Ubutukilo 27 - MUKANDA USANDU WA ZAMBI 1975

¹ Kwapwile muze Izake hapwa mukulwana, meso jenyi halá, kahashile kumona, yasanyika Esau mwanenyi wa mukulwana ngwenyi, Mwanami. Iye yakumbulula ngwenyi, Yami uno.

² Tato yamba ngwenyi, Haliapwila napwa mukulwana, Chanyingikine tangwa lia kufwa chami.

³ Kashika ngunaliumbu, anda mivu ye, ni chindalo che, ni uta we, yako mu yambu ukangushihile yifwo.

⁴ Ukangutelekele kulia chiyema chize nakuzanga, ukachinehe kuli yami ngukalie, hanga mbunge yami yikakuwahise shimbu kanda ngufwa.

⁵ Rebeka yevwa Izake shimbu machihanjika ni mwanenyi Esau. Chocho Esau yaya mu yambu akafupe yifwo akayinehe.

⁶ Mba Rebeka yahanjika ni mwanenyi Ya-komba ngwenyi, Tala, hinevwa tatenu kanahanjika ni yayenu Esau ngwenyi,

⁷ Ngunehene yifwo ungutelekele kulia chiyema hanga ngukalie, ngukakuwahise kumeso ja Yehova shimbu kanda ngufwa.

⁸ Kashika mwanami, ononoka ku liji liami nikulita ni chize mungukutuma.

⁹ Yako ku limba ukangunehene misamba aali apema a pembe. Mungwatelekela tatenu kulia chiyema chize akuzanga.

¹⁰ Mba yena muchitwala kuli tatenu akalie, akakuwahise shimbu kandafwa.

¹¹ Yakomba yamba kuli naye Rebeka ngwenyi, Yaya Esau iye mukwa wonawona, alioze yami kunasenena.

¹² Hanji tata manguvwavwata mba mangumona mahuza. Hanji shingo mungulikokela, hi chiwape ko.

¹³ Naye ngwenyi, Mwanami, shingo lie likapwile hali yami. Ononoka ku liji liami, yako unguneheno.

¹⁴ Iye yaya yaasaka, yaaneha kuli naye. Mba naye yateleka kulia chiyema chize azangile tato.

¹⁵ Rebeka yanda mazalo apema a mwanenyi wa mukulwana Esau, apwile no mu zuwo yajika no Yakomba mwanenyi wa kanuke.

¹⁶ Yasa malambu a pembe ha moko jenyi ni ha kota yenyi kuze kwasenena.

¹⁷ Yahana kuli mwanenyi Yakomba kulia chiyema chize hateleka hamuwika ni mbolo, mu kwoko lienyi.

¹⁸ Yanjila kumeso ja tato, yamba ngwenyi, Tata. Iye yakumbulula ngwenyi, Yami uno. Yena iya, mwanami?

¹⁹ Yakomba yamba ngwenyi, Yami Esau, mwané wa mukulwana. Hinalinga chize wangutumanga. Hindukenu mwane, nutwame, nukalie yifwo yami hanga mbunge ye yikanguwahise.

²⁰ Izake yamba kuli mwanenyi ngwenyi, Mwanami kuchi wayiwana chocho nikawashi? Iye yamba ngwenyi, Mumu Yehova Zambi ye yangukunjikayo.

²¹ Izake yamba kuli Yakomba ngwenyi, Kundama mwanami, ngukuvwavwate kama nyi uli mwanami Esau mwene, nyi ka.

²² Yakomba yakundama kuli tato Izake, yamuvwavwata. Tato yamba ngwenyi, Liji te lia Yakomba, alioze moko a Esau.

²³ Iye kamunyingikine mumu moko jenyi te a wonawona ngwe moko a Esau. Kashika yamuwahisa.

²⁴ Yamuhula ngwenyi, Uli mwanami Esau mwene? Iye yakumbulula ngwenyi, Mba, yami mwene.

²⁵ Ngwenyi, Kundama nayo, ngukalie yifwo ya mwanami, hanga mbunge yami yikuwahise. Mba yakundama nayo yalia. Yamunehena vinyu, yanwa.

²⁶ Tato Izake yamba ngwenyi, Kundama haliapwila mwanami ungwehe mbeju.

