Ubutukilo 11 - MUKANDA USANDU WA ZAMBI 1975

¹ Mba hashi heswe hapwile limi limuwika ni kuhanjika chimuwika.

² Shimbu machiya ku Chivumbuko awanyine chana mu chifuchi cha Shinare, yatwamako.

³ Yaliamba umwe kuli mukwo ni mukwo ngwo, Tuyenu tutenge tijolo tukayoche kanawa. Chocho apwile ni tijolo kusalakana mawe, ni malowa kusalakana ndambo.

⁴ Yamba ngwo, Tuyenu tutunge limbo, ni kaposhi songo lienyi likahete mwe mwilu, tukapwe ni jina kuchina mutumwangana mwamwa hashi heswe.

⁵ Alioze Yehova yahulumuka akamone limbo ni kaposhi yoze ana ja atu machitunga.

⁶ Yehova ngwenyi, Kumanyi hapwa munyachi umuwika ni limi limuwika kashika haputuka kulinga chuma chino. Haliapwila cheswacho mahala kulinga kechi kuhasa kwachinda.

⁷ Tuhulumukenu tukalumbangenye malimi jo hanga kechi kalivwa kuhanjika cha umwe ni mukwo.

⁸ Chocho Yehova yaamwanga kuze mwamwa hashi heswe, mba yalitwamina kutunga limbo lize.

⁹ Kashika yalukako jina ngwo, Mbapele mumu kwenako Yehova yalumbangenya kuhanjika cha akwa hashi eswe. Mba kuze Yehova yaamwanga mwamwa hashi heswe.

¹⁰ Yisemuko ya Sheme yino; Sheme te yapwa ni kulakaji lia miaka, yasema Apakasha miaka yiali kulutwe lia sanga lia meya.

¹¹ Sheme yatwama ni mwono kulutwe lia kusema Apakasha makulakaji atano a miaka nikusema ana a malunga ni ana a mapwo.

¹² Apakasha yatwama ni mwono makumi atatu a miaka ni miaka yitano yasema Shela.

¹³ Apakasha yatwama ni mwono kulutwe lia kusema Shela makulakaji awana a miaka ni miaka yitatu nikusema ana a malunga ni ana a mapwo.

¹⁴ Shela yatwama ni mwono makumi atatu a miaka yasema Epere.

¹⁵ Shela yatwama ni mwono kulutwe lia kusema Epere makulakaji awana a miaka ni miaka yitatu nikusema ana a malunga ni ana a mapwo.

¹⁶ Epere yatwama makumi atatu a miaka ni miaka yiwana, yasema Pelege.

¹⁷ Epere yatwama ni mwono kulutwe lia kusema Pelege makulakaji awana a miaka ni makumi atatu a miaka nikusema ana a malunga ni ana a mapwo.

¹⁸ Pelege yatwama ni mwono makumi atatu a miaka, yasema Reu.

¹⁹ Pelege yatwama ni mwono kulutwe lia kusema Reu makulakaji aali a miaka ni miaka livwa nikusema ana a malunga ni ana a mapwo.

²⁰ Reu yatwama ni mwono makumi atatu a miaka ni miaka yiali yasema Selugu.

²¹ Reu yatwama ni mwono kulutwe lia kusema Selugu makulakaji aali a miaka ni miaka shimbiali nikusema ana a malunga ni ana a mapwo.

²² Selugu yatwama makumi atatu a miaka, yasema Nehore.

²³ Selugu yatwama ni mwono kulutwe lia kusema Nehore makulakaji aali a miaka nikusema ana a malunga ni ana a mapwo.

²⁴ Nehore yatwama ni mwono makumi aali a miaka ni miaka livwa, yasema Tera.

²⁵ Nehore yatwama ni mwono kulutwe lia kusema Tera kulakaji lia miaka ni kumi lia miaka ni miaka livwa nikusema ana a malunga ni ana a mapwo.

²⁶ Tera yatwama ni mwono makumi shimbiali a miaka, yasema Apalama, ni Nehore, ni Harane.

²⁷ Yisemuko ya Tera yino; Tera yasema Apalama, ni Nehore, ni Harane. Harane yasema Lote.

²⁸ Harane yafwa shimbu tato Tera achili ni mwono, mu chifuchi cha kusemuka chenyi, mu Ure, chihunda cha Kaletea.

²⁹ Ni Apalama ni Nehore yambata mapwo. Pwo lia Apalama jina lienyi Serai. Pwo lia Nehore jina lienyi Milika mwana wa Harane, iye kali ni ana aali, mukwo Milika mukwo Iseka.

³⁰ Serai te mumba, keshi mwana.

³¹ Mba Tera yatwala mwanenyi Apalama, ni Lote mwana wa Harane mujikulu wenyi, ni Serai tembwa-mwanenyi pwo lia mwanenyi Apalama. Yaya no akatuke ku chifuchi cha Ure wa Kaletea akaye ku chifuchi cha Kanana yeza ku Harane, yatwamako.

³² Matangwa a Tera te makulakaji aali a miaka ni miaka yitano. Tera yafwa mu Harane.