Ubutukilo 28 - MUKANDA USANDU WA ZAMBI 1975

¹ Chocho Izake yasanyika Yakomba, yamuwahisa, yamwaha shimbi ya kwamba kuli iye ngwenyi, Kanda utambula pwo wa hakachi ka ana ja A-Kanana.

² Katuka uye ku Panda-narame ku zuwo lia Mbetule tato ya noko, ukambateko pwo wa kuli ana ja Lapane ndumbwa-noko.

³ Zambi Mukwa-Ndundo-Jeswe akakuwahise, akakwehe ana, akakwokese ukapwe chendo cha mavungu.

⁴ Akakwehe chiwape cha Apalahama, ni ku munyachi we hamuwika hanga ukahinge chifuchi cha unjize we, chize Zambi wahanyine kuli Apalahama.

⁵ Chocho Izake yatuma Yakomba. Yaya ku Panda-narame kuli Lapane mwana wa Mbetule Ka-Seria, ndumbu ya Rebeka, chisemi cha Yakomba ni Esau.

⁶ Esau yamona Izake hawahisa Yakomba nikumutuma ku Panda-narame akambateko pwo. Yamona nawa muze yamuwahisa yamushika ngwenyi, Kanda ukambata pwo wa kuli ana ja A-Kanana.

⁷ Mba Yakomba yononokena atato ni naye, haya ku Panda-narame.

⁸ Esau yamona mapwo ja A-Kanana kapemenene tato Izake.

⁹ Kashika Esau yaya kuli Ishemali yaweza ku mapwo aze apwile no Mahalate mwana Ishemali mwana wa Apalahama, ndumbu ya Nepayote akapwe pwo lienyi.

¹⁰ Yakomba yakatuka ku Mbia-shipa yatalikisa ku Harane.

¹¹ Yaheta kumwe, yapombako mumu tangwa hilianjila. Yanda limwe liwe liako, yashachilaho mutwe wenyi nikupomba kwenako.

¹² Yalota, kumanyi yamona ndalo ya kumika hashi, songo liayo liaheta ndo mwilu, angelo a Zambi nikukanduka nikuhulumuka.

¹³ Chikwo nawa Yehova kanamana helu liayo, yamba ngwenyi, Yami Yehova, Zambi ya tatenu Apalahama, Zambi ya Izake, chifuchi chino unapombo mungukwahacho, ni kuli akwa munyachi we.

¹⁴ Akwa munyachi we kumakapwa ngwe fufuta ya hashi, kumukalitanda ku Chitokelo, ni ku Chivumbuko, lumbu ni lumbu, mavungu eswe a hashi eswe kumakaawahisa kuli yena ni ku munyachi we.

¹⁵ Tala, yami nguli hamwe ni yena, mungukakufunga kweswako muoya, mungukakuneha nawa ku chifuchi chino, mumu chichi kakuhichika ndo hinalinga chize nakulwezanga.

¹⁶ Mba Yakomba yalaula ku tulo twenyi, yamba ngwenyi, Pundu, Yehova kuno kwali, ami chachinyingikine.

¹⁷ Yevwa woma ngwenyi, Kuma kuno, kole ni woma. Kuno kwe ku zuwo lia Zambi, hi kweka ko. Kuno kwe ku chikolo cha mwilu.

¹⁸ Yakomba yalimeneka, yanda liwe lize halitenga mushachilo, yalimika lipwe liwe lia kumika yazuza maji ha songo lialio.

¹⁹ Yaluka jina kuma kuze ngwenyi, Mbetele. Alioze jina liako hatangu te Luze.

²⁰ Mba Yakomba yalakenya chilakenyo ngwenyi, Nyi Zambi mangufunga jila yeswe munguya akangwehe ya kulia, ni mazalo a kuzala,

²¹ ngukeze nawa ku zuwo lia tata ni sambukila mba Yehova mapwa Zambi yami.

²² Ni liwe lino hinalimika likapwe liwe lia kumika mulipwa zuwo lia Zambi. Ya yize yeswe mungwaha munguhilwisa chihanda chimuwika cha hakachi ka yihanda kumi.