Ubutukilo 13 - MUKANDA USANDU WA ZAMBI 1975

¹ Apalama yakatuka ku Engitu, iye ni mukwo-pwo, ni upite wenyi weswe ni Lote hamwe nenyi nikutalikisa ku Negeve.

² Apalama yapita yimuna, ni prata, ni oru yinji.

³ Yenda mu jila yenyi chize ku Negeve ndo ku Mbetele, kuma kuze ajikile mbalaka yenyi hatangu, hakachi ka Mbetele ni Ehai.

⁴ Kuma kuze kwa chilumbilo chize atungile hatangu. Kwenako Apalama yasanyika ha jina lia Yehova.

⁵ Lote nawa yoze wendele ni Apalama, neye ni matanga jenyi a pembe ni a ngombe ni mbalaka jenyi.

⁶ Kashika chifuchi kuchaatele akatwame hamuwika, mumu upite wo woka kashika kahashile kutwama hamuwika.

⁷ Kwapwile kulitachika hakachi ka akwa kufunga yimuna ja Apalama ni akwa kufunga yimuna ja Lote. A-Kanana ni A-Perize achili mu chifuchi.

⁸ Apalama yamba kuli Lote ngwenyi, Ngunaliumbu, kanda kupwa kulitachika hakachi ka yena ni yami, hakachi ka tufunga twe ni tufunga twami se tuli usoko.

⁹ Chifuchi cheswe te kuchishiko kumeso je, nyi? Ngunaliumbu, lihandunune ni yami. Nyi yena muoya ku chimeso, ami munguya ku chindume. Nyi yena muoya ku chindume ami munguya ku chimeso.

¹⁰ Mba Lote yahetula meso jenyi, yatala chana cheswe cha Yordau chatuchikile kweswe kanawa ni meya shimbu te Yehova kanda anongesa Sondome ni Ngomora; ngwe chála cha Yehova, ngwe chifuchi cha Engitu ha kutalikisa ku Zoare.

¹¹ Kashika Lote yalitongwela chana cha Yordau. Lote yatalikisa ku Chivumbuko, chocho yalihandununa umwe kuli mukwo.

¹² Apalama yatwama mu chifuchi cha Kanana, Lote yatwama mu membo a ha chana, yatutulula mbalaka yenyi ndo ku Sondome.

¹³ Alioze atu a mu Sondome yingulungulu, akwa kuvulumiona Yehova kuhiana.

¹⁴ Muze Lote halihandununa kuli iye Yehova yamba kuli Apalama ngwenyi, Hetula meso je utale chize kuma kuno watwama ku Norte ni ku Sule ni ku Chivumbuko ni ku Chitokelo.

¹⁵ Mumu chifuchi chino cheswe unamono ngunakwehecho, ni kuli yena ni ku munyachi we ku miaka ya mutolo.

¹⁶ Chikwo nawa mungwokesa munyachi we ngwe fufuta ya hashi. Nyi mutu mahasa kwalula fufuta ya hashi mba chocho mahasa kwalula munyachi we.

¹⁷ Katuka wendese chifuchi ndusu, ni ku usuhe wacho ni ku utohe wacho mumu ngunakwehecho yena.

¹⁸ Apalama yatutulula mbalaka yenyi, yaya, yatwama ku mitondo ya Mamare, yize yatwama mu Heprone. Kwenako yatungila Yehova chilumbilo.