuma kusanyika yimbanda eswe a mu Engitu, ni akwa mana eswe. Falau yaalweza chilota chenyi alioze niumwe kahashile kumulumbunwinacho wakuhi.

⁹ Henaho mwe kapatashi ka akwa misenge yamba ngwenyi, Mba musono ngunewuluka milonga yami.

¹⁰ Enu Falau watenukine ni yetu ngamba jenu. Wanguyikile mu zuwo lia kapitau ka tulayi, ni yami ni kapatashi ka akwa kulinga mbolo.

¹¹ Yitulota chilota ufuku umuwika ni iye ni yami, mutu mweswe nikulita ni ulumbunwiso wa chilota chenyi.

¹² Alioze umwe Ka-Hepreu twapwile nenyi, ngamba ya kapitau ka tulayi. Yitumwambulwilayo mba iye yatulumbunwina mutu mweswe chilota chenyi nikulita.

¹³ Mba chocho yatulumbunwina chochene chapwile. Ami anguhele milimo yami nawa, iye amusukikile.

¹⁴ Falau yatuma kusaka José. Yamuchiza fuji ku zuwo lia ususu, yalitewula, yazala mazalo eka, yaheta kuli Falau.

¹⁵ Falau yamba kuli José ngwenyi, Hinalota chilota alioze niumwe kahashile kungulumbunwinacho. Mba hinevwa ha kutwala kuli yena ngwo, Muze muwivwa chilota muhasa kuchilumbununa.

¹⁶ José yakumbulula kuli Falau ngwenyi, Muli yami kuchishimo, alioze Zambi kumahana kuli Falau kumbululo lia sambukila.

¹⁷ Mba Falau yamba kuli José ngwenyi, Mu chilota chami ngunamana ku mungilingili wa lwiji.

¹⁸ Mwatutukile mu lwiji ngombe shimbiali apema, atoha. Yalia ku mwambu wa mu chikulo.

¹⁹ Kumanyi ngombe akwo shimbiali yatutuka nikwakaula, akalwoka, api, awangama. Te kanda nguchimona ngombe api Chichize ku miaka yeswe mu chifuchi cha Engitu.

²⁰ Mba ngombe awangama, api, alile ngombe atangu shimbiali atoha.

²¹ Hindu muze haalia kuchi kunyingika ngwe haalia, achili api ngwe ha kuputuka. Yingulaula.

²² Mba yingumona mu chilota chami nona shimbiali ha chihupu chimuwika jinene, jipema.

²³ Mba kulutwe kwasokele nona jikwo shimbiali jalela, jahuhuka, jakonyata ni fuji ya ku Chivumbuko.

²⁴ Nona jahuhuka yijilia nona jipema. Nachambulula kuli yimbanda alioze kukushi niumwe unahase kungulumbunwinacho.

²⁵ José yamba kuli Falau ngwenyi, Kulota cha Falau chapwa chimuwika. Zambi hanasolola kuli Falau chize anambe kulinga.

²⁶ Ngombe shimbiali apema, miaka shimbiali; nona shimbiali jipema, miaka shimbiali. Chilota chimuwika.

²⁷ Ngombe shimbiali api, awangama, ni nona shimbiali jamokomoko, jakonyata ni fuji ya ku Chivumbuko, ayo yinalumbunuka miaka shimbiali ya kapunga.

²⁸ Ngwe hinamba kuli Falau, Zambi hanasolola kuli vena Falau chize anambe kulinga.

²⁹ Miaka shimbiali yineza ya kulia cha kulumbama mu chifuchi cheswe cha Engitu.

³⁰ Mba kulutwe kumuyikeza miaka shimbiali ya kapunga, mba kumakavulama miaka yize ya kulia cha kulumbama mu chifuchi cha Engitu. Kapunga kumakakuwisa chifuchi.

³¹ Kulumbama chize kechi kachinyingika mu chifuchi mumu ha kapunga yoze unachikaula, mumu kumakapwa mukalu chikolo.

³² Mba se hanasolola chuma chino kaali kuli Falau, chinalumbunuka che chuma hanachikolesa kuli Zambi. Chikwo nawa Zambi kumakachilinga ni shimbu liakuhi.

³³ Kashika Falau akafupe umwe lunga chikanyame, mukwa mana, akamuse helu lia chifuchi cha Engitu.

³⁴ Falau akalinge chino akase nawa tupatashi helu lia chifuchi akatambule chihanda chimuwika cha yihanda yitano ndusu chifuchi cha Engitu mu miaka shimbiali ya kulia cha kulumbama.

