Ubutukilo 16 - MUKANDA USANDU WA ZAMBI 1975

¹ Serai pwo lia Apalama kamusemenene ana, alioze te kali ni ndungo umwe, Ka-Engitu, jina lienyi Hekare.

² Serai yamba kuli Apalama ngwenyi, Tala haliapwila Yehova hangujika ngoji. Ngunasakwila, uchinjile kuli ndungo yami wa pwo, hanji munguwana ana kuli iye. Mba Apalama wapanjikile liji lia Serai.

³ Chocho Serai pwo lia Apalama yanda ndungo yenyi Hekare Ka-Engitu yamuhana kuli mukwo-lunga Apalama akapwe pwo lienyi, muze te Apalama hatwama kumi lia miaka mu chifuchi cha Kanana.

⁴ Iye yanjila kuli Hekare, mba yaka ufumba. Muze hamona ngwenyi, Ufumba nguli nawo, mba watalile kakó ni kaleleso.

⁵ Serai yamba kuli Apalama ngwenyi, Chipi chami chikapwe hali yena; ami nahanyine ndungo yami wa pwo mu tulo ye, mba muze iye hamona ufumba kanangulelesa. Kashika Zambi akapatule hakachi ka yena ni yami.

⁶ Alioze Apalama yamba kuli Serai ngwenyi, Tala ndungo ye mu kwoko lie ali, linga nenyi cheswacho chinakupemena. Mba Serai yamupinjisa, chocho yamuchina.

⁷ Alioze mungelo wa Yehova yamuwana ku fuji lia meya mu puya, ku fuji lia meya mu jila ya kuya ku Shure.

⁸ Yamba ngwenyi, Ena Hekare ndungo ya Serai kulihi unakatuka? Kulihi unayi? Iye ngwenyi, Ngunachina kumeso ja kaka Serai.

⁹ Mungelo wa Yehova ngwenyi, Hiluka kuli kakenu ukamuzeyele.

¹⁰ Mungelo wa Yehova yamba kuli iye nawa ngwenyi, Mungwokesa akwa munyachi we, kechi kahasa kwaalula ha wunji wo.

¹¹ Mungelo wa Yehova yamba kuli iye nawa ngwenyi, Tala ufumba uli nawo. Kumukasema mwana wa lunga, ukamuluke jina lienyi, Ishemali, mumu Yehova hapanjika ku luyinda we.

¹² Kumakapwa ngwe chimbulu wa mu yambu hakachi ka atu. Kwoko lienyi mulikalimika ni akwo eswe, mba moko ja akwo eswe makalimika nenyi. Kumakatwama hatalanganyi ni usoko wenyi eswe.

¹³ Mba pwo yaluka jina Yehova yoze yahanjika nenyi ngwenyi, Yena uli Zambi wa kumona. Mumu yamba ngwenyi, Kumanyi chipwe kuno hinatala yoze wakungumona;

¹⁴ kashika jina lia shima lize ngwo, Mbia-ha-rohi. Lili hakachi ka Kandeshe ni Mberete.

¹⁵ Mba Hekare yasema mwana wa lunga kuli Apalama. Apalama yaluka mwanenyi yoze Hekare yamusemena ngwenyi, Ishemali.

¹⁶ Muze Hekare yasema Ishemali kuli Apalama, Apalama te kali ni makumi nake a miaka ni miaka yisambano.