Ubutukilo 18 - MUKANDA USANDU WA ZAMBI 1975

¹ Yehova yasoloka kuli iye ku mitondo ya Mamare, te kanatwama ku chikolo cha mbalaka yenyi ha chivukuminya cha tangwa.

² Yahetula meso jenyi ni kutala, kumanyi malunga atatu kanamana chichili kumeso jenyi. Muze haamona yazomboka mukwapatwiza ku chikolo cha mbalaka. Yahetamina hashi.

³ Yamba ngwenyi, Mwene wami, nyi nawana vumbi kumeso jenu kanda nukatuka kuli yami kavumbi kenu.

⁴ Ngunehe amwe meya akepe ngukasanyise yiliato yenu, nuchihwime mushi lia mutondo.

⁵ Munguneha kamwe kakulia nukalihuzulule mbunge jenu, mba kulutwe munuhiana, se hinweza kuli yami kavumbi kenu. O yamba ngwo, Linga chize hiwamba.

⁶ Apalahama yanjila fuji mu mbalaka kuli Sara, nikwamba ngwenyi, Lulika kawashi njongo jitatu ja wunga wafufunuka, ukauchike, ukalinge tumbolo.

⁷ Apalahama yazomboka ku tanga, yaneha mwana-ngombe mwovu, mupema, yamuhana kuli ngamba akalipupwise kumululika.

⁸ Yanda nawa maji a yamwa, ni yamwa, ni mwana-ngombe halulika, yayitumbika kumeso jo. Iye yamana hakamwihi no mushi lia mutondo shimbu machilia.

⁹ Yamba kuli iye ngwo, Mukwenu-pwo Sara kulihi ali? Ngwenyi, Mu mbalaka ali.

¹⁰ Iye yamba ngwenyi, Pundu kumungukeza nawa kuli yena muze kangonde makaheta nawa, mba mukwenu-pwo Sara makasema mwana. Sara te kanevuko ku chikolo cha mbalaka kunyima yenyi.

¹¹ Alioze Apalahama ni Sara te hapwa makulwana, miaka yo yoka, te ndako ya mapwo hiyalitwamina kuli Sara.

¹² Kashika Sara yaseha muchima ngwenyi, Muze hinapwa kashinakaji te mungwivwa kuwaha, ni mwata wami nawa kashinakaji, nyi?

¹³ Yehova yamba kuli Apalahama ngwenyi, Sara kuchi te anasehe ngwenyi, Te yami kashinakaji mungusema mwana?

¹⁴ Chuma chimwe muchipwa chikomokeso kuli Yehova nyi? Ha kangonde wa kutesa kumungwiza nawa kuli yena muze mwaka hiwaheta mba Sara makasema mwana.

¹⁵ Mba Sara yalikala ngwenyi, Chasehele. Mumu woma anevu. Alioze iye ngwenyi, Ka, waseha.

¹⁶ Mba malunga yakatukako, yatalikisa ku Sondome. Apalahama yaya no akaatwale mu jila.

¹⁷ Yehova yamba ngwenyi, Ngusweke kuli Apalahama chuma chino mungulinga nyi?

¹⁸ Se Apalahama makapwa vungu linene lia tachi, mba mavungu eswe a hashi makaawahisa muli iye.

¹⁹ Mumu hingunamunyingika hanga akayule ana jenyi ni munyachi wenyi kulutwe, akafunge jila ya Yehova akalinge ni ululi ni upatwilo, hanga Yehova akalinge kuli Apalahama yuma yize hamushindakenya.

²⁰ Mba Yehova yamba ngwenyi, Mumu lufuma wa Sondome ni Ngomora munene; shili yo yapiha naye,

²¹ munguhulumuka haliapwila ngukamone nyi pundu analingi nikulita ni lufuma wacho yoze wanguheta. Nyi ka, mungunyingika.

²² Mba malunga yakatukako, yatalikisa ku Sondome, alioze Apalahama kanamana hindu kumeso ja Yehova.

²³ Apalahama yakundama ngwenyi, Munongesa akwa ululi hamwe ni yingulungulu nyi?

²⁴ Hanji mwali makumi atano a akwa ululi mu chihunda. Munongesa chihunda nyi? Kuchi kuchivwila keke mumu hali e makumi atano a akwa ululi alimo nyi?

²⁵ Chikapwe kusuku ni yena kulinga chuma chipwa haha, ukashihe akwa ululi hamwe ni yingulungulu. Chocho akwa ululi mapwa ngwe yingulungulu. Ka, chikapwe kusuku ni yena. Te Chisopa-mulonga wa akwa hashi eswe kechi kulinga ni ululi nyi?

²⁶ Yehova yamba ngwenyi, Nyi munguwana mu Sondome makumi atano a akwa ululi muchima lia chihunda mungwecha chihunda cheswe mumu hali ayo.

²⁷ Apalahama yakumbulula ngwenyi, Haliapwila hinahamuka kuhanjika ni Mwene, yami nguli fufuta ni uto wika.

²⁸ Hanji atano mahona a makumi atano a akwa ululi. Munongesa chihunda cheswe mumu ha kuhona cha atano nyi? Iye yamba ngwenyi, Chipwe munguwana makumi awana a akwa ululi ni akwa ululi atano chichi kuchinongesa.

²⁹ Yamba kuli iye cheka nawa ngwenyi, Hanji mawanamo makumi awana. Iye ngwenyi, Chipwe ha makumi awana chichi kuchilinga.

³⁰ Iye yamba nawa ngwenyi, Mala! Mwene kanda utenuka ni yami, mba munguhanjika. Hanji mawanamo makumi atatu. Ngwenyi, Nyi munguwana makumi atatu, chichi kuchilinga.

³¹ Yamba ngwenyi, Tala, hinahamuka kuhanjika ni Mwene, hanji mawana makumi aali. Iye ngwenyi, Chipwe ha makumi aali chichi kuchilinga.

³² Ngwenyi, Mala! Mwene kanda utenuka, nguhanjike kamuwika nawa kunahu. Hanji mawanamo kumi. Iye ngwenyi, Chipwe ha kumi chichi kuchilinga.

³³ Mba Yehova yaya kwenyi muze te hamana kuhanjika ni Apalahama. Apalahama iye yahiluka ku mahienyi.