Ubutukilo 40 - MUKANDA USANDU WA ZAMBI 1975

¹ Kulutwe lia yuma yino, ni mukwa musenge wa mwanangana wa Engitu ni mukwa kulinga mbolo avulumwine mwene wo, mwe mwanangana wa Engitu.

² Falau watenukine ni tuliamanga twenyi aali; ni mwe kapatashi ka akwa misenge, ni mwe kapatashi ka akwa kulinga mbolo.

³ Yaafunga mu zuwo lia kapitau ka tulayi, mu zuwo lia ususu muze mwayikilile José.

⁴ Mba kapitau ka tulayi yaakunjika kuli José. Iye waalingilile. Chocho atwamine ufunge matangwa.

⁵ Eswe ni aali alotele chilota, mutu chilota chenyi, mutu chilota chenyi ufuku umuwika. Mutu ni mutu nikulita ni ulumbunwiso wa chilota chenyi, ni mukwa musenge wa mwanangana wa Engitu ni mukwa kumulingila mbolo, waze aayikilile mu zuwo lia ususu.

⁶ José yanjila kuli ayo ha chimene, yaamona kumanyi chinyengo anevu.

⁷ Yahula tuliamanga twa Falau atwamine hamwe nenyi ufunge mu zuwo lia kakó ngwenyi, Chinyengo chaka musono?

⁸ O yamba kuli iye ngwo, Mumu twalotanga chilota mba niumwe kahashile kutulumbunwinacho. José yamba kuli ayo ngwenyi, Ulumbunwiso kuwapwile wa mbala wa Zambi, nyi? Ngulwezecho kama.

⁹ Mba kapatashi ka akwa misenge yambulula chilota chenyi kuli José ngwenyi, Mu chilota chami kumanyi mutondo wa uva namwene.

¹⁰ Mu muuva mwapwanga mitango yitatu, mba ngwe yiutemuna, yiusolola yikeno yawo, ni yichakata yawo ya uva hiunahi kulu.

¹¹ Musenge wa Falau wapwanga mu kwoko liami kashika nahelanga uva, nayikamanga mu musenge wa Falau, nahananga musenge kuli Falau.

¹² José yamba kuli iye ngwenyi, Ulumbunwiso wacho uno; ngwami, Mitango yitatu matangwa atatu.

¹³ Ha matangwa atatu Falau maka-hetula mutwe we. Makusa nawa ku milimo ye, mba mukahana musenge wa Falau ku kwoko lienyi ngwe walingile shimbu uchili mukwa musenge wenyi.

¹⁴ Alioze ukangwiwuluke muze muchipwa kawape ni yena, Ukangulinge kama vumbi, ukanguvuluke kuli Falau akanguchize kama mu zuwo lino.

¹⁵ Mumu angwiyile ku chifuchi cha A-Hepreu. Chipwe kuno chalingile nichimwe chakungu-neha muno mu wina.

¹⁶ Muze kapatashi ka akwa kulinga mbolo wamwene ulumbunwiso upema, wambile kuli José ngwenyi, Yami nawa nalotanga chilota chami, kumanyi mitonga yitatu ya mbolo yitoma napwanga nayo ha mutwe.

¹⁷ Mu mutonga wa helu mwapwanga milali yeka ni yeka ya tumbolo twa kuhana kuli Falau, alioze tujila yeza nikutulia, mwe mu mutonga ha mutwe wami.

¹⁸ José yamba ngwenyi, Ulumbunwiso wacho uno; ngwami, Mitonga yitatu, matangwa atatu.

¹⁹ Ha matangwa atatu Falau makuteta mutwe we. Makusukika ha mutondo, mba tujila makakulia musunya we.

²⁰ Chapwile ha tangwa liamuchitatu, lienalio lia kwiwuluka kusemuka cha Falau, iye walingile chiteleka kuli ngamba jenyi eswe. Yahetula mutwe wa kapatashi ka akwa misenge ni wa kapatashi ka akwa kulinga mbolo hakachi ka ngamba jenyi.

²¹ Kapatashi ka akwa misenge yamwaha nawa milimo yenyi ya misenge, akahane musenge mu kwoko lia Falau.

²² Alioze yasukika kapatashi ka akwa kulinga mbolo chizechene ngwe José halumbununa kuli ayo.

²³ Hindu kapatashi ka akwa misenge kewulukile José, ka. Yamuvulama.