Ubutukilo 24 - MUKANDA USANDU WA ZAMBI 1975

¹ Apalahama wapwile mukulwana, miaka yenyi hiyoka. Yehova te hawahisa Apalahama mu yuma yeswe.

² Apalahama yamba kuli ndungo yenyi, mwe mukulwana ku zuwo lienyi, yoze wayulile yuma yeswe apichile, ngwenyi, Mwane, sako kwoko lie kushi lia shina lia kulu liami.

³ Ndo mulishinga ni jina lia Yehova Zambi ya mwilu kanda Zambi ya hashi ngwami, Mwanami kuchi kumumbachisa pwo wa kuli A-Kanana wano natwama no.

⁴ Alioze mukaya ku chifuchi chami, kuli usoko wami ukasakile pwo mwanami Izake.

⁵ Mwe ndungo yamba ngwenyi, Hanji pwo kechi kuzanga kungukaula ndo ku chifuchi chino. Nyi chocho changutamba kutwala mwané ku chifuchi wakatukile nawa, nyi?

⁶ Apalahama yamwamba ngwenyi, Ukanyama mwanami kanda ukamutwalako nawa.

⁷ Yehova, Zambi ya mwilu, yoze wanguchijile ku zuwo lia tata ku chifuchi kuze nasemukinyine, yoze wahanjikile ni yami, washingile kuli yami ngwenyi, Ku munyachi we mungukahana chifuchi chino, iye kumakatuma mungelo wenyi kulutwe lie mba kwenako mukasakila pwo mwanami.

⁸ Nyi mwe pwo kechi kuzanga kukukaula mba yena kumukasamba ku shingo lino lia yami. Chuma chimuwika kanda ukatwalako mwanami.

⁹ Chocho mwe ndungo yasa kwoko lienyi kushi lia shina lia kulu lia kakó Apalahama yalishinga ha kutwala ku chino chuma.

¹⁰ Mwe ndungo yanda kumi lia tumelu a ku tumelu ja kakó, yakatuka, se iye kali ni upite weswe wa kakó mu kwoko lienyi. Yakatuka, yaya ku Mesopotamia ku chihunda cha Nehore.

¹¹ Yazondamisa tumelu haze lia chihunda ku shima lia meya ha chingoloshi haze mapwo akuya mukutaha meya.

¹² Yamba ngwenyi, Yehova, Zambi ya mwata wami Apalahama, ngunaliumbu unguwahise musono, ukalweze utu wa zango kuli mwata wami Apalahama.

¹³ Kuno ngunamana ku fuji lia meya. Ana a mapwo ja akwa limbo meza mukutaha meya.

¹⁴ Mwe mwana-pwo yoze mungwamba ngwami, Ngunasakwila tula mulondo we ngunwe, mba iye mamba ngwenyi, Nwenu, mungunwisa tumelu twenu nawa, akapwe mwenawo hiwamutongola hali kavumbi ke Izake. Chocho mungunyingika ngwami, Hiwalweza utu wa zango lie kuli mwata wami.

¹⁵ Kwapwile shimbu kanda achimana kuhanjika kumanyi Rebeka, yoze wasemukine kuli Mbetule mwana wa Milika pwo lia Nehore yayo ya Apalahama kaneza ni mulondo wenyi ha chipaya.

¹⁶ Mwe mwana-pwo wapemene chikolo ku meso, iye virgem se kanda achilimona ni lunga. Yapalumuka ku fuji lia meya, yazalisa mulondo wenyi, yakanduka.

¹⁷ Ndungo ya Apalahama yazomboka mukumupatwiza, ngwenyi, Ngunasakwila, ungwehe amwe meya a mu mutondo we ngunwe.

¹⁸ Iye yamba ngwenyi, Nwenu mwane. Yatambuka, yaheteka mutondo ha kwoko, yamwaha meya.

¹⁹ Muze te hamwaha meya yamba ngwenyi, Mungutahila tumelu twe nawa, ndo mamana kunwa.

²⁰ Yatambuka, yapukumwina mutondo wenyi mu chingolongolo, yazomboka nawa ku shima, yatahila tumelu twenyi eswe.

²¹ Mwe lunga kanamuhulikila meso, kulungunga, akanyingike nyi Yehova hawahisa jila yenyi, nyi ka.

