Ubutukilo 37 - MUKANDA USANDU WA ZAMBI 1975

¹ Yakomba watwamine mu chifuchi cha unjize wa tato, mwe mu chifuchi cha Kanana.

² Chisemuko cha Yakomba, chino; José, te kali ni kumi lia miaka ni miaka shimbiali, walishile mapanga hamwe ni ayayo. Iye wapwile kanuke hamwe ni ana ja Mbila ni ana ja Zelupa, mapwo ja tato. José wahetesele lufuma wo mupi kuli tato.

³ Alioze Yakomba wazangile José kuhiana ana jenyi eswe mumu iye mwana wa ukulwana wenyi, kashika wamutongeselele chikulo cha ulombo weka ni weka wunji.

⁴ Muze ayayo hamona chize tato kanamuzange kuhiana ayayo eswe, amuvwilile kole. Kahashile kuhanjika nenyi ni sambukila.

⁵ José yalota chilota, yachilweza kuli ayayo, kashika o yaweza nawa ku kole yo.

⁶ Yamba kuli ayo ngwenyi, Ivwenu kama chilota chino nalotanga.

⁷ Namwene ngwe tunajichika yichita mu munda. Kumanyi, chichita chami chakatukile yichimana kachichi mba yichita ya yenu yiyikunguluka nikuhetamina hashi ku chichita chami.

⁸ Ayayo yamba kuli iye ngwo, Te yena mukatuyula, nyi? Te mukatuzeyesa, nyi? Mba amuvwilile kole kuhiana nawa, mumu ha yilota yenyi ni maliji jenyi.

⁹ Iye yalota nawa chilota chikwo, yachilweza kuli ayayo ngwenyi, Kumanyi, hinalota nawa chilota chikwo. Ni tangwa, ni kakweji, ni kumi lia matongonoshi ni lutongonoshi umuwika yahetamina hashi kuli yami.

¹⁰ Yachilweza kuli tato ni kuli ayayo. Alioze tato yamwambila ngwenyi, Chilota chino hiwalota kuchi chinalumbunuka? Te yami, ni noko, ni ayayenu mutukahetamina hashi kuli yena?

¹¹ Ayayo amuvwilile ukwa, alioze tato wafungile maliji ano mu mbunge yenyi.

¹² Ayayo ayile nikulisa mapanga ja tato mu Shekeme.

¹³ Mba Izalele yamba kuli José ngwenyi, Ayayenu analisa mapanga mu Shekeme. Tweya ngukutume kuli ayo. Iye yamba ngwenyi, Yami uno.

¹⁴ Yamba ngwenyi, Haliapwila yako ukatale nyi anatwama kanawa, ni mapanga nawa, ukangunehene liji nawa. Chocho yamutuma, yakatuka ku chikulo cha Heprone yaya ku Shekeme.

¹⁵ Umwe lunga yamuwana te anachamangina mu yambu. Yamuhula ngwenyi, Yika unafupu?

¹⁶ Iye ngwenyi, Ayaya ngunafupu. Ngulweze kama kuze analishila mapanga.

¹⁷ Mwe lunga wambile ngwenyi, Hanatutuluka ku kuno, mumu naavwile ngwo, Tuyenu ku Ndotane. José yakaula ayayo, yaawana mu Ndotane.

¹⁸ O yamumona kusuku, mba shimbu kanda achiheta kuli ayo yamutwama punga akamushihe.

¹⁹ Yaliamba umwe kuli mukwo ni mukwo ngwo, Kumanyi, mukwa yilota kaneza.

²⁰ Kashika tuyenu, tumushihe, tumumbile mu wina. Mba mutwamba ngwetu, Ngongo hanamuli, mba mutumona chize muchipwa cha yilota yenyi.

²¹ Rupene yachivwa, yamupulula ku moko jo. Yamba ngwenyi, Kanda tumushiha.

²² Rupene ngwenyi, Kanda numwanga manyinga. Tumumbilenu mu wina uno mu puya alioze kanda tumushiha. Yamba chocho hanga akamulamwine ku moko jo akamuhetese kuli tato.

²³ Kwapwile muze wahetele kuli ayayo amuzulile chikuto chenyi, chikuto chize anazala cha ulombo weka ni weka.

²⁴ Yamwanda, yamumbila mu wina, te wina wamokomoko, kumushi meya.

²⁵ Yatwama nikulia mba ha kuhetula meso jo yamona chendo cha A-Ishemali anakatuka ku Ngiliate ni tumelu two. Kanambata mbuto yipema, ni yitumbo, ni mira. Kanatalikisa ku Engitu.

²⁶ Yunda yamba kuli ana-akwo ngwenyi, Nyi mutushiha mwanakwetu nikusweka manyinga jenyi yika mutufumbula?

²⁷ Tumulanjisenu kuli A-Ishemali alioze kanda tumushiha yetu mumu iye mwanakwetu, musunya wetu. Mba ana-akwo yapanjika kuli iye.

²⁸ Kwapalikile amwe akwa yitanda A-Mindiane, yasosa José nikumuchiza mu wina, yamulanjisa kuli A-Ishemali ha ndando ya makumi aali a mbongo ja prata. O yatwala José ku Engitu.

²⁹ Rupene yaya nawa ku wina, kuwana José keshimo. Kashika yapula mazalo jenyi.

³⁰ Yaya kuli ana-akwo, ngwenyi, Mwe mwana keshimo, mba yami kulihi munguya?

³¹ O yanda chikuto cha José, yashiha kuji a pembe, yachupika chikuto mu manyinga.

³² Yatuma chikuto cha ulombo weka ni weka, yachihetesa kuli tato ngwo, Chino twachiwana. Uchitale kanawa nyi cha mwané nyi ka.

³³ Iye yachinyingika ngwenyi, Chikuto cha mwanami. Umwe ngongo hanamuli. Pundu José hanamupapulula.

³⁴ Yakomba yapula mazalo jenyi, yalijichika chikeleyi, walishimwokene matangwa anji hali mwanenyi.

³⁵ Anenyi eswe a malunga ni anenyi eswe a mapwo yakatuka akamulembejeke ahoze kasolo. Ngwenyi, Mnngukaya ku Shiole kuli mwanami nikulishimwoka. Chocho tato wamulilile.

³⁶ A-Mindiane yamulanjisa mu Engitu kuli Potifwa, umwe kaliamanga ka Falau, kapitau ka tulayi.