Ubutukilo 23 - MUKANDA USANDU WA ZAMBI 1975

¹ Sara watwamine ni mwono kulakaji lia miaka ni makumi aali a miaka ni miaka shimbiali, ye miaka ya mwono wa Sara yenayo.

² Mba Sara wafwile mu Kiriate-Arpa (likwo ngwo, Heprone) mu chifuchi cha Kanana. Mba Apalahama yeza mukulinyenga mumu hali Sara, nikumulila.

³ Apalahama yakatuka kumeso ja mufu wenyi, yamba kuli ana ja Hete ngwenyi,

⁴ Nguli chilambala, nguli njize hakachi kenu, ngwehenu chihela chimwe chikapwe chifuka hanga ngukafunde afu jami kumeso jami.

⁵ Ana ja Hete yakumbulula kuli Apalahama ngwo,

⁶ Panjikenu mwanangana. Nuli swana wa Zambi hakachi ketu. Kweswako munutongola hakachi ka mafuka jetu, fundenu afu jenu. Niumwe hakachi ketu manumina fuka lienyi hanga nukafunde afu jenu.

⁷ Apalahama yakatuka, yalihetamina kumeso ja enya chifuchi, kuli e ana ja Hete.

⁸ Yalishimwinya no ngwenyi, Nyi nunatá ngukafunde mufu wami kumeso jami, ngwivwenu, nunguhakwile kuli Efrone mwana wa Zohare.

⁹ Akangwehe chivwenge cha Makapela ali nacho, chatwama ku songo lia musenge wenyi. Akangwehecho hakachi kenu ngukachipite ha chifuka, ngumufwete ye ndando yeswe.

¹⁰ Efrone te kanatwama hakachi ka ana ja Hete, mba Efrone mwe Ka-Hete yakumbulula kuli Apalahama mu matwi ja ana ja Hete, waze eswe te anatwama mu chikolo cha limbo ngwenyi,

¹¹ Hi chocho ko, mwanangana, ngwivwenu. Ni we musenge ngunanwehewo, ni che chivwenge ngunanwehecho. Kumeso ja ana ja atu jami ngunanweheyo. Fundenu mufu wenu.

¹² Apalahama yalihetamina kumeso ja enya chifuchi.

¹³ Yamba kuli Efrone mu matwi ja enya chifuchi ngwenyi, Alioze nyi mutá, ngunaliumbu ungwivwe. Mungukwaha ndando ya musenge. Ungutambuleyo mba mungufundako mufu wami.

¹⁴ Efrone yakumbulula kuli Apalahama ngwenyi,

¹⁵ Mwanangana, panjikenu kuli yami. Kachipinji ka mavu kafwika makulakaji awana a shekele ja prata, te chimwe hakachi ka yami ni yena, nyi? Kashika fundenu mufu wenu.

¹⁶ Mba Apalahama yapanjika kuli Efrone. Apalahama yapezalisa kuli Efrone je prata jize te havuluka mu matwi ja ana ja Hete; makulakaji awana a shekele ja prata. Mbongo akulanda najo akwa yitanda.

¹⁷ Chocho musenge wa Efrone uze watwama mu Makapela kulutwe lia Mamare, ni we musenge, ni chivwenge chize chilimo, ni mitondo yeswe yili mu musenge, mu njiza mweswe mwakujingilika, ayikolesele

¹⁸ kuli Apalahama yikapwe niyenyi, kumeso ja ana ja Hete kumeso ja eswe anjilile ku chikolo cha limbo lienyi.

¹⁹ Mba muze hamana ayo yeswe, Apalahama yafunda mukwo-pwo Sara mu chivwenge mu musenge wa Makapela kulutwe lia Mamare (likwo ngwo, Heprone) mu chifuchi cha Kanana.

²⁰ Ni we musenge, ni chivwenge chamo ayikolesele kuli Apalahama yikapwe niyenyi, ha fuka kuli ana ja Hete.