Ubutukilo 12 - MUKANDA USANDU WA ZAMBI 1975

¹ Yehova te hamba kuli Apalama ngwenyi, Katuka ku chijima che, ni kuli usoko we, ni kuli akwa zuwo lia tatenu, uye ku chifuchi mungukulwezacho.

² Mba ku-mungukakupwisa vungu linene. Mungukuwahisa, mungufumanyisa jina lie, kumuopwa mukwa kuwahisa.

³ Waze makuwahisa mungwawahisa. Yoze makushinga neye mungumushinga. Muli yena mavungu eswe a hashi kumakaawahisa.

⁴ Chocho Apalama yakatuka ngwe Yehova yamwamba. Lote yaya hamwe nenyi. Apalama yapwa ni makumi shimbiali a miaka ni miaka yitano muze yakatuka ku Harane.

⁵ Apalama yatwala hamwe nenyi mukwo-pwo Serai, ni Lote mwana wa yayo ni upite weswe haupita, ni atu eswe aze haliwezela mu Harane. Chocho yakatuka akaye ku chifuchi cha Kanana, mba ku Kanana yaheta.

⁶ Apalama yapalika ndusu mu chifuchi ndo ku chihela cha Shekeme, ku mutondo uze uli ku More, A-Kanana te achili mu chifuchi.

⁷ Mba Yehova yasoloka kuli Apalama, yamba ngwenyi, Chifuchi chino munguchihana ku munyachi we. Mba kuli Yehova yoze yasoloka kuli iye yamutungilako chilumbilo.

⁸ Yatutulukako, yeza ku mulundu wa ku sali lia Chivumbuko lia Mbetele. Yajika mbalaka yenyi, Mbetele ku Chitokelo, Ehai ku Chivumbuko. Yatungilako chilumbilo Yehova, yasanyika ha jina lia Yehova.

⁹ Chocho Apalama yenda nikutalikisa hindu ku Negeve.

¹⁰ Yikupwa kapunga mu chifuchi, mba Apalama yapalumukina ku Engitu akatwameko njize mumu kapunga te mukalu mu chifuchi.

¹¹ Mba muze te hakundama akanjile ku Engitu, yamba kuli mukwo-pwo Serai ngwenyi, Tala, ngunanyingika yena uli chileza ku meso.

¹² Chocho muze A-Engitu makumona mamba ngwo, Au mukwo-pwo; mba mangushiha yami akakufunge yena wa mwono.

¹³ Ngunaliumbu, amba ngwe, Nguli ndumbwenyi, hanga chikapwe kanawa ni yami mumu hali yena, ngukatwame ni mwono mumu ha mukunda wa yena.

¹⁴ Chocho yichipwa, muze Apalama yaheta ku Engitu akwa Engitu yamona mwe pwo Wahiana kupema.

¹⁵ Yilolo ja Falau yamumona, yamufumanyisa kuli Falau, mba yamunjisa mu zuwo lia Falau.

¹⁶ Iye walingile kanawa ni Apalama mumu hali pwo. Yapita mapanga, ni ngombe, ni kuji a yimbulu, ni ndungo ja malunga ni a mapwo, ni yihwo ja yimbulu ni tumelu.

¹⁷ Alioze Yehova yapinjisa Falau ni akwa zuwo lienyi eswe ni misongo yipi mumu hali Serai pwo lia Apalama.

¹⁸ Falau yasanyika Apalama yamba ngwenyi, Chuma chino wangulinga chika? Kuchi te kwangulwezele ngwe, Mukwetu-pwo?

¹⁹ Kuchi te unakamba ngwe, Ndumbwami? Kashika ami namutambula akapwe pwo liami. Haliapwila kashika tala mukwenu-pwo; umutambule, yako kwe.

²⁰ Mba Falau yahana shimbi kuli atu ya kutwala kuli iye, yamushika, ni iye ni mukwo-pwo ni upite wenyi weswe.