Ubutukilo 34 - MUKANDA USANDU WA ZAMBI 1975

¹ Ndina mwana wa pwo wa Liya amusemenene kuli Yakomba, watuhukile akamone ana-mapwo a chifuchi.

² Mba Shekeme mwana wa Hamore Ka-Hevwe mwanangana wa chifuchi yamumona, yamwanda, yapomba nenyi nikumukolesa sonyi.

³ Mbunge yenyi yalalaminyine kuli Ndina mwana wa Yakomba. Wazangile mwe mwana-pwo, wahanjikile ni vumbi kuli iye.

⁴ Shekeme yahanjika ni tato Hamore ngwenyi, Ungwichile auze mwana-pwo akapwe pwo liami.

⁵ Yakomba yevwa chize halumbula mwanenyi Ndina. Ana jenyi a malunga te mu yambu ali ni ngombe, kashika Yakomba yahola nacho ndo heza.

⁶ Mba Hamore tato ya Shekeme yaya kuli Yakomba akahanjike nenyi.

⁷ Ana ja Yakomba yakatuka mu yambu muze hachivwa. Hevwa wuli wunji, kanatenuka mumu halinga uhepuke mu Izalele ha kupomba ni mwana wa Yakomba, chumacho keshi kuchilinga.

⁸ Alioze Hamore yahanjika no ngwenyi, Mbunge ya mwanami Shekeme yinazange chinji mwanenu. Ngunaliumbu numweheye akapwe pwo lienyi.

⁹ Tukalimbachile ni yenu. Enu munutwaha anenu a mapwo, mba munumbata anetu a mapwo.

¹⁰ Munutwama hamuwika ni yetu. Chifuchi cheswe chikapwe kumeso jenu. Twamenumo, ni kulanda ni kulanjisamo, nukapitemo upite.

¹¹ Shekeme yamba nawa kuli tato ni mandumbu jenyi ngwenyi, Nguvwilenu vumbi, cheswacho munwita mungunwahacho.

¹² Tongolenu yihako yeswayo chipwe yawana. Mungunwaha cheswacho munwita. Alioze ngwehenu mwe mwana-pwo tumumbate.

¹³ Ana ja Yakomba yakumbulula ni kalimbalimba kuli Shekeme ni tato Hamore mumu te hakolesa sonyi ndumbwo Ndina.

¹⁴ Ngwo, Kutwahashile kulinga chuma chino tukahane ndumbwetu kuli chilima. Acho muchipwa kutusaula.

¹⁵ Kutuchi kunutayiza chuma chino ndo munwononoka ku shimbi jetu. Nyi munupwa ngwe yetu, malunga eswe akaapwise ngalami.

¹⁶ Mba mutunwaha ana jetu a mapwo, ni yetu mutumbata ana jenu nikutwama hamwe ni yenu tukapwe vungu limuwika.

¹⁷ Alioze nyi kunuchi kutwivwa ha chuma cha ungalami mututambula mwanetu-wa-pwo himutuya.

¹⁸ Maliji jo yapemena Hamore ni Shekeme mwana wa Hamore.

¹⁹ Chipwe mwe mukweze kakwachile pami ha kulinga chuma chino, mumu ha kuwaha chize apwile nacho kuli mwana wa pwo wa Yakomba. Iye wapwile ni ulemu helu lia akwo eswe mu munyachi wa tato.

²⁰ Chocho Hamore ni mwanenyi Shekeme ejile mu chikolo cha limbo lio, yahanjika ni malunga a mu limbo ngwo,

²¹ Wano malunga kali ni sambukila kuli yetu, kashika atwame mu chifuchi akalande ni kulanjisamo mumu chifuchi chinatoho. Mutumbata ana jo a mapwo, no akambate anetu a mapwo.

²² Alioze shimbi yimuwika yasala mba atayize kutwama ni yetu tukapwe vungu limuwika. Ndo malunga eswe hakachi ketu akaapwise ngalami nikulifwa no.

²³ Te ngombe jo, ni upite wo, ni yimuna jo eswe kechi kupwa ninyetu? Tuatayizenu mba kumakatwama hamwe ni yetu.

²⁴ Kashika aze eswe atuhukile ku chikolo cha limbo apanjikile ku liji lia Hamore ni Shekeme. Malunga eswe atuhukile ku chikolo cha limbo aapwishile ngalami.

²⁵ Kwapwile ha tangwa liamuchitatu shimbu achili ni yikola, ana aali a Yakomba, majina jo Simeone ni Levi, mandumbu ja Ndina, anjile mutu katana kenyi mutu katana kenyi yanjila susumuku mu limbo, yashiha malunga eswe.

²⁶ Yashiha Hamore ni mwanenyi Shekeme ni katana, yachiza Ndina mu zuwo lia Shekeme, yaya.

²⁷ Mba ana ja Yakomba ejile kuli waze haashiha, yapupa limbo mumu te halumbula ndumbwo.

²⁸ Apupile mapanga jo, ni ngombe jo, ni yimbulu jo ni upite weswe awanyine mu limbo, ni upite weswe awanyine mu yambu.

²⁹ Ni yikumba yo yeswe, ni ana jo, ni mapwo jo, yaapupa akaapite, che cheswe cha mu mazuwo.

³⁰ Yakomba yamba kuli Simeone ni Levi ngwenyi, Lamba nwangunehena. Nwangupwisa ngwe vumba lipi hakachi ka akwa chifuchi, A-Kanana ni A-Perize. Se yami chishi ni atu anji malikungulula hamuwika akalikwate ni yami akangulambe. Kumungunonga, ni yami ni akwa zuwo liami.

³¹ O yamba ngwo, Te chamutamba kutenga ndumbwetu ngwe chikoi, nyi?