Ubutukilo 30 - MUKANDA USANDU WA ZAMBI 1975

¹ Muze Rakele yamona kasemene ana kuli Yakomba yavwila ukwa yayo. Yamba kuli Yakomba ngwenyi, Ungwehe mwana, nyi ka, mungufwa.

² Utenu wa Yakomba yiukasumuka hali Rakele, yamba ngwenyi, Ami munguhasa kusalakana Zambi yoze hakuchinda kusema, nyi?

³ Rakele yamba ngwenyi, Tala ndungo yami Mbila, njila kuli iye akaseme ha molu jami ngukazuke ana kuli iye.

⁴ Yamwaha ndungo yenyi Mbila akapwe pwo lienyi, mba Yakomba yanjila kuli iye.

⁵ Mbila yaka ufumba, yasema mwana wa lunga kuli Yakomba.

⁶ Rakele yamba ngwenyi, Zambi hangupatwila, hevwa liji liami, hangwaha mwana. Kashika yamuluka jina lienyi Ndane.

⁷ Mba Mbila ndungo ya Rakele yaka ufumba nawa, yasema mwana wamuchiali wa lunga kuli Yakomba.

⁸ Rakele yamba ngwenyi, Hinalitachika ni yaya ni kulitachika cha ndundo, hinakumba. Mba yamuluka jina lienyi Napatali.

⁹ Muze Liya hamona halitwamina kusema yanda Zelupa ndungo yenyi, yamuhana akapwe pwo lia Yakomba.

¹⁰ Mba Zelupa ndungo ya Liya yasema mwana wa lunga kuli Yakomba.

¹¹ Liya yamba ngwenyi, Kunayuka. Yamuluka jina lienyi Ngate.

¹² Mba Zelupa, ndungo ya Liya yasema mwana wamuchiali wa lunga kuli Yakomba.

¹³ Liya yamba ngwenyi, Kunawaha! Mumu mapwo eswe manguvulwoka ngwo, Kawaha. Kashika yamuluka jina ngwenyi, Ashe.

¹⁴ Ku matangwa a kucha tiliku Rupene yaya yawana mihuko ya mandangora mu yambu, yayineha kuli naye Liya. Rakele yamba kuli Liya ngwenyi, Ngwehe kama yimwe ya mihuko ya mwané.

¹⁵ Iye yamukumbulula ngwenyi, Te chuma chilelu hiwangutambula mukwetu-lunga mba unazange kungutambula mihuko ya mwanami nawa, nyi? Rakele yamba ngwenyi, Nyi chocho musono mapomba ni yena, ungwehe mihuko ya mwané.

¹⁶ Yakomba yakatuka ku minda ha chingoloshi, mba Liya yamupatwiza, yamba ngwenyi, Chakutamba kunjila kuli yami mumu hinakuhanyina fweto ya mihuko ya mwanami. Chocho yapomba nenyi ufuku uze.

¹⁷ Zambi yapanjika kuli Liya, yaka ufumba, yasema kuli Yakomba mwana wa lunga wamuchitano.

¹⁸ Liya yamba ngwenyi, Zambi hangwaha fweto yami, mumu nahanyine ndungo yami kuli mukwetu-lunga. Yamuluka jina lienyi Isaka.

¹⁹ Liya yaka ufumba nawa, yasema kuli Yakomba mwana wa lunga wamuchisambano.

²⁰ Mba Liya yamba ngwenyi, Zambi hangwaha chawana chipema. Haliapwila lunga liami matwama ni yami mumu hinamusemena ana a malunga asambano. Yamuluka jina lienyi Zapulone.

²¹ Kulutwe yasema mwana wa pwo, yamuluka jina lienyi Ndina.

²² Mba Zambi yewuluka Rakele. Zambi yamupanjika, yamwaha kusema.

²³ Yaka ufumba, yasema mwana, yamba ngwenyi, Zambi hanguchiza sau.

