Ubutukilo 15 - MUKANDA USANDU WA ZAMBI 1975

¹ Kulutwe lia yino yuma liji lia Yehova yiliza kuli Apalama mu usolwelo ngwo, Apalama, kanda wivwa woma, yami nguli lukepwe we, kanda nguli kwononona che chahiana.

² Apalama yamba ngwenyi, Mwene Yehova, yika mukangwaha se ngunayi chishi mwana, mba yono Elieza wa Ndamaseku mahinga zuwo liami?

³ Apalama yamba ngwenyi, Kuli yami kwanguhele munyachi mba umwe mwana wa ha chihunda mapwa swana yami.

⁴ Kumanyi liji lia Yehova yiliza kuli iye ngwo, Yono kechi kupwa swana ye alioze umwe wa kusemuka ku jimo lia yena mwene iye mapwa swana ye.

⁵ Yamuneha haze, yamba ngwenyi, Tala kwilu haliapwila walule matongonoshi nyi muhasa kwaalula. Mba yamba ngwenyi, Chocho makapwa akwa munyachi we.

⁶ Iye yafuliela Yehova, mba Yehova yamwalwilacho ngwe ululi.

⁷ Yamwamba ngwenyi, Yami nguli Yehova, nakuchijile ku Ure ya A-Kaletea ngukwehe chifuchi chino cha chihinga.

⁸ Iye yakumbulula ngwenyi, Mwene Yehova ngwe kuchi mungunyingika ngwami, Munguchihinga?

⁹ Yamwamba ngwenyi, Ungwanjile chimbembe cha ngombe wa miaka yitatu, ni chihwo cha pembe wa miaka yitatu, ni kuji ya panga wa miaka yitatu, ni katele ni mwana-liembe.

¹⁰ Yaanda eswe, yaapula hakachi. Yasa kwoko ni kulu hatalanganyi ni kwoko ni kulu. Alioze tujila kaapulile.

¹¹ Tujila a kulia yifwo yeza hanga akapwile ha mijimba, Apalama yaahuma.

¹² Ha kunjila cha tangwa tulo anji awanyine Apalama, ni mwongo wa milima yimwe yinene yiumukwata.

¹³ Mba yamba kuli Apalama ngwenyi, Nyingika pundu akwa munyachi we makapwa njize mu chifuchi hi nicho ko, makapwa ndungo, makaapinjisa makulakaji awana a miaka.

¹⁴ Mba mungukalamba atu aze aapita. Kulutwe makatukako ni upite wunji.

¹⁵ Alioze yena kumukaya kuli akakenu ni sambukila. Kumakakufunda ni ushinakaji upema.

¹⁶ O ha chisemuko chamuchiwana kumakeza nawa ku kuno, mumu uhenge wa A-Amore te kanda woka.

¹⁷ Mba muze te tangwa hilianjila, hikwapwa ufuku, kumanyi kahia ka kutuhwisa mwishi ni soka lia kulekwoka liapalikile hakachi ka yipinji ya yifwo.

¹⁸ Ha tangwa lienalio Yehova yakolesa usendo ni Apalama ngwenyi, Chifuchi chino hinachihana ku munyachi we, chize ku lwiji wa Engitu ndo ku lwiji munene, mwe Ufrateze;

¹⁹ ni A-Kene, ni A-Kenaze, ni A-Katumone,

²⁰ ni A-Hete, ni A-Perize, ni A-Refane,

²¹ ni A-Amore, ni A-Kanana, ni A-Ngikashe, ni A-Yepushe.