³⁵ Akakunge kulia cheswe cha miaka yipema yize muyizaho, akasweke mbuto ku kwoko lia Falau mu yihunda yikapwe kulia, akachifunge.

³⁶ Kulia chize muchipwa cha kutulikila miaka yize shimbiali ya kapunga muyiza mu chifuchi cha Engitu. Kuchina akwa chifuchi eswe makuwa ni kapunga.

³⁷ Chuma chino chapemenene ku meso ja Falau ni ku meso ja atu jenyi eswe nawa.

³⁸ Falau yamba kuli tuvumbi twenyi ngwenyi, Mutuhasa kuwana mukwo walifwa ni yono? Spiritu ya Zambi katwama muli iye.

³⁹ Falau yamba kuli José ngwenyi, Se Zambi hakulweza yino yuma yeswe niumwe mukwo wakuhi mapwa ni ukanyame ni mana ngwe yena.

⁴⁰ Kashika yena muyula zuwo liami. Atu jami eswe malinga nikulita ni liji lie. Mu ngunja wika mungukuhiana.

⁴¹ Yamba kuli José nawa ngwenyi, Hinakusa helu lia chifuchi cheswe cha Engitu.

⁴² Falau yachiza kazeya kenyi ka chijikilo ku kwoko lienyi, yamusa ha kwoko lia José. Yamujika ni uzalo wa hina lipema litoma. Yasa lenge lia oru ha kota yenyi.

⁴³ Yamwendesa mu temba lienyi liamuchiali. Atu atambikile kulutwe lienyi ngwo, Fulamanenu! Yamusa kuyula chifuchi cheswe cha Engitu.

⁴⁴ Falau yamba kuli José ngwenyi, Yami Falau, alioze niumwe mazundula kwoko lienyi hanji kulu lienyi mu chifuchi cheswe cha Engitu ndo yena muchitayiza.

⁴⁵ Falau yaluka José jina ngwenyi, Yena Zafwena-penenya. Yamwaha pwo Asena, mwana wa pwo wa Potifera sasendote ya One. Mba José wapalikile chifuchi cheswe cha Engitu.

⁴⁶ José wapwile ni makumi atatu a miaka muze amanyine kumeso ja Falau mwanangana wa Engitu. Mba yakatuka kumeso ja Falau nikupalika chifuchi cheswe cha Engitu.

⁴⁷ Ha miaka shimbiali ya kulia cha kulumbama e mavu emine mbuto ya moko a tò.

⁴⁸ Mba iye wakungile kulia cheswe cha miaka shimbiali chapwile mu chifuchi cha Engitu. Yasweka kulia mu membo. Kulia cha mu minda yakujingilika chihunda chimwe yachiswekelamo.

⁴⁹ José waswekele mbuto yakulumbama ngwe masekeseke a mu kalunga-lwiji, yinji chikolo ndo halitwamina kuyalula mumu kachihashile.

⁵⁰ Kuli José kwasemukine ana aali a malunga shimbu te miaka ya kapunga kanda yiheta. Asena mwana wa pwo wa Potifera sasendote ya One wamusemeneno.

⁵¹ Yaluka jina mukulwana ngwenyi, Manase, mumu Zambi hananguvulamisa kuhondangana chami cheswe, ni akwa zuwo lia tata.

⁵² Jina lia mukwo wamuchiali ngwenyi, Eframe, mumu Zambi hangwaha ana mu chifuchi cha lamba liami.

⁵³ Mba miaka shimbiali ya kulia cha kulumbama mu chifuchi cha Engitu yahwile.

⁵⁴ Miaka shimbiali ya kapunga yaputuka, nikulita ni liji lia José. Kwapwile kapunga mu yifuchi yeswe alioze mu chifuchi cheswe cha Engitu mwapwile kulia.

⁵⁵ Muze atu eswe mu chifuchi cha Engitu evwile zala atambikile kuli Falau akaahe kulia. Mba Falau yamba kuli A-Engitu eswe ngwenyi, Yénu kuli José. Cheswacho manwamba, lingenu.

⁵⁶ Kapunga wapwile hashi heswe, mba José wazulwile machila eswe nikulanjisa kuli A-Engitu. Kapunga te mukalu mu chifuchi cha Engitu.

⁵⁷ Akwa yifuchi yeswe ejile kuli José mu Engitu akalande mbuto mumu kapunga wapwile mukalu hashi heswe.