Ubutukilo 19 - MUKANDA USANDU WA ZAMBI 1975

¹ Angelo aali yaheta ku Sondome ha chingoloshi, Lote te kanatwama mu chikolo cha Sondome. Lote yaamona, yakatuka aapatwize, yahetamina hashi.

² Yamba ngwenyi, Ene jami, ngunaliumbu, kondolokelenu ku zuwo lia yami kavumbi kenu nutwamemo Ufuku. Nusane ku molu, mba munukahinduka, nukaye jila yenu. O yamba ngwo, Ka, haze mutupomba ufuku.

³ Alioze waashinjile chikolo, kashika yakondolokela kuli iye, yanjila mu zuwo lienyi. Iye waatelekelele kulia, yaochela mbolo kuyishi futunwiso, mba yalia.

⁴ Alioze shimbu kanda achipomba malunga a mu chihunda cha Sondome yaseleka zuwo, ni twanuke ni makulwana, atu eswe a ku sali ni sali.

⁵ Yatambika kuli Lote ngwo, Malunga aze ezanga kuli yena ha ufuku kulihi ali? Utuneheno haze tukalimone no.

⁶ Lote yatuhuka kuli ayo ku chikolo. Yajila pito kunyima yenyi.

⁷ Yamba ngwenyi, Ngunaliumbu akwetu, kanda nulinga ungulungulu upwa haha.

⁸ Alioze nguli ni ana aali a mapwo kanda achilimona ni malunga. Ngunaliumbu ngukanuneheno haze, mba cheswacho chanupemena ku meso jenu hilingenu no. Alioze kanda nulinga nichimwe kuli wano malunga, se hapwa ngeji jami.

⁹ Alioze o ngwo, Katukako. Chikwo nawa ngwo, Yono umuwika wejile kuno kutwama njize, haliapwila halitenga mukwa kuyula. Haliapwila mutukulinga chipi chahiana chize twambanga kulinga ni waze akwo. Chocho amushinjikile chikolo, mwe Lote. Te kwasala hakehe kupula pito.

¹⁰ Alioze malunga atuhwishile kwoko, yakoka Lote muchima lia zuwo kuli ayo, yajila pito.

¹¹ Yalamba nawa malunga aze amanyine ku chikolo cha zuwo yaapwisa tupuputa ni akepe ni anene. Chocho alikatalishile kuwana chikolo.

¹² Mba malunga yamba kuli Lote ngwo, Atu akwo nawa uli no helu lia wano nyi? Atatenu-weno, ni ane a malunga, ni ane a mapwo, mweswawo uli nenyi mu limbo ukamuchizemo.

¹³ Mumu mutwonwona limbo lino ha mukunda lufuma wo wahiana kumeso ja Yehova, mba Yehova hatutuma mukulionwona.

¹⁴ Chocho Lote yatuhuka, yahanjika ni atato-weno waze hatenda anenyi a mapwo ngwenyi, Katukenu, nutuhuke muno mumu Yehova monwona limbo lino. Alioze o yamumona ngwe lwelia anahanjika.

¹⁵ Mba muze hikwacha angelo apupwishile Lote ngwo, Katuka utwale mukwenu-pwo ni ane aali a mapwo uli no kuno kuchina manonga mu uhenge wa limbo.

¹⁶ Hindu machilaluka, mba malunga yamukwata ku kwoko lienyi, ni kwoko lia mukwo-pwo, ni moko ja anenyi a mapwo se Yehova keke yinji anamuvwila. Chocho yamuchiza, yamusa haze lia limbo.

¹⁷ Mba muze hamukatwisa hamuneha haze yamba ngwo, China, ulamwine mwono we. Kanda utala kunyima. Kanda ulaluka mu chana. Chinyina ku mulundu kuchina mununonga.

¹⁸ Lote yamba kuli ayo ngwenyi, Ka, hi chocho ko, mwene wami.

¹⁹ Tala haliapwila yami kavumbi kenu hinawana vumbi kumeso jenu, hinwokesa keke yino nwangulweza ha kungulamwina mwono wami. Chahashile kuchinyina ku mulundu kuchina chipi muchinguwana ngukafwe.

²⁰ Talenu limbo lino kuliapwa hakamwihi kuchinyinamo. Te kalimbo kakepe. Mala! ngutayize kama nguchinyinemo (te hi kakepe ko nyi?) chocho mbunge yami muyimona mwono.

²¹ Iye yamwamba ngwenyi, Ngunakutayiza ha chuma chino nawa. Chichi kwonwona limbo lino hiwamba.

²² Tambuka. Chinyinako, mumu chahashile kulinga nichimwe ndo hiwachinyinako. Kashika yaluka limbo lize jina lialio, Zoare.

²³ Tangwa hiliavumbuka kulu hashi muze Lote yanjila mu Zoare.

²⁴ Mba Yehova yanokesa fundanga ni kahia ha Sondome ni Ngomora ya kuli Yehova kwilu.

²⁵ Yonwona membo aze ni chana cheswe, ni akwa membo eswe, ni yuma yeswe yasokele ha mavu.

²⁶ Alioze pwo lia Lote kanende kunyima yenyi, iye yatala kunyima, mba yalumuka nguji lia mungwa.

²⁷ Apalahama ha chimenemene mbwi yakanduka kuze anakamana kumeso ja Yehova.

²⁸ Yatala ku Sondome ni Ngomora, ni ku chifuchi cheswe cha chana. Kumanyi mwishi wa chifuchi unafwinji ngwe mwishi wa lutengo.

²⁹ Chocho chapwile muze Zambi yonwona membo a ha chana Zambi yewuluka Apalahama, yakatwisa Lote hakachi ka kwonwona shimbu onwene membo muze mwatwamine Lote.

³⁰ Mba Lote yakatuka ku Zoare, yatwama ku milundu hamuwika ni anenyi aali a mapwo, te woma anevu wa kutwama mu Zoare. Watwamine mu chivwenge, iye ni anenyi aali a mapwo.

³¹ Mba mukulwana yamba kuli kanuke, ngwenyi, Tata hapwa mukulwana, mba lunga wakuhi niumwe hano hashi yoze manjila kuli yetu nikulita ni ndako ya hashi heswe.

³² Kashika tuye tukamunwise vinyu, tukapombe nenyi, hanga tukafunge munyachi wa tata.

³³ Chocho anwishine vinyu tato ufuku uze, mba mukulwana yanjila, yapomba ni tato. Iye kanyingikine chipwe muze yapomba chipwe muze yahinduka.

³⁴ Mba mu kucha mukulwana yamba kuli kanuke ngwenyi, Tala, napombanga ni tata. Tumunwise vinyu musono nawa, mba njila yena ukapombe nenyi, hanga tukafunge munyachi wa tata.

³⁵ Chocho yanwisa vinyu tato ufuku uze nawa mba kanuke yaya, yapomba nenyi. Alioze iye kanyingikine chipwe muze yapomba chipwe muze yahinduka.

³⁶ Chocho ana a Lote a mapwo eswe aali apwile ni ufumba wa kuli tato.

³⁷ Mukulwana yasema mwana, yamuluka jina ngwenyi, Moape. Iye kalamba ka A-Moape ndo musono.

³⁸ Kanuke nawa yasema mwana, yamuluka jina ngwenyi, Mben-ami. Iye kalamba ka ana ja Amone ndo musono.