Ubutukilo 39 - MUKANDA USANDU WA ZAMBI 1975

¹ José amunehene ku Engitu mba Potifwa umwe kaliamanga ka Falau, kapitau ka tulayi Ka-Engitu yamulanda kuli A-Ishemali aze amutwalileko.

² Yehova wapwile hamwe ni José, iye wapwile ni somo watwamine mu zuwo lia kakó mwe Ka-Engitu.

³ Kakó yamona ngwenyi, Yehova kwali hamwe ni yono. Cheswacho analingi Yehova kakuchiwahisa mu kwoko lienyi.

⁴ José yamuwahila ku meso jenyi, yalumuka mukwa kuvumbika kakó, yamupwisa kaselo kenyi. Yakunjika upite wenyi weswe kuli iye.

⁵ Kumanyi chize ku tangwa lize amupwishile kaselo nikumukunjika upite wenyi weswe Yehova wawahishile zuwo lia Ka-Engitu mumu ha mukunda wa José. Yehova wawahishile upite wenyi weswe ni mu zuwo ni yambu.

⁶ Mba Ka-Engitu yahichika yeswe mu kwoko lia José. Kanyingikine yize apwile nayo shina kulia chenyi wika. José wapwile ni mujimba upema, wapemenene ku meso.

⁷ Kulutwe pwo lia kakó wasele meso jenyi kuli José, mba yamba ngwenyi, Tweya upombe ni yami.

⁸ Alioze iye katayile. Yamba kuli pwo lia kakó ngwenyi, Mwata wami kanyingikine yize yili mu kwoko liami muno mu zuwo, se hanakunjika yuma yeswe kuli yami.

⁹ Niumwe wanguhiana mu zuwo, wakuhi. Kanguminyine nichimwe chuma shina yena wika, se uli pwo lienyi. Kuchi munguhasa kulinga ungulungulu upwa haha nikuvulumuna Zambi?

¹⁰ Chocho pwo wejile kuli José tangwa ha tangwa alioze iye kamupanjikile apombe nenyi, chipwe kupwa hamuwika nenyi.

¹¹ Ha matangwa aze iye wanjilile mu zuwo akalinge milimo yenyi. Niumwe lunga mukwo keshimo mu zuwo.

¹² Mwe pwo yamukwata ku chikuto chenyi ngwenyi, Tweya upombe ni yami. Iye yahichika chikuto chenyi mu kwoko lia pwo, yachina, yakatuka mu zuwo.

¹³ Mba muze pwo yamona ngwe hahichika chikuto chenyi mu kwoko lienyi nikuchina,

¹⁴ iye yasanyika malunga a mu zuwo lienyi, yahanjika no ngwenyi, Tala, hananeha yono Ka-Hepreu atuyunge. Kanjilanga akapombe ni yami, kashika ami nateta ni liji linene.

¹⁵ Mba muze hangwivwa nikuteta yahichika chikuto chenyi kuli yami, yachina, yaya.

¹⁶ Chocho pwo wafungile chikuto chenyi ndo ku kwiza cha mwata wenyi.

¹⁷ Yalumbununa chizechene maliji ano eswe ngwenyi, Yoze ngamba wa Ka-Hepreu watunehenene, yanjila kuli yami angulelese.

¹⁸ Mba muze natetele ni liji linene iye yahichika chikuto chenyi kuli yami, yachina.

¹⁹ Mba muze kakó hevwa maliji a mukwopwo nikwamba ngwenyi, Chocho chiahanjika ni yami, ufwatulo wenyi wafulukile.

²⁰ Kakó ya José yamukwata, yamusa mu zuwo lia ususu muze ayikilile funge a mwanangana. Mwenamo mwatwama mu zuwo lia ususu.

²¹ Alioze Yehova Watwamine hamwe nenyi. Wamuwahishile nikumwaha vumbi kuli mwe kalayi ka zuwo lia ususu.

²² Kalayi ka zuwo lia ususu wakunjikile kuli José funge eswe apwilemo mba cheswacho alingilemo iye wachilingishile.

²³ Mwe kalayi ka zuwo lia ususu katalile ku yuma yapwile mu kwoko lia José mumu Yehova wapwile nenyi. Cheswacho alingile, Yehova wachiwahishile.