Ubutukilo 4 - MUKANDA USANDU WA ZAMBI 1975

¹ Mba lunga walimwene ni mukwo-pwo Eva. Iye yaka ufumba, yasema Kene. Yamba ngwenyi, Natambula mwana-lunga kuli Yehova.

² Kulutwe yasema nawa mwanakwo Abele. Abele mukwa kufunga mapanga, alioze Kene mukwa kulima.

³ Muze miaka hiyacha, Kene yatwala mulambu kuli Yehova wa mihuko ya ha mavu.

⁴ Abele neye yatwala tupula-jimo a mu chendo chenyi hamuwika ni maii jo. Yehova yalemesa Abele ni mulambu wenyi.

⁵ Alioze Kene ni mulambu wenyi kamulemeseneko. Kashika Kene yevwa ufwatulo, yanyakana ku meso.

⁶ Mba Yehova yamba kuli Kene ngwenyi, Ufwatulo waka? Kuchi te unanyakana ku meso?

⁷ Nyi mulinga kanawa kechi kukutambula nyi? Alioze nyi kwalingile kanawa shili kuyinautama ku chikolo. Kuli yena anase mbunge yenyi mba yena mukamuyula.

⁸ Kene yahanjika ni mwanakwo Abele. Mba muze apwile mu munda Kene yakatukila mwanakwo Abele, yamushiha.

⁹ Yehova yamba kuli Kene ngwenyi, Mwanakwenu Abele kulihi ali? Iye yakumbulula ngwenyi, Chanyingikine. Te yami nguli kafunga ka mwanakwetu, nyi?

¹⁰ Yehova yamba ngwenyi, Yika walinga? Liji lia manyinga a mwanakwenu linatete hashi kuli yami.

¹¹ Kashika haliapwila yena unashingiwa ku mavu aze hanapakula kanwa lio kutambula manyinga a mwanakwenu ku kwoko lie.

¹² Chize ku tangwa lia musono muze mulima ha mavu kechi kukwaha tachi jo. Kumukapwa mukwa kuchina kanda chendanganyi hano hashi.

¹³ Kene yamba kuli Yehova ngwenyi, Lamba liami liahiana naye, chichi kuhasa kulimbata.

¹⁴ Musono hiwanguhumina hashi, chipwe kumeso je mungukaswama. Mungupwa mukwa kuchina kanda chendanganyi hano hashi mba mweswawo manguwana mangushiha.

¹⁵ Alioze Yehova yamukumbulula ngwenyi, Kashika mweswe mashiha Kene mamufwetesacho yisuho shimbiali. Mba Yehova yasa chinyingi hali Kene kuchina umwe ha kumuwana mamushiha.

¹⁶ Kene yakatuka kumeso ja Yehova, yatwama mu chifuchi cha Nole, ku sali lia chivumbuko lia Endene.

¹⁷ Kene yalimona ni mukwo-pwo, yaka ufumba, yasema Enoke. Kene yatunga limbo, yaliluka jina lia mwanenyi Enoke.

¹⁸ Enoke yasema Ira, mba Ira yasema Mahujele; Mahujele yasema Matujela; Matujela yasema Lameke.

¹⁹ Lameke yambata mapwo aali, jina lia umwe Ata, jina lia mukwo Zila.

²⁰ Ata yasema Yavala, iye kalamba ka waze eswe akutwama mu mbalaka, akwa kupita yimuna.

²¹ Jina lia mwanakwo Yuvala, iye kalamba ka waze eswe akwimba kalialia ni ndembo.

²² Zila neye yasema Tupalikene mukwa kufula yitwa yeswe ya mukosa ni utale. Ndumbwenyi iye Namahe.

²³ Mba Lameke yamba kuli mapwo jenyi ngwenyi, Enu Ata ni Zila ivwenu liji liami: enu mapwo ja Lameke panjikenu kuhanjika chami. Hinashiha mutu mumu hangulemeka. Hinashiha mukweze ha kunguwonda.

²⁴ Nyi makala Kene yisuho shimbiali, chamwenemwene Lameke mamukala makumi shimbiali a yisuho ni yisuho shimbiali.

²⁵ Mba Alama yalimona nawa ni mukwo-pwo yasema mwana wa lunga, yamuluka jina ngwenyi, Sete. Mumu yamba ngwenyi, Zambi hangusela munyachi ukwo kusalakana Abele, mumu Kene yamushiha.

²⁶ Ni Sete nawa yasema mwana wa lunga, yamuluka jina ngwenyi, Enoshe. Ha matangwa aze atu aputukile kusanyika ha jina lia Yehova.