Ubutukilo 31 - MUKANDA USANDU WA ZAMBI 1975

¹ Iye wevwile maliji ja ana a Lapane ngwo, Yakomba hambata upite weswe wa tata. Hazuka uhenya uno weswe ku yuma yapwile ya tata.

² Yakomba yamona meso ja Lapane kumanyi kamutalile kanawa ngwe miaka ya kunyima.

³ Yehova yamba kuli Yakomba ngwenyi, Hiluka ku chifuchi cha atatenu ni usoko wenu, mba mungupwa hamwe ni yena.

⁴ Chocho Yakomba yatuma kusanyika Rakele ni Liya mu yambu kuze afungile yimuna jenyi.

⁵ Yamba kuli ayo ngwenyi, Ngunamono meso ja tatenu, kangutalile kanawa ngwe kunyima, alioze Zambi ya tata kwali hamwe ni yami.

⁶ Enu nunanyingika nalingila tatenu ni tachi jami jeswe.

⁷ Tatenu hangwonga, halumuna fweto yami kumi lia yisuho, hindu Zambi kamutayijile kunguyindamisa.

⁸ Muze iye hamba ngwenyi, Akwa yipeka mapwa fweto ye, mba yimuna eswe asemene ana ni yipeka. Nyi hamba ngwenyi, Akwa yihesayihesa mapwa fweto ye, mba yimuna eswe asemene ana ja yihesayihesa.

⁹ Chocho Zambi hanachiza yimuna ja tatenu haahana kuli yami.

¹⁰ Chapwile ha mwaka muze yimuna maka majimo, nahetwile meso jami, namwene mu chilota kuji a pembe waze anyinyine ha yimuna apwile a yihesayihesa, ni a yipekayipeka ni apundumuka.

¹¹ Mba mungelo wa Zambi yamba kuli yami mu chilota chami ngwenyi, Yakomba. Ami namba ngwami, Yami uno.

¹² Iye yamba ngwenyi, Hetula meso je haliapwila utale. Kuji eswe waze ananyina ha yimuna kapwa akwa yihesayihesa, ni akwa yipekayipeka ni apundumuka mumu hinamona yize yeswe Lapane kanakulingi.

¹³ Yami mwe Zambi ya Mbetele, kuze wakwichile maji ha liwe lia kumika. Kuze walakenyene chilakenyo ni yami. Kashika katuka, uhichike chifuchi chino, uhiluke ku chifuchi che cha kusemukina.

¹⁴ Rakele ni Liya yamukumbulula ngwo, Te chihanda chimwe hanji chihinga chimwe cha yetu chasala mu zuwo lia tata, nyi?

¹⁵ Te katumwene ngwe tuli yilambala? Se iye watulanjishile, mba hamana kulia ndando ya yihako.

¹⁶ Mumu upite weswe Zambi hachiza kuli tata, wa mbala wa yetu ni wa ana jetu. Kashika cheswacho Zambi hanakwambe, hilinga.

¹⁷ Mba Yakomba yakatuka, yasa anenyi a malunga ni mapwo jenyi ha tumelu,

¹⁸ yambata yimuna jenyi eswe, ni yikumba yenyi yeswe yize apita, ni ngombe eswe haazuka aze hapita mu Panda-narame, akaye kuli tato Izake mu chifuchi cha Kanana.

¹⁹ Alioze te Lapane haya kutewula mapanga jenyi, kashika Rakele yeya mahamba ja tato.

²⁰ Mba Yakomba yasewunuka kuli Lapane Ka-Seria, kamulwezelecho.

²¹ Chocho yachina ni upite wenyi weswe. Yakatuka, yazauka mwe Lwiji, yatalikisa meso jenyi ku milundu ya Ngiliate.

²² Ha tangwa liamuchitatu yambulwila Lapane ngwo, Yakomba hachina.

²³ Mba iye yatwala usoko wenyi hamuwika, yamukaula matangwa shimbiali, yamuwana mu milundu ya Ngiliate.

²⁴ Alioze Zambi yeza kuli Lapane Ka-Seria mu chilota ha ufuku, yamba kuli iye ngwenyi, Ukanyama, kanda uhanjika kuli Yakomba hanji chipema hanji chipi.

²⁵ Chocho Lapane yawana Yakomba. Yakomba te hajika mbalaka jenyi mu milundu, mba Lapane ni usoko wenyi yajika mbalaka jo mu milundu ya Ngiliate.

²⁶ Lapane yamba kuli Yakomba ngwenyi, Yika walinga, ukangusewunuke nikwombola ana jami a mapwo ngwe funge ja jita?

²⁷ Kuchi te unakachina nikusewunuka? Kwangulwezele, kachi nakwecha ni uwahililo ni miaso, ni mikupiela ni tulialia.

²⁸ Kwangutayijile kuhana mbeju kuli anami a malunga ni a mapwo. Henaho kwalingile ni mana.

²⁹ Chatwama mu tachi ja moko jami kukulinga chipi, alioze Zambi ya tatenu kahanjikanga ni yami ufuku wa musono ngwenyi, Ukanyama, kanda uhanjika kuli Yakomba hanji chipema hanji chipi.

³⁰ Chikwo nawa, chipwe chakutamba kuya mumu usona wunji uli nawo wa zuwo lia tatenu, alioze kuchi te unakeya mahamba jami?

