Ubutukilo 14 - MUKANDA USANDU WA ZAMBI 1975

¹ Kwapwile ha matangwa a Amarafele mwanangana wa Shinare, ni Arioke mwanangana wa Elesa, ni Chetoleome mwanangana wa Elame, ni Tetale mwanangana wa Ngoyime.

² O ashile jita ni Mbera mwanangana wa Sondome ni Mbisha mwanangana wa Ngomora, ni Shinape mwanangana wa Andama, ni Shemene mwanangana wa Zepoime, ni mwe mwanangana wa Mbela (likwo Zoare).

³ Wano eswe alifutwile hamuwika mu chana cha Shindime (likwo ngwo, Chitende cha Mungwa).

⁴ Azeyele kuli Chetoleome kumi lia miaka ni miaka yiali, mba ha mwaka kumi ni wamuchitatu amukatukilile.

⁵ Ha mwaka kumi ni wamuchiwana wejile Chetoleome, ni mianangana aze apwile hamwe nenyi. Yalamba A-Refane mu Aseterote-Kanaime, ni A-Zuji mu chifuchi cha Hame, ni A-Emi mu chana cha Keriataime.

⁶ Ni A-Hore mu mulundu wo wa Sere ndo ku Eleparane hakamwihi ni puya.

⁷ Mba yahiluka, yeza ku Emishipate (likwo ngwo, Kandeshe). Yalamba chifuchi cheswe cha A-Amaleke, ni A-Amore aze atwama mu Hazazone-Tama.

⁸ Yikutuhuka mwanangana wa Sondome, ni mwanangana wa Ngomora, ni mwanangana wa Andama ni mwanangana wa Zepoime, ni mwanangana wa Mbela (likwo Zoare), yalisela mu chikulo cha Shindime akase jita;

⁹ ni Chetoleome mwanangana wa Elame, ni Tetale mwanangana wa Ngoyime, ni Amarafele mwanangana wa Shinare, ni Arioke mwanangana wa Elesa. Mianangana awana kulimika ni mianangana atano.

¹⁰ Chikulo cha Shindime cha tò ni mena a malowa, mba mianangana a Sondome ni Ngomora yachina mba yafwilamo. Waze kafwile o yachinyina ku milundu.

¹¹ Yapupa yikwata yeswe ya Sondome ni Ngomora ni kulia cho cheswe, chocho yaya kwo.

¹² Yakwata Lote, mwana wa yayo ya Apalama hamwe ni yikwata yenyi, se iye yatunga ku Sondome, mba yaya nenyi.

¹³ Umwe yomboka, yeza, yambulwila Apalama mwe Ka-Hepreu. Iye te kanatwama ku mitondo ya Mamare Ka-Amore, mwanakwo wa Esekole ni wa Anere. Wano te halikunda ni Apalama.

¹⁴ Muze Apalama yevwa ngwo, Usoko we hamukwata funge, yatwala atu jenyi a kufumba, waze asemukine mu zuwo lienyi, makulakaji atatu ni kumi ni nake, yaahanga ndo ku Ndane.

¹⁵ Yahandununa atu jenyi ha ufuku, iye ni ndungo jenyi. Yaalamba, yaahanga ndo ku Hoba, kwapwa ku sali lia chimeso lia Ndamaseku.

¹⁶ Yeza ni yikwata yeswe, yaneha nawa usoko wenyi Lote ni yikwata yenyi ni mapwo nawa ni e atu.

¹⁷ Mwanangana wa Sondome yatuhuka nikumupatwiza ha kuhiluka ku kukumba Chetoleome ni mianangana aze apwile hamwe nenyi, ku chikulo cha Shave (likwo ngwo cha Mwanangana).

¹⁸ Melekizeteke mwanangana wa Saleme yaneha mbolo ni vinyu, iye te sasendote ya Zambi Chitunda.

¹⁹ Yawahisa Apalama ngwenyi, Zambi Chitunda, Mwenya malilu ni hashi akawahise Apalama,

²⁰ Chikwo nawa, Zambi Chitunda akafumane, Iye hanakunjika akwa kole je mu kwoko lie. Mba Apalama yamwaha chihanda chimuwika ha yihanda kumi ya ku yuma yeswe.

²¹ Mwanangana wa Sondome neye yamba kuli Apalama ngwenyi, Ngwehe e atu ukazuke yikwata yena mwene.

²² Apalama yakumbulula kuli mwanangana wa Sondome ngwenyi, Hinazundula kwoko liami kuli Yehova mwe Chitunda, mwenya malilu ni hashi ngwami,

²³ Chichi kutambula chipwe wanda, chipwe toloshi lia sapato, chipwe chuma cheswacho cha yena, kuchina muwamba ngwe, Hinapichisa Apalama.

²⁴ Chichi kutambula nichimwe shina kulia chize alile akweze, ni chihanda cha malunga aze ayile hamwe ni yami. Alioze Anere, ni Esekole, ni Mamare o akatambule nicho.