Ubutukilo 35 - MUKANDA USANDU WA ZAMBI 1975

¹ Zambi yamba kuli Yakomba ngwenyi, Katuka, ukanduke ku Mbetele ukatwa meko. Lingako chilumbilo kuli mwe Zambi wasolokele kuli yena muze wachinyine kumeso ja yayenu Esau.

² Kashika Yakomba yamba kuli akwa zuwo lienyi ni waze eswe apwile no ngwenyi, Mbilenu mahamba a tundaka nuli no hakachi kenu, lipemesenu, zalenu mazalo eka,

³ tuyenu, tukandukenu ku Mbetele. Mungutungako chilumbilo kuli mwe Zambi wangukumbulwile ha tangwa lia lamba liami, wendele ni yami jila yize nayile.

⁴ Mba yahana kuli Yakomba mahamba eswe a tundaka apwile no, ni yingelengele apwile nayo mu matwi jo. Yakomba yayivumbika mushi lia mutondo wa carvalho ku Shekeme.

⁵ Chocho yaya, mba woma wunji wapwile ha membo eswe a kwajingilika. Kakawile ana ja Yakomba.

⁶ Mba Yakomba yaheta ku Luze mu chifuchi cha Kanana (kwe ku Mbetele kwenako) ni ive ni atu eswe ejile no.

⁷ Watungileko chilumbilo, yalukaho jina ngwenyi, Ele-mbetele, mumu kwenako Zambi walisolwele kuli iye muze wachinyine kumeso ja yayo.

⁸ Debola, ndeji ya Rebeka, wafwile, yamufunda ku mwanda wa Mbetele mushi lia mutondo wa carvalho. Yalukaho jina Alone-bakute.

⁹ Zambi yasoloka cheka nawa kuli Yakomba muze akatukile ku Panda-narame. Yamuwahisa.

¹⁰ Zambi yamba kuli iye ngwenyi, Jina lie Yakomba, alioze jina lie kulichi kupwa Yakomba nawa, jina lie mulipwa Izalele. Yamuluka jina ngwenyi, Izalele.

¹¹ Zambi yamba kuli iye ngwenyi, Yami nguli Zambi Mukwa-Ndundo-Jeswe. Useme, uliwezele; vungu ni chendo cha mavungu makasemuka kuli yena; mianangana makasemuka ku mitanda ye.

¹² Chifuchi nahanyine kuli Apalahama ni kuli Izake, munguchihana kuli yena ni ku munyachi we kulutwe lie.

¹³ Chocho Zambi yakatuka kuze yahanjika nenyi, yazezuka mwilu.

¹⁴ Mba Yakomba yamika liwe kuze Zambi wahanjikile nenyi liwe lia kumika. Yazujilaho mulambu wa kunwa, ni maji nawa.

¹⁵ Yakomba yaluka jina kuma kuze Zambi wahanjikile nenyi ngwenyi, Mbetele.

¹⁶ O yachiza wenyi wo ku Mbetele, kwasalile kapinji nikuheta ku Efrata muze Rakele yaputuka misongo ya kusema mba yikola yinji chikolo apwile nayo.

¹⁷ Mba shimbu machipinda ni misongo chifunguji wambile ngwenyi, Kanda wivwa woma, mumu haliapwila mwana mukwo wa lunga muopwa nenyi.

¹⁸ Mba kwapwile muze mwono wenyi muusutuka (mumu wafwile) yamuluka jina ngwenyi, Mbenoni. Alioze tato yamuluka jina ngwenyi, Mbenjamine.

¹⁹ Chocho Rakele yafwa, yamufunda mu jila ya kuya ku Efrata (likwo Mbeteleme).

²⁰ Yakomba yamika liwe ha fuka lienyi. Liwe lia fuka lia Rakele kulili ndo musono.

²¹ Izalele yaya mu jila yenyi, yajika mbalaka yenyi sali lize lia kaposhi wa Edere.

²² Kwapwile shimbu Izalele Watwamine mu chifuchi chize Rupene yaya, yapomba ni Mbila *konkubina ya tato, mba Izalele yachivwa. Mba ana ja Yakomba te kumi ni aali.

²³ Ana ja Liya, Rupene, mutangu wa Yakomba, ni Simeone, ni Levi, ni Yunda, ni Isaka, ni Zapulone.

²⁴ Ana ja Rakele, José ni Mbenjamine.

²⁵ Ana ja Mbila ndungo ya Rakele, Ndane ni Napatali.

²⁶ Ana ja Zelupa ndungo ya Liya, Ngate ni Ashe. Wano e ana a malunga a Yakomba asemukine kuli iye mu Panda-narame.

²⁷ Yakomba yeza kuli tato Izake ku Mamare, ku Kiriate-Arpa (likwo Heprone) kuze kwatwamine ni Apalahama ni Izake.

²⁸ Miaka ya Izake yapwile kulakaji lia miaka ni makumi nake a miaka.

²⁹ Mba Izake yasutuka, yafwa, yamutwala kuli tulamba twenyi, te mukulwana, matangwa hoka. Ana jenyi Esau ni Yakomba yamufunda.