³¹ Yakomba yakumbulula kuli Lapane ngwenyi, Mumu nevwile woma ngwami, Hanji meza kutambula ana jenyi ni tachi.

³² Mweswawo muwana ni mahamba je, kechi kutwama nawa ni mwono. Kumeso ja usoko wetu tala kanawa cheswacho chapwa niché uchimbate. Mumu Yakomba kanyingikine ngwenyi, Rakele heya mahamba.

³³ Chocho Lapane yanjila mu mbalaka ya Yakomba, ni mbalaka ya Liya, ni mbalaka ja ndungo aali a mapwo, alioze kaawanyine. Yatuhuka mu mbalaka ya Liya, yanjila mu mbalaka ya Rakele.

³⁴ Rakele iye te handa mahamba, haasweka mu seleyi ya kamelu, yatwamaho. Lapane yapolongoza mweswe mu mbalaka, kaawanyine.

³⁵ Rakele yamba kuli tato ngwenyi, Mwane, kanda utenuka chakatukile kumeso je mumu ndako ya mapwo yangukwata. Iye yafupa alioze kawanyine mahamba.

³⁶ Mba Yakomba yatenuka nikwambila Lapane. Yakomba yamba kuli Lapane ngwenyi, Utanguko wami uka? Mulonga wami uka? Ena hiwanguhanga fujifuji Chichize.

³⁷ Hiwapolongoza mu upite wami weswe, mba yikwata yika ya yena wawanamo? Yitumbike kuno kumeso ja usoko wami ni usoko we hanga atupatwile.

³⁸ Makumi aali a miaka natwama ni yena. Yihwo je a mapanga ni a pembe kaselumwine. Kuji ja mu matanga je chaalile.

³⁹ Yoze amupapulwile kuli ngongo chamunehene kuli yena; chapwile kutokesa cha yami. Ku kwoko liami wachifwetesele, chipwe amwiyile ha mwalwa chipwe ha ufuku.

⁴⁰ Chocho napwile. Ha mwalwa changa changutwile. Ha ufuku chishika. Chipwe tulo achinyine ku meso jami.

⁴¹ Makumi aali a miaka natwama mu zuwo lie. Nakulingilile milimo kumi lia miaka ni miaka yiwana hali ana je a mapwo aali. Nawezele miaka yisambano hali yimuna je, alioze walumionene fweto yami kumi lia yisuho.

⁴² Nyi kachi Zambi ya tata, Zambi ya Apalahama, woma wa Izake, kachi kapwile ni yami, pundu kachi wanguhumine mokomoko. Zambi hanamono lamba liami ni kuhondangana cha moko jami mba kakuhisanga musono.

⁴³ Lapane yakumbulula kuli Yakomba ngwenyi, Mapwo ana jami; ni e ana ninyami, ni yimuna ninyami; yuma yino yeswe unamono niyami, mba kuchi munguhasa kulinga musono kuli wano ana jami a mapwo, hanji kuli wano ana jo hasema?

⁴⁴ Tuye tukolese usendo, yami ni yena, ukapwe chinyingi hakachi ka yami ni yena.

⁴⁵ Mba Yakomba yanda luliwe, yalusa ngwe luliwe lwa kumika.

⁴⁶ Yakomba yamba kuli usoko wenyi ngwenyi, Andenu mawe. Mba yanda mawe, yaalunjika chilunjika. Chocho yalilako kwe ku chilunjika.

⁴⁷ Lapane yalukako ngwenyi, Yeka-sahanduta, alioze Yakomba yalukako ngwenyi, Ngalite.

⁴⁸ Lapane yamba ngwenyi, Chilunjika chino chikapwe chinyingi hakachi ka yami ni yena musono. Kashika jina liaho yaliluka, Ngalite.

⁴⁹ Likwo nawa, Mizepa, mumu wambile ngwenyi, Yehova akalé hakachi ka yena ni yami shimbu kutwalimwene umwe kuli mukwo.

⁵⁰ Nyi mupinjisa anami a mapwo, hanji muhalika nawa mapwo akwo hamwe no, lunga kutushi nenyi; alioze Zambi akapwe chela hakachi ka yami ni yena.

⁵¹ Lapane wambile nawa kuli Yakomba ngwenyi, Tala chilunjika chino ni liwe lino lia kumika, hinayisela hakachi ka yami ni yena.

⁵² Chilunjika chino chikapwe chinyingi, ni liwe lino likapwe chinyingi, ngwami, Chichi kahiana ha chilunjika chino ngukahete kuli yena, ni yena Kuchi kahiana ha chilunjika chino ukahete kuli yami kungulinga chipi.

⁵³ Zambi ya Apalahama, Zambi ya Nehore, Zambi ya tato akapatwile hakachi ketu. Mba Yakomba yalishinga ni woma wa tato Izake.

⁵⁴ Yakomba yalambula chitapo ha mulundu, yasanyika usoko wenyi akalie mbolo, o alileko mbolo, yatwama ufuku weswe ha mulundu.

⁵⁵ Mukwacha chimene Lapane yakatuka yahana mbeju kuli anenyi a malunga ni a mapwo, yaawahisa. Mba Lapane yakatuka yaya ku chifuchi chenyi.