Ubutukilo 3 - MUKANDA USANDU WA ZAMBI 1975

¹ Achi kapela wakanyamine kuhiana tushitu eswe a mu yambu aze Yehova Zambi yatanga. Iye yamba kuli pwo ngwenyi, Kuma, Zambi hanambe ngwenyi, Kanda nukalia ku mitondo yeswe ya mu munda nyi?

² Pwo yamba kuli kapela ngwenyi, Ku mitondo yeswe ya mu munda tunahase kulia.

³ Alioze ku mihuko ya mutondo uze uli mukachi ka munda, Zambi hanambe ngwenyi, Kanda nuyilia, chipwe kukwatako, kuchina munufwa.

⁴ Kapela yamba kuli pwo ngwenyi, Kufwa kunuchi kufwa,

⁵ mumu Zambi kananyingika ngwenyi, Ha tangwa lize munuliako meso jenu malaula, munupwa ngwe Zambi, nikunyingika chipema ni chipi.

⁶ Muze pwo yamona ngwenyi, Mutondo upema wa kulia, chikwo nawa unawaha ku meso, mutondo wa kuzanga hanga akapwe ni mana, yahelako mihuko, yalia. Yahana nawa kuli mukwo-lunga hamwe nenyi, neye yalia.

⁷ Mba meso jo yalaula, eswe aali yanyingika ngwo, Uselesele tuli. Yatonga mafwo a mukuyu akaatenge miswele.

⁸ Aho yevwa liji lia Yehova Zambi kanende mu munda ha kukekema cha tangwa, kashika lunga ni mukwo-pwo yaswama kumeso ja Yehova Zambi hakachi ka mitondo ya mu munda.

⁹ Mba Yehova Zambi yatambika kuli Alama ngwenyi, Kulihi uli?

¹⁰ Iye yakumbulula ngwenyi, Nevwa liji lie mu munda mba nevwa woma mumu uselesele nguli, kashika naswama.

¹¹ Zambi yamba ngwenyi, Iya wakulweza ngwenyi, Uselesele uli? Hiwalia ku mutondo uze nakukanjishile ngwami, Kanda uliako, nyi?

¹² Lunga yamba ngwenyi, Pwo wanguhele akapwe hamwe ni yami, iye wangwahanga wa ku mutondo mba nalianga.

¹³ Mba Yehova Zambi yamba kuli pwo ngwenyi, Achi hiwalinga chika? Pwo yakumbulula ngwenyi, Mwe kapela wangwonganga mba nalianga.

¹⁴ Yehova Zambi yamba kuli kapela ngwenyi, Mumu hiwalinga chuma chino kashika kuwashingiwa kuhiana yimuna eswe ni tushitu eswe a mu yambu. Ha jimo lie mukenda, ukalie fufuta matangwa eswe a mwono we.

¹⁵ Chikwo nawa mungusa kole hakachi ka yena ni pwo; hakachi ka munyachi we ni munyachi wenyi. Mukwa munyachi wenyi makawonda mutwe we, ni yena mukawonda kashijino kenyi.

¹⁶ Kuli pwo yamba ngwenyi, Mungwokesa chikolo chinyengo che ni kwaka che. Musema ana ni yikola; mbunge ye muyipwa kuli mukwenu-lunga, iye kumakakuyula.

¹⁷ Kuli Alama yamba ngwenyi, Mumu yena hiwatayiza liji lia mukwenupwo hiwalia ku mutondo uze nakukanjishile ngwami, Kanda uliako, mavu kanashingiwa ha mukunda wa yena. Mukaliako ni kuhondangana wika matangwa eswe a mwono we.

¹⁸ Mbimbo nawa ni mikalale muyikakusokela, mba mukalia yilimalima ya ha mavu.

¹⁹ Mukalia ni matukuta a ku meso je ndo mukahiluka mu mavu se kuze kwene akuchijile. Mumu uli fufuta mba ku fufuta mukahilukila.

²⁰ Mba lunga walukile mukwo-pwo jina ngwenyi, Eva, mumu iye naye ya akwa mwono eswe.

²¹ Mba Yehova Zambi watongelele Alama ni mukwo-pwo yikuto ya malambu akaajike.

²² Yehova Zambi yamba ngwenyi, Kumanyi mutu hapwa ngwe yetu, nikunyingika chipema ni chipi, kashika kuchina mazoza kwoko lienyi akahele nawa ku mutondo wa mwono akalie, akatwame ni mwono miaka yeswe…

²³ kashika Yehova Zambi yamukatwisa mu munda wa Endene akalime mavu kuze amuchijile.

²⁴ Mba yahuma mutu, yasa ku sali lia Chivumbuko lia munda wa Endene akerupimi ni katana wa mulengi wa kutalikisa majila eswe kufunga jila ya mutondo wa mwono.