²⁴ Yamuluka jina lienyi José, ngwenyi, Yehova akanguwezele mwana mukwo wa lunga.

²⁵ Mba muze Rakele hasema José, Yakomba yamba kuli Lapane ngwenyi, Ungweche nguye ku chijima chami, ku chifuchi chami.

²⁶ Penu mapwo jami ni ana jami aze naalingilile milimo, ungweche. Mumu unanyingika milimo hingunakulingila.

²⁷ Lapane yamba ngwenyi, Nyi hinawana vumbi ku meso je, twama. Mumu hinamona ngwami, Yehova kakunguwahisa ha mukunda wa yena.

²⁸ Yaweza nawa ngwenyi, Tongola fweto ye, mungukwahayo.

²⁹ Yakomba yamba kuli iye ngwenyi, Ena unanyingika chize nakukulingila, ni chize yimuna je hatwama ni yami.

³⁰ Mumu muze nejile te chikepe uli nacho. Haliapwila hichatoha, hichalumbama. Kweswako natalikisa Yehova hakuwahisa. Mba mwaka uka munguzuka yuma ya kuwahisa akwa zuwo liami lume?

³¹ Iye yamba ngwenyi, Kuchi mungukwaha? Yakomba ngwenyi, Kuchi kungwaha nichimwe. Nyi mukangulingila chuma chino mba mungulisa yimuna je nikwafunga.

³² Mungupalika hakachi ka yimuna je musono nikusakula waze eswe a yipekayipeka ni a yihesayihesa, ni mapanga alá, ni pembe a yipekayipeka ni a yihesayihesa. O mapwa fweto yami.

³³ Chocho ululi wami muungusambisa kulutwe muze muwiza kutala fweto yami. Nyi muwana kuli yami umwe keshi yipekayipeka hanji yihesayihesa hakachi ka pembe hanji umwe mulá hakachi ka mapanga muwamba ngwe, Wa kwiya.

³⁴ Lapane ngwenyi, Chikapwe nikulita ni liji lie.

³⁵ Alioze tangwa lioliene wachijile kuji a pembe eswe a yipekayipeka ni a yihesayihesa, ni yihwo eswe a yipekayipeka ni a yihesayihesa, te eswe apwile ni yipeka yitoma, ni mapanga alá eswe. Yaahana kuli ana jenyi.

³⁶ Yasela wényi wa matangwa atatu hakachi ka iye ni Yakomba. Mba Yakomba walishile yimuna a Lapane aze asalile.

³⁷ Mba Yakomba yanda mitondo ya wisu ya alamo ni ya aveleira ni ya kastanyeru, yayipulumwona yipeka yitoma hanga utome uze wa mitondo ukasoloke.

³⁸ Yasa mitondo yize yapulumwona hatalanganyi ni yimuna mu tupila twa yingolongolo ya meya, kuze yimuna ejile mukunwa. Mba se yimuna apwile ni kulinyina kwe ku meya,

³⁹ mba yimuna yaka majimo kumeso ja mitondo, yasema ana akwa yihesayihesa, ni akwa kupundumuka, ni akwa yipeka.

⁴⁰ Yakomba yahandununa ana, yatalikisa meso ja yimuna kuli akwa yihesayihesa ni kuli alá mu mapanga ja Lapane. Yasa yendo yenyi ukawo, kaatwalile ku tanga lia Lapane.

⁴¹ Kwapwile muze akwa tachi ja yimuna yaka majimo Yakomba yasa mitondo kumeso ja yimuna mu tupila hanga akake majimo hakachi ka mitondo.

⁴² Alioze kuli waze keshi tachi kaatwalileko. Chocho alelu apwile a Lapane, ni akwa tachi apwile a Yakomba.

⁴³ Mba mwe lunga wapichile chikolo. Wapwile ni yendo yinene, ni ngamba ja mapwo ni a malunga, ni tumelu ni yimbulu.