Ubutukilo 2 - MUKANDA USANDU WA ZAMBI 1975

¹ Chocho mwilu ni hashi yayimanuna, ni chizavu chayo cheswe.

² Ha tangwa liamuchishimbiali Zambi yamanuna milimo yenyi yize alingile, mba ha tangwa liamuchishimbiali yahwima ku milimo yenyi yeswe yize alingile.

³ Zambi yawahisa tangwa liamuchishimbiali, yalisela lisandu, mumu ha lienalio yahwima ku milimo yenyi yeswe yize Zambi atangile ni yize alingile.

⁴ Yisemuko ya mwilu ni hashi yino ha tangwa lize Yehova Zambi yalinga mwilu ni hashi.

⁵ Ni mitondo yeswe ya mu mavu shimbu kanda yipwa hashi, ni yiputa yeswe ya mu mavu shimbu kanda yisoka, mumu Yehova Zambi kanda anokesa vula hashi, chipwe mutu keshiko yoze machipa mavu.

⁶ Alioze kwakakumukine mbundu hashi nikutuchikisa heswe ha mavu.

⁷ Yehova Zambi yawumba mutu wa ku fufuta ya mavu, yahwima mu mazulu jenyi mwiku wa mwono mba mutu yapwa mukwa mwono.

⁸ Yehova Zambi yatumba munda ku chivumbuko, mu Endene, mwenamo asele mutu yoze awumbile.

⁹ Mba ku mavu Yehova Zambi yasokesa mitondo yeswe yipema ku meso, ni yize yipema ya kulia; mutondo wa mwono nawa mukachi ka munda, ni mutondo wa chinyingi cha chipema ni chipi.

¹⁰ Lwiji yakatuka ku Endene mukutuchikisa munda, mba ku kuze yalipula njiji jiwana.

¹¹ Jina lia lwiji mutangu Pishone, mwenawo wajingilika chifuchi cheswe cha Havila kuze kwatwama oru.

¹² Oru yize yipema chikolo. Kuli nawa ndeliume ni mawe a sardonica.

¹³ Jina lia lwiji wamuchiali Ngehone, mwenawo wajingilika chifuchi cheswe cha Kushe.

¹⁴ Jina lia lwiji wamuchitatu Hidekele, mwenawo wapalika ku Chivumbuko ku Asuria. Lwiji wamuchiwana Ufrateze.

¹⁵ Mba Yehova Zambi yatwala mwe mutu, yamusa mu munda wa Endene mukuulima nikuufunga.

¹⁶ Yehova Zambi yamba kuli mwe mutu ngwenyi, Ku mitondo yeswe ya mu munda muhasa kulia chawana,

¹⁷ alioze ku mutondo wa chinyingi cha chipema ni chipi, kanda uliako, mumu ha tangwa muoliako kumukafwa lume.

¹⁸ Mba Yehova Zambi yamba ngwenyi, Kuchapemene mutu akatwame ukawenyi, mungumulingila chikwashi yoze malita nenyi.

¹⁹ Ku mavu Yehova Zambi yawumba tushitu eswe a mu yambu, ni tujila eswe a mu tetela, yaaneha kuli mwe mutu akamone chize maaluka. Lieswalio mutu alukile kashitu ni kashitu, lienalio jina lienyi.

²⁰ Mutu yaluka majina yimuna eswe, ni tujila a mu tetela, ni tushitu eswe a mu yambu, hindu hali mwe mutu kawanyine niumwe chikwashi yoze walita nenyi.

²¹ Yehova Zambi yatuma tulo anji kuli mwe mutu akaye tulo, mba yanda umwe lupachi wenyi, yanungisa yifwo kumusalakana,

²² mba mwe lupachi yoze Yehova Zambi yachiza kuli mutu yamulinga pwo, yamuneha kuli mwe mutu.

²³ Mba mutu yamba ngwenyi, Yono chifwaha cha ku yifwaha yami; musunya wa ku musunya wami; Yamuluka jina ngwenyi, Pwo, mumu yamuchiza kuli Lunga.

²⁴ Kashika lunga mahichika tato ni naye akalalaminye kuli mukwo-pwo, mba kumapwa musunya umuwika.

²⁵ O eswe aali apwile ni uselesele, ni lunga ni mukwo-pwo, hindu kevwile sonyi.