Titu 2 - MUKANDA USANDU WA ZAMBI 1975

¹ Alioze yena, hanjika yuma yize yinatela longeso lingunu.

² Makulwana ja malunga akakeyele, keshi lwelia, akwa mana, angunu mu Ufulielo, mu zango, mu uhumikizo.

³ Makulwana ja mapwo chizechene akalinge ngwe chatamba asandu, hi yilamikiji ko, hi akwa kunwa vinyu vinji ko, akapwe alongeshi ja yuma yipema;

⁴ hanga akafumbe mapwo