Ubutukilo 29 - MUKANDA USANDU WA ZAMBI 1975

¹ Mba Yakomba yaya mu jila yenyi, yaheta ku chifuchi cha ana ja ku Chivumbuko.

² Yatala, mba yamona shima mu chana, kumanyi yendo yitatu ya mapanga nikuutamako, mumu te kakunwisako mapanga. Liwe lili ha kanwa lia shima, liwe linene.

³ Kwenako yendo yeswe ya mapanga yakungulukila. Yachiza liwe ku kanwa lia shima, yanwisa mapanga, yasa nawa liwe homa halio ha kanwa lia shima.

⁴ Yakomba yamba kuli ayo ngwenyi, Akwetu ku mahienu kulihi? O yamba ngwo, Tuli akwa Harane.

⁵ Yamba ngwenyi, Lapane mwana wa Nehore nunamunyingika? Ngwo, Tunamunyingika.

⁶ Ngwenyi, Kanahinduka nyi? Ngwo, Kanahinduka, tala mwanenyi Rakele kaneza ni mapanga.

⁷ Iye yamba ngwenyi, Talenu tangwa lichili ha muchima. Shimbu lia kukungulula yimuna kanda lichipwa. Nwisa mapanga, nuye nukaalise.

⁸ O ngwo, Kutwahashile ndo yendo yeswe muyikunguluka, machiza liwe ku kanwa lia shima mba mutunwisa mapanga.

⁹ Shimbu machihanjika no Rakele yeza ni mapanga a tato, mumu iye te wakwafunga.

¹⁰ Muze Yakomba yamona Rakele mwana wa Lapane ndumbwa-naye ni mapanga ja ndumbwa-naye, Yakomba yakundama, yachiza liwe ku kanwa lia shima, yanwisa mapanga ja ndumbwa-naye.

¹¹ Yakomba yahana mbeju kuli Rakele, yalila ni liji linene.

¹² Yakomba yambulwila Rakele ngwenyi, Nguli usoko wa tatenu, nguli mwana wa Rebeka. Iye yazomboka, yambulwila tato.

¹³ Kwapwile muze Lapane yevwa liji lia Yakomba mwana wa ndumbwenyi, yazomboka kumupatwiza. Yamusambilila, yamwaha mbeju, yamuneha ku zuwo lienyi. Iye yambulwila Lapane yuma yino yeswe.

¹⁴ Lapane yamba kuli iye ngwenyi, Ena pundu uli chifwaha chami ni musunya wami. Yatwama nenyi ha shimbu lia kakweji.

¹⁵ Lapane yamba kuli Yakomba ngwenyi, Mumu uli usoko wami kashika mukangulingila chawana nyi? Tongola yena, fweto ye yika?

¹⁶ Lapane kali ni ana aali a mapwo jina lia mukulwana ngwo, Liya, jina lia kanuke ngwo, Rakele.

¹⁷ Meso ja Liya te kahweka, alioze Rakele iye mupema, chileza lume.

¹⁸ Yakomba wazangile Rakele. Yamba ngwenyi, Mungukulingila miaka shimbiali ukangwehe Rakele mwané wa kanuke.

¹⁹ Lapane yamba ngwenyi, Shinaho ngumuhangise kuli yena, hi weka ko, kashika twama ni yami.

²⁰ Yakomba yalinga milimo miaka shimbiali akambate Rakele. Yapwile kuli iye ngwe matangwa akehe mumu ha zango amuvwilile.

²¹ Yakomba yamba kuli Lapane ngwenyi, Ngwehenu pwo liami ngunjile kuli iye mumu matangwa jami hahwa.

²² Mba Lapane yakungulula malunga eswe a kuze, yateleka ulungi.

²³ Alioze ha chingoloshi yanda mwanenyi Liya, yamunehenaye, Yakomba yanjila kuli iye.

²⁴ Lapane yahana ndungo yenyi wa pwo Zelupa kuli Liya akapwe ndungo yenyi.

²⁵ Kwapwile muze hikwacha, kumanyi Liya! Yakomba yamba kuli Lapane ngwenyi, Chino wangulinga chika? Te chakulingilile milimo hali Rakele? Kashika kuchi te wangwonga?

²⁶ Lapane yamba ngwenyi, Kuno ku mahietu keshi kuchilinga kulianga kuhangisa kanuke shimbu kapula-jimo kwali.

²⁷ Manununa semana ya yono mba mutukwaha mukwo nawa ha milimo ya miaka yikwo shimbiali mukangulingila.

²⁸ Yakomba yalinga chocho, yamanununa semana yenyi, mba Lapane yamwaha mwanenyi Rakele akapwe pwo lienyi.

²⁹ Lapane yahana kuli mwanenyi Rakele ndungo yenyi Mbila akapwe ndungo ya Rakele.

³⁰ Yakomba yanjila kuli Rakele nawa. Yazanga Rakele kuhiana Liya kashika yamulingila milimo miaka yikwo shimbiali nawa.

³¹ Yehova yamona ngwe Liya kamuzangile kashika wamwaha kusema, alioze Rakele iye mumba.

³² Liya yaka ufumba, yasema mwana wa lunga, yamuluka jina lienyi Rupene se yamba ngwenyi, Mumu Yehova hamona kuyindama chami, haliapwila lunga liami manguzanga.

³³ Yaka ufumba nawa, yasema mwana wa lunga. Yamba ngwenyi, Mumu Yehova hevwa liji ngwo, Kamuzangile kashika hangwaha mwana yono nawa. Yamuluka jina lienyi, Simeone.

³⁴ Yaka ufumba nawa, yasema mwana wa lunga. Yamba ngwenyi, Mba chisuho chino mukwetu-lunga malinunga ni yami mumu hinamusemena ana atatu a malunga. Kashika yamuluka jina lienyi, Levi.

³⁵ Yaka ufumba nawa yasema mwana wa lunga. Yamba ngwenyi, Chisuho chino munguhalisa Yehova. Kashika yamuluka jina lienyi, Yunda. Yalitwamina kusema.