Ubutukilo 33 - MUKANDA USANDU WA ZAMBI 1975

¹ Yakomba yahetula meso jenyi, yamona kumanyi Esau kaneza ni makulakaji awana a malunga. Yahandununa ana kuli Liya ni kuli Rakele, ni kuli ndungo ja mapwo.

² Yasa ndungo kulutwe, ni Liya ni ana jenyi hakachi, ni Rakele ni José kunyima.

³ Iye mwene wayile kulutwe, yahetama hashi yisuho shimbiali, ndo yaheta kuli yayo.

⁴ Esau yazomboka nikumupatwiza, yamukwata mu moko, yalizewilaye, yamwaha mbeju, chocho alilile.

⁵ Iye yahetula meso, yamona mapwo ni ana, yamba ngwenyi, Wano uli no aya? Iye yakumbulula ngwenyi, Wano e ana Zambi hahana mu vumbi lienyi kuli yami kavumbi ke.

⁶ Mba ndungo yakundama ni ana jo, yahetama.

⁷ Ni Liya nawa ni ana jenyi yakundama, yahetama. Mba kunyima yo yakundama José ni Rakele nikuhetama.

⁸ Esau yamba ngwenyi, Chendo cheswe natakana nacho kuchi chinalumbunuka? Iye yamba ngwenyi, Hanga ngukawane vumbi kumeso ja yena mwene wami.

⁹ Esau ngwenyi, Anji nguli no mwanakwetu, zukako chize uli nacho.

¹⁰ Alioze Yakomba yamba ngwenyi, Hi chocho ko mwane. Nyi hinawana vumbi kumeso je tambula mulambu wami ku kwoko liami se hinamona meso je ngwe umwe mamona meso a Zambi, hiwangutambula ni vumbi.

¹¹ Tambula kama mulambu wami hinakunehena mumu Zambi hangulinga vumbi, se yuma yeswe nguli nayo. Yamushinjila mba yautambula.

¹² Esau yamba ngwenyi, Tukatukenu, tuye mu jila. Ami mungutetekela.

¹³ Iye yamukumbulula ngwenyi, Mwene wami unanyingika ana kanda akola, chikwo nawa yimuna ni ngombe nguli no anamwisa ana jo. Nyi maendesa naye tangwa limuwika eswe kumafwa.

¹⁴ Ena mwene wami, uchipalike kulutwe lia yami kavumbi ke, mba yami mungwenda hakehe nikulita ni kwenda cha yimuna wano kulutwe liami, nikulita nawa ni kwenda cha ana, ndo mungukuwana yena mwene wami mu Sere.

¹⁵ Esau yamba ngwenyi, Munguhichika amwe akwetu hamwe ni yena. Iye yakumbulula ngwenyi, Aka? Nguwane kama vumbi kumeso ja yena mwene wami.

¹⁶ Chocho Esau yahilukila tangwa lize akaye ku Sere.

¹⁷ Yakomba wendele ndo ku Sukote. Yatungilako zuwo, ni matanga hali yimuna jenyi. Kashika yalukako jina ngwenyi, Sukote.

¹⁸ Chocho Yakomba yaheta ni sambukila ndo ku chihunda cha Shekeme mu chifuchi cha Kanana, ha kukatuka ku Panda-narame. Yasa mbalaka yenyi kulutwe lia chihunda.

¹⁹ Yalanda chihela chize asele mbalaka yenyi kuli ana ja Hamore tato ya Shekeme, ha ndando ya kulakaji lia mbongo.

²⁰ Yatungaho chilumbilo, yachiluka jina ngwenyi, Ele-Lohe-Izalele.