Ubutukilo 25 - MUKANDA USANDU WA ZAMBI 1975

¹ Apalahama yambata pwo weka, jina lienyi Ketura.

² Iye wamusemenene Simira, ni Yokashane, ni Mindane, ni Mindiane, ni Isapake, ni Shua.

³ Yokashane yasema Shipa ni Ndetane. Ana ja Ndetane a malunga wano, Ashurina, ni Letushine, ni Leumine.

⁴ Ana ja Mindiane a malunga wano, Efwa, ni Efwe, ni Hanoke, ni Apita, ni Elitaha. Wano eswe te ana ja Ketura.

⁵ Apalahama wahanyine upite wenyi weswe kuli Izake.

⁶ Alioze kuli ana ja *akonkubina jenyi, aze Apalahama atambwile, Apalahama, shimbu achili ni mwono yaaha yawana, yaatuma akatuke kuli Izake akaye ku Chivumbuko.

⁷ Matangwa a miaka ya mwono wa Apalahama wano, kulakaji lia miaka ni makumi shimbiali a miaka ni miaka yitano.

⁸ Apalahama yecha mwono wenyi, yafwa ni ukulwana upema; mukulwana wa miaka yinji. Chocho amutwalile kuli atu jenyi.

⁹ Mba ana jenyi Izake ni Ishemali amufunjile mu chivwenge cha Makapela mu musenge wa Efrone mwana wa Zohare Ka-Hete, uze uli kulutwe lia Mamare.

¹⁰ Musenge uze Apalahama walanjile kuli ana ja Hete, kwenako afunjile Apalahama hamwe ni pwo lienyi Sara.

¹¹ Kulutwe lia kufwa cha Apalahama Zambi wawahishile mwanenyi Izake. Izake Watwamine ku Mbia-ha-rohi.

¹² Yisemuko ya Ishemali mwana wa Apalahama, yoze amusemene kuli Hekare Ka-Engitu ndungo ya Sara, yino.

¹³ Wano e majina ja ana ja Ishemali ku majina jo nikulita ni yisemuko yo. Mutangu wa Ishemali Nepayote, ni Keta, ni Alipele, ni Misame,

¹⁴ ni Mishama, ni Nduma, ni Masa,

¹⁵ ni Hadare, ni Tema, ni Yeture, ni Nafwishi, ni Ketema.

¹⁶ Wano e ana a Ishemali ni wano e majina jo nikulita ni yihunda yo ni yilombo yo. Kumi lia mianangana ni mianangana aali nikulita ni mavungu jo.

¹⁷ Ni yino ye miaka ya mwono wa Ishemali, kulakaji lia miaka ni makumi atatu a miaka ni miaka shimbiali. Chocho iye yecha mwono wenyi, yafwa, yamutwala kuli atu jenyi.

¹⁸ O atungile chize ku Havila ndo ku Shure kumeso ja Engitu mu jila ya kuya ku Asuria. Yatwama hatalanganyi ni atu jenyi eswe.

¹⁹ Yisemuko ya Izake mwana Apalahama yino. Apalahama yasema Izake.

²⁰ Izake yapwa ni makumi awana a miaka muze ambachile Rebeka mwana Mbetule Ka-Seria wa ku Panda-narame, ndumbwa Lapane Ka-Seria.

²¹ Izake walembelele mukwo-pwo kuli Yehova mumu iye mumba. Yehova wamuvwile, mba Rebeka yaka ufumba.

²² Ana alitachikile mu jimo lienyi chocho yamba ngwenyi, Nyi chapwa chamwenemwene, kuchi te napwa Chichize? Mba yaya achihule kuli Yehova.

²³ Yehova yamba kuli iye ngwenyi, Mavungu aali atwama mu jimo lie, Minyachi yiali malihandununa chize ku jimo lie. Akwa munyachi umwe makumba akwa munyachi ukwo ni tachi. Mukulwana mavumbika kanuke.

²⁴ Muze matangwa jenyi hamanunuka akakwate, kumanyi mu jimo ana-apasa.

²⁵ Mutangu yasemuka muchila, mujimba weswe ngwe mazalo a wonawona. Yamuluka jina lienyi, Esau.

²⁶ Kulutwe yasemuka mwanakwo, kwoko lienyi te linakwata ku kashijino ka Esau. Yamuluka jina lienyi, Ya-komba. Izake te hapwa ni makumi asambano a miaka muze mukwo-pwo yamusemeno.

²⁷ Muze ana-malunga hatatuka Esau iye chinyanga, mukwa kwenda mu yambu, Yakomba iye chihomboloji, yatwama ku mbalaka.

²⁸ Izake wazangile Esau mumu ha kulialia yifwo yenyi. Alioze Rebeka wazangile Yakomba.

²⁹ Yakomba yateleka makunde, mba Esau yakatuka mu yambu, hijamuhwa.

³⁰ Esau yamba kuli Yakomba ngwenyi, Ngunaliumbu, ngulie makunde je achila mumu hijanguhwa. Kashika amulukile jina ngwo, Endome.

³¹ Yakomba yamba ngwenyi, Uliange kungulanjisa wata we.

³² Esau yamba ngwenyi, Ngunafu lume, wata muukangukwasa?

³³ Yakomba yamba ngwenyi, Uliange kulishinga kumeso jami. Chocho yalishinga kuli iye; yalanjisa wata wenyi kuli Yakomba.

³⁴ Yakomba yahana kuli Esau mbolo ni mutato wa makunde. Yalia, yanwa, yakatuka, yaya kwenyi. Chocho Esau yalelesa wata wenyi.