Titu 3 - MUKANDA USANDU WA ZAMBI 1975

¹ Ukaewulwise kuzeyela kuli mianangana, ni akwa kuyula, akononoke, akalulike kulinga yitanga yeswe yipema.

² Kanda ahanjika yipi hali niumwe, kanda apwa akwa ndombo, akapwe yimbovu, nikulweza kushimbika cheswe kuli atu eswe.

³ Mumu yetwene nawa ha miaka ya kunyima twapwile yihepuke, yihulia, nikupianguka, nikulingila usolo weka ni weka ni kuwaha cheka ni cheka, nikwenda mu uhuka ni lufwachinda, akwa kole, nikulivwila kole umwe ni mukwo.

⁴ Alioze muze utu ni kufwila cha Zambi Chilamwina chetu chasolokele,

⁵ hi ku yitanga ya ululi ko, yize twalingile yetwene, aiioze nikulita ni keke yenyi yinene watulamwinyine, ku kusanyisa cha kusema chaha, ni kupwisa chaha cha Spiritu Musandu.

⁶ Yoze wamuzukwile wa kulumbama hali yetu kuli Yesu Kristu Chilamwina chetu,

⁷ hanga, se hanatusambisa ku vumbi lienyi, tukapwe maswana nikulita ni kutalatala cha mwono wa mutolo.

⁸ Liji lino liamwenemwene. Ha kutwala ku yino yuma ngunazange ukalishinjike, hanga waze hanafuliela kuli Zambi, akase mbunge kulalaminya ku yitanga yipema. Yino yuma yinapeme, yakufumbula atu.

⁹ Alioze China kulihangujola cha uhepuke, ni kujichika miya, ni vunda, ni kulitachika cha kutwala ku shimbi, mumu kuyishi kufumbuka; yapwa yamokomoko.

¹⁰ Mukwa kuhandunwona muze hiwanukanjisa kashi, kaali, lituneye,

¹¹ se unanyingika umwe ngwe yono kapianguka, kanavulumuna, kalihisa mwene.

¹² Muze mungutuma Aretema kuli yena, hanji Techiku, ukalipupwise kwiza kuli yami ku Nikopoli, mumu hinahala kutwamako mwaka wa chishika.

¹³ Ukashinjikile chikolo Zena mwe ngaji, ni Apolu ha wenyi wo, hanga kechi kahona nichimwe.

¹⁴ Atu jetu nawa, akalilongese kulalaminya ku yitanga yipema, akahase kukwasa ni yuma yize yinatambe, hanga kechi kapwa ngwe keshi mihuko.

¹⁵ Waze eswe ali hamwe ni yami kanakumeneka. Ukameneke waze akutufwila mu Ufulielo. Vumbi likapwe hamwe ni yenu eswe. Amene.