Ubutukilo 38 - MUKANDA USANDU WA ZAMBI 1975

¹ Ha matangwa aze Yunda yahichika ana-akwo, yaya kuli umwe Ka-Ndu lame jina lienyi Hira.

² Yunda yamonako umwe pwo, mwana wa Ka-Kanana jina lienyi Shua. Yamumbata, yanjila kuli iye.

³ Iye yaka ufumba, yasema mwana-lunga, yamuluka jina ngwenyi, Ere.

⁴ Yaka ufumba nawa, yasema mwana-lunga, yamuluka jina ngwenyi, Onane.

⁵ Yasema mwana mukwo nawa wa lunga, yamuluka jina ngwenyi, Shela. Yunda te ku Kezepi ali muze amusemene.

⁶ Yunda yambachisa pwo mwanenyi mutangu Ere, jina lia pwo Tama.

⁷ Alioze Ere mwana mutangu wa Yunda, wapwile chingulungulu kumeso ja Yehova, kashika Yehova yamushiha.

⁸ Yunda yamba kuli Onane ngwenyi, Njila kuli pwo lia yayenu ukamanunune shimbi ja unyali, ukasemene ana yayenu.

⁹ Alioze Onane kananyingika ngwenyi, Mwana kechi kupwa wa yami. Kashika muze anjilile kuli pwo lia yayo yayimwanga hashi kuchina masemena mwana yayo.

¹⁰ Chuma chino alingile chapwile chipi kumeso ja Yehova mba yamushiha iye nawa.

¹¹ Mba Yunda yamba kuli tembwamwanenyi Tama ngwenyi, Twama utwamishi mu zuwo lia tatenu ndo mwanami Shela hakola. Mumu kanambe ngwenyi, Kuchina iye nawa mafwa, ngwe ayayo. Chocho Tama yaya, yatwama mu zuwo lia tato.

¹² Kulutwe lia shimbu mwana wa Shua mwe pwo lia Yunda yafwa. Mba muze halembejeka Yunda, iye yakanduka hamuwika ni sepa lienyi Hira Ka-Ndulame kuli akwa kutewula mapanga jenyi ku Timna.

¹³ Umwe yalweza Tama ngwenyi, Tala, tatenu-weno kanayi ku Timna kutewula mapanga jenyi.

¹⁴ Mba iye yazula mazalo a utuliwa yalifuka ni wanda, nikulijika kanawa, yatwama mu chikolo cha Ename mu jila ya kuya ku Timna. Mumu kanamono ngwenyi, Shela hakola kulu hindu kanguhanyine kuli iye.

¹⁵ Muze Yunda yamumona yanyonga ngwenyi, Iye chikoi, mumu halifuka ku meso.

¹⁶ Kashika yaya kuli iye ku sesa lia jila ngwenyi, Ngunasakwila, ngunjile kuli yena. Mumu iye kanyingikine ngwenyi, Tembwa-mwanami. Pwo yakumbulula ngwenyi, Yika mungwaha mba unjile kuli yami?

¹⁷ Iye ngwenyi, Mungukutuma mwana-pembe wa ku chendo. Pwo yamba ngwenyi, Mungwaha mwivu ndo mukamutuma?

¹⁸ Iye yamba ngwenyi, Mwivu uka mungukwaha? Pwo ngwenyi, Chijikilo che, ni muya we, ni mulumbu uli nawo mu kwoko. Yamwahayo, yanjila kuli iye, mba pwo yapwa ni ufumba kuli iye.

¹⁹ Mba yakatuka, yazula wanda, yazala mazalo a utuliwa.

²⁰ Yunda yatuma sepa lienyi Ka-Ndulame ni mwana-pembe, akatambule mwivu ku kwoko lia pwo, alioze kamuwanyine.

²¹ Yahula malunga enyembo ngwenyi, Mwe chikoi Watwamine ku Ename ku sesa lia jila kulihi ali? O ngwo, Kukwapwile chikoi niumwe ku kuno.

²² Chocho yahiluka kuli Yunda ngwenyi, Chamuwanyine, chikwo nawa malunga enyembo ngwo, A kuno kukwapwile niumwe chikoi.

²³ Yunda yamba ngwenyi, Hiayizuke nyi, kuchina matukolesa sonyi. Ami hinatuma mwe mwana-pembe, ena kwamuwanyine, kwahwa.

²⁴ Mba kulutwe lia tukweji atatu, yambulwila Yunda ngwo, Tembwa-mwané Tama halipwisa chikoi, chikwo nawa, hapwa ni ufumba wa ku ukoi wenyi. Yunda ngwenyi, Mutuhwisenu, numwoche.

²⁵ Muze te hamutuhwisa, iye yatuma kuli tato-weno ngwenyi, Mwenya yino yuma iye wanguhele ufumba. Utale kanawa, unyingike mwenya yino yuma, ni chijikilo, ni muya, ni mulumbu.

²⁶ Yunda yayitayiza ngwenyi, Iye kanasambe, nahia yami, se chamuhanyine kuli mwanami Shela mba kalimwene nenyi nawa.

²⁷ Muze haheta ha kakweji wenyi wa kusema, kumanyi ana-apasa ali no mu jimo.

²⁸ Muze haputuka misongo, mwana umwe hatuhwisa kwoko mba chifunguji hamujichika wanda uchila ha kwoko lienyi, ngwenyi, Yono walianga kusemuka.

²⁹ Alioze iye yanjisa kwoko lienyi nawa kumanyi mwanakwo walianga kusemuka. Kashika chifunguji yamba ngwenyi, Kuchi unalituhukila Chichize? Mba yamuluka jina, Pereze.

³⁰ Kulutwe kwasemukine mukwo ni wanda uchila ha kwoko lienyi. Yamuluka jina, Zera.