Ubutukilo 32 - MUKANDA USANDU WA ZAMBI 1975

¹ Yakomba yaya mu jila yenyi mba angelo a Zambi yatakana nenyi.

² Ya komba muze haamona yamba ngwenyi, Chino chihuji cha Zambi. Kashika yaluka kuma kuze ngwenyi, Mahaneme.

³ Yakomba yatuma tunganda kulutwe kuli yayo Esau ku chifuchi cha Sere, kwe ku musenge wa Endome.

⁴ Yaaha shimbi ngwenyi, Munwamba kuli mwata Esau ngwenu, Liji lia kavumbi kenu Yakomba ngwenyi, Nayile kuli Lapane; natwamako ndo haliapwila.

⁵ Hinazuka ngombe, ni yimbulu, ni yimuna, ni ndungo ja malunga ni ndungo ja mapwo. Ngunatumu kuhanjika ni yena mwata wami Ukangulinge vumbi.

⁶ Tunganda yahiluka kuli Yakomba ngwo, Twaheta kuli yayenu Esau, iye kaneza mukukupatwiza ni makulakaji awana a malunga.

⁷ Mba Yakomba yevwa woma wunji, yalipikala chinji. Yahandununa atu endele no, ni yimuna, ni ngombe, ni tumelu, apwe yendo yiali.

⁸ Yamba ngwenyi, Nyi Esau matakana ni chendo chimuwika, machipupa mba chendo chikwo chasala muchililamwina.

⁹ Mba Yakomba yalemba ngwenyi, Zambi ya kaka Apalahama; Zambi ya tata Izake; Mwene, yena wambile kuli yami ngwe, Hiluka ku chifuchi che, kuli usoko we, mba mungukakuwahisa.

¹⁰ Ami chatelele, chipwe hakehe, utu wa zango lie ni umwenemwene we walweza kuli yami kuvumbi ke. Mumu nazaukile yono Yordau ni mulumbu wami, haliapwila hinapwa yendo yiali.

¹¹ Ngunaliumbu, ungupulule ku kwoko lia yaya Esau, mumu woma ngunevu kuchina meza nikungupupa ni anaye hamwe ni ana.

¹² Wambile ngwe, Pundu mungukakulinga yipema, mungukapwisa munyachi we ngwe masekeseke a kalunga-lwiji, kechi kuhasa kwaalula mumu anji.

¹³ Yapombako ufuku uze. Yanda mulambu wa ku yuma yeswe apwile nayo akahane kuli yayo Esau.

¹⁴ Pembe a yihwo makulakaji aali; a kuji makumi aali, mapanga a yihwo makulakaji aali; a kuji makumi aali.

¹⁵ Tumelu a yamwa makumi atatu ni ana jo. Ngombe a yihwo makumi awana, a kuji kumi. A yimbulu makumi aali a yihwo ni kumi lia ana.

¹⁶ Yaakunjika kuli ngamba jenyi, chendo ni chendo ukawacho. Yamba kuli ngamba jenyi ngwenyi, Nuliange kuzauka yenu, nukasele kapinji hakachi ka chendo ni chendo.

¹⁷ Yamba kuli mukwa lutwe ngwenyi, Muze yaya Esau matakana ni yenu, manuhula ngwenyi, Kuli iya nunakatuka? Kulihi nunayi? Wano aya anayi kulutwe?

¹⁸ Mba muwamba ngwe, Wano eswe a kavumbi kenu Yakomba, te mulambu anatumu kuli yena Esau mwene wami. Iye kanatukaula kunyima.

¹⁹ Chocho nawa yalongesa wamuchiali, ni wamuchitatu, ni waze eswe akawile yendo ngwenyi, Chocho munuhanjika ni Esau muze nwatakana nenyi.

²⁰ Munwamba nawa ngwenu, Kavumbi kenu Yakomba kanatukaula kunyima. Mumu wanyongene ngwenyi, Mungumulembejeka ni mulambu uno unayi kulutwe mba mungumona meso jenyi. Hanji mangutayiza.

²¹ Chocho mulambu wazaukile kulutwe. Iye mwene wapombele ufuku uze hakachi ka akwo.

²² Mba ha ufuku yakatuka, yatwala mapwo jenyi aali ni ndungo ja mapwo aali, ni ana jenyi kumi ni umuwika, yazauka lwiji Yapoke ha mwa.

²³ Yaatwala, yaazawisa ha lwiji hamuwika ni yuma yeswe apichile.

²⁴ Yakomba yasala ukawenyi. Kwenako walitachikile nenyi umwe lunga ndo ku kucha cha tangwa.

²⁵ Muze amwene ngwenyi, Kenu ngunamuse, yamukwata mu chitongo, mba chitongo cha Yakomba chasengunukine shimbu te machilitachika nenyi.

²⁶ Mba mwe lunga yamba ngwenyi, Ngweche nguye, mumu kunachi. Iye yamukumbulula ngwenyi, Chichi kukwecha ndo munguwahisa.

²⁷ Yamuhula ngwenyi, Jina lie iya? Yakumbulula ngwenyi, Yami Yakomba.

²⁸ Iye yamba ngwenyi, Jina lie kulichi kupwa nawa Yakomba, alioze mulipwa Izalele, mumu walitachika ni Zambi, walitachika ni atu, wakumba.

²⁹ Mba Yakomba yamuhula ngwenyi, Ngulweze kama jina lie. Iye yakumbulula ngwenyi, Kuchi te unahula jina liami? Kwe kuze yamuwahisa.

³⁰ Yakomba yalukako jina ngwenyi, Penwele, mumu ngwenyi, Hinamona Zambi meso ni meso, hindu hangwaha mwono wami.

³¹ Shimbu machizauka Penwele tangwa yilivumbuka. Yakomba kanapalita mumu ha shina lia kulu lienyi.

³² Kashika ana a Izalele keshi kulia mujipa wa chitongo mumu iye wakwachile chitongo cha Yakomba mu mujipa wacho.