²⁷ Yakundama, yamwaha mbeju. Tato yamwivwa vumba lia mazalo jenyi, yamuwahisa ngwenyi, Ivwenu, vumba lia mwanami Liapwa ngwe vumba lia musenge uze hanauwahisa kuli Yehova.

²⁸ Zambi akwehe mume wa mwilu, Ni maji a hashi, Ni kulumbama cha chivwale ni vinyu.

²⁹ Minyachi akakuvumbike. Mavungu akafulamane kuli yena. Ukapwe mwene helu lia usoko we. Ana ja noko akafulamane kuli yena. Mweswe makushinga neye akashingiwe, Mweswe makuwahisa neye akawahe.

³⁰ Chapwile muze Izake hamana kuwahisa Yakomba, Yakomba te machikatuka kumeso ja tato Izake, kumanyi yayo Esau yakatuka ku kuzomba chenyi.

³¹ Neye nawa yateleka kulia chiyema, yachineha kuli tato, yamba kuli tato ngwenyi, Tata achihinduka ukalie yifwo ya mwané hanga mbunge ye yikanguwahise.

³² Tato Izake yamba kuli iye ngwenyi, Yena iya? Iye yakumbulula ngwenyi, Yami Esau mwané wa mukulwana.

³³ Mba Izake yachikima kuhiana, yamba ngwenyi, Mba iya yoze handa yifwo, hangunehenayo? Hinayilia shimbu yena kanda wiza, hinamuwahisa, pundu kumakawaha.

³⁴ Muze Esau hevwa maliji a tato yalila ni muteto unene wa chinyengo. Yamba kuli tato ngwenyi, Yami nawa, tata unguwahise yami!

³⁵ Alioze iye ngwenyi, Mwanakwenu haneza ni kalimba-limba, yatambula uwape we.

³⁶ Esau yamba ngwenyi, Jina lienyi Yakomba te kuliamutele nyi? Mumu kaali hangulimbula. Yangutambula wata wami, ni haliapwila hangutambula uwape wami. Yahula nawa ngwenyi, Alioze kwafungile uwape umwe hali yami nyi?

³⁷ Izake yamba kuli Esau ngwenyi, Hinamupwisa mwene we, usoko wenyi eswe akapwe ngamba jenyi. Namukolesa ni chivwale ni vinyu. Kashika kuchi mungukulinga yena mwanami?

³⁸ Esau yamba kuli tato ngwenyi, Tata, te uwape umuwika uli nawo? Ni yami nawa unguwahise yami tata. Chocho yateta ni liji linene nikulila.

³⁹ Tato Izake yamukumbulula, yamba ngwenyi, Ku maji a hano hashi mukatwama, Ku mume wa mwilu nawa.

⁴⁰ Kumukamona mwono ku tachi ja katana ke. Alioze kumukavumbika mwanakwenu. Hindu muze mukatusuka Mukalishatununa kanga yenyi ku kota ye.

⁴¹ Esau wavwilile kole Yakomba mumu ha uwape uze tato hamuwahisa nawo. Yamba mu mbunge ngwenyi, Matangwa a kulila tata hakamwihi ali, mba mungushiha mwanakwetu Yakomba.

⁴² Maliji a mwanenyi mukulwana Esau yaheta kuli Rebeka, kashika yatuma kusanyika mwanenyi kanuke Yakomba. Yamba kuli iye ngwenyi, Tala, yayenu Esau kanalilembejeka ha kutwala kuli yena, kanafupu kukushiha.

⁴³ Kashika mwanami ivwa liji liami, katuka ukachinyine kuli ndumbwami Lapane mu Harane.

⁴⁴ Utwame nenyi matangwa amwe ndo ufwatulo wa yayenu hiwatuluka.

⁴⁵ Ndo utenu wa yayenu muutewuluka kuli yena, akavulame chize hiwamulinga, mba mungukatuma ngukakusake kuze. Mumu kuchi te mungunuyindama eswe ni aali tangwa limuwika?

⁴⁶ Mba Rebeka yamba kuli Izake ngwenyi, Mwono wami wangusekela mumu hali ana ja Hete ja mapwo. Nyi Yakomba mambata pwo wa kuli ana ja Hete ngwe wano akwa chifuchi, mwono wami muungupemena kuchi?