²² Kwapwile muze te tumelu hamana kunwa, mwe lunga yachiza kazeya ka oru ya pezu ya ha muchima, ni yijingo yiali ya oru ya kusa ha moko jenyi, ya kumi lia pezu.

²³ Yamba ngwenyi, Ngunasakwila, ungwambulwile kama, yena uli mwana waya? Chikwo nawa mutuwana muhela mu zuwo lia tatenu tukatwamemo nyi?

²⁴ Iye yamba kuli lunga ngwenyi, Yami nguli mwana wa Mbetule yoze Milika wamusemene kuli Nehore.

²⁵ Yamba nawa ngwenyi, Mwambu ni ya kulia ya tumelu tuli nacho, ni kuze muhasa kutwama.

²⁶ Mwe lunga yahetamisa mutwe wenyi, yawayila Yehova,

²⁷ nikwamba ngwenyi, Yehova akafumane Zambi wa mwata wami Apalahama yoze kambilile keke yenyi hanji umwenemwene wenyi ha kutwala kuli mwata wami. Ni yami nawa Yehova hangusongwela mu jila ku zuwo lia usoko wa mwata wami.

²⁸ Mba mwe mwana-pwo yazomboka, yambulwila akwa zuwo lia naye nikulita ni maliji wano.

²⁹ Rebeka kali ni ndumbwenyi jina lienyi Lapane. Lapane yazomboka kuze lunga anamana ku fuji lia meya.

³⁰ Mba muze amwene kazeya ni yijingo ha moko ja ndumbwenyi, yevwa nawa maliji a ndumbwenyi Rebeka akwamba ngwenyi, Chocho amba mwe lunga kuli yami, iye yaheta kuli mwe lunga, kumanyi kanamana hamwe ni tumelu ku fuji lia meya.

³¹ Yamba ngwenyi, Njila, yena kuwawaha kuli Yehova, kuchi te unamana haze? Mumu hinalulika zuwo. Muhela hali tumelu nawa kuuli.

³² Chocho lunga yanjila mu zuwo mba iye yajitula tumelu, yahana mwambu ni ya kulia kuli tumelu, ni meya a kusana ku molu ni ku molu ja malunga waze wejile no.

³³ Amuhele nawa kulia. Alioze iye yamba ngwenyi, Chichi kulia ndo hinalumbununa chize ngunendela. Yamba ngwenyi, Hanjikenu.

³⁴ Iye ngwenyi, Ami nguli ndungo ya Apalahama.

³⁵ Yehova iye hanawahisa mwata wami chikolo, hapwa munene. Hanamwehe matanga a mapanga ni a ngombe, ni prata, ni oru, ni ndungo ja malunga, ni ja mapwo, ni tumelu ni yimbulu.

³⁶ Mba Sara, mukwo-pwo wa mwata wami yasema mwana wa lunga kuli mwata muze te hapwa mukulwana. Kuli mwanenyi Apalahama hahana yuma yeswe apita.

³⁷ Mwata yangushingisa ngwenyi, Mwanami kuchi kumusakila pwo hakachi ka ana ja A-Kanana natwama mu chifuchi cho.

³⁸ Alioze muoya kuli munyachi wa tata kuli usoko wami, ukasakile pwo mwanami.

³⁹ Ami yingwamba kuli mwata ngwami, Hanji pwo kechi kungukaula.

⁴⁰ Iye yamba kuli yami ngwenyi, Yehova, yoze kumeso jenyi nakwenda, iye kumakatuma mungelo wenyi hamwe ni yena mukuwahisa wenyi we. Kumukasakila pwo mwanami wa kuli usoko wami, ku munyachi wa tata.

⁴¹ Chocho mushinguluka ku shingo liami, muze muheta kuli usoko wami. Nyi kakuheleye mba mushinguluka ku shingo liami.

⁴² Mba musono nahetanga ku fuji lia meya, nambanga ngwami, Yehova Zambi ya mwata wami Apalahama, nyi unawahisa jila yami ngunendela;

⁴³ tala, ngunamana kuno ku fuji lia meya. Chikapwe mwe mwana-pwo yoze meza mukutaha meya, mungwamba ngwami, Ngunasakwila ungwehe amwe meya a mu mutondo we ngunwe;

⁴⁴ neye mamba ngwenyi, Ni yena nwako mba mungutahila nawa tumelu twe, mwenawo lume akapwe yoze Yehova hanatongola hali mwana wa mwata wami.

⁴⁵ Shimbu kanda nguchimana kuhanjika chocho mu mbunge yami, kumanyi Rebeka kaneza ni mutondo wenyi ha chipaya. Yaya ku fuji lia meya, yataha. Mba namba kuli iye ngwami, Ngunasakwila, pe kama meya ngunwe.

⁴⁶ Yatambuka, yachiza mutondo wenyi ha chipaya, yamba ngwenyi, Nwenu, mba mungunwisa tumelu nawa. Chocho nanwanga mba iye hanwisa tumelu nawa.

⁴⁷ Namuhula ngwami, Yena uli mwana waya? Aye ngwenyi, Yami mwana wa Mbetule wa Nehore yoze Milika wamusemenene. Chocho namusanga kazeya ha zulu ni yijingo ha moko jenyi.

⁴⁸ Nahetamisanga mutwe wami nikuwayila Yehova, nikufumanyisa Yehova, Zambi ya mwata wami Apalahama, yoze wangusongwelele mu jila yamwenemwene ngukasake mwana wa yayo ya mwata wami akapwe pwo lia mwanenyi.

⁴⁹ Haliapwila nyi nunazange kulinga ni utu ni umwenemwene ni mwata wami, nungwambulwile, nyi ka, nungwambulwile hanga ngukatalikise hanji ku chindume hanji ku chimeso.

⁵⁰ Lapane ni Mbetule yakumbulula ngwo, Chino chuma kuli Yehova chinakatuka. Etu kutuchi kuhasa kwamba nichimwe, hanji chipi, hanji chipema.

⁵¹ Tala Rebeka kwali kumeso je, umutambule, uye nenyi akapwe pwo lia mwana wa mwata we, chizechene ngwe Yehova hanambe.

⁵² Kwapwile muze ndungo ya Apalahama hevwa maliji jo yahetamina hashi kuli Yehova.

⁵³ Mwe ndungo yachiza yuma ya oru ni yuma ya prata ni mazalo, yayihana kuli Rebeka. Kuli ndumbwenyi ni naye yahana nawa upite wa ndando yinene.

⁵⁴ Chocho yalia, yanwa, iye ni malunga waze ejile no, yapomba. Chimenemene yahinduka ngwenyi, Ngushikenu nguye kuli mwata wami.

⁵⁵ Alioze ndumbwenyi ni naye yamba ngwo, Mwe mwana achitwame ni yetu matangwa amwe, hanji kumi, mba kulutwe maya.

⁵⁶ Iye yamba ngwenyi, Kanda nungukwika, se Yehova hawahisa wenyi wami. Ngushikenu nguye kuli mwata wami.

⁵⁷ O ngwo, Mutusanyika mwe mwana tuchimuhule ku kanwa lienyi.

⁵⁸ Chocho yasanyika Rebeka, yamuhula ngwo, Kumuoya ni yono, nyi? Iye yamba ngwenyi, Kumunguya.

⁵⁹ Yashika ndumbwo Rebeka, ni ndeji yenyi, ni ndungo ya Apalahama, ni malunga jenyi.

⁶⁰ Yawahisa Rebeka ngwo, Ndumbwetu ukapwe semi ya tununu ni makumi a tununu. Munyachi we akazuke chajilo cha akwa kole jo.

⁶¹ Mba Rebeka yakatuka hamwe ni tuvumbi twenyi a mapwo, yenda ha tumelu akakaule mwe lunga. Chocho mwe ndungo yatambula Rebeka, yaya mu jila yenyi.

⁶² Izake machiza ku Mbia-ha-rohi, te kanatwama ku Negeve.

⁶³ Izake yaya mu yambu ha chingoloshi akapukune. Yahetula meso jenyi, yamona kumanyi tumelu kaneza.

⁶⁴ Rebeka neye yahetula meso jenyi, yamona Izake, mba yasunuka ha kamelu.

⁶⁵ Yamba kuli ndungo ngwenyi, Auze lunga iya aneza mu yambu mukutupatwiza? Ndungo ngwenyi, Au mwe mwata. Pwo yanda wanda akalifuke.

⁶⁶ Ndungo yambulwila Izake yuma yeswe hanalingi.

⁶⁷ Mba Izake yatwala Rebeka mu mbalaka ya naye Sara, yamumbata yapwa pwo lienyi. Izake wamuzangile, walilembejekele nenyi ha kufwa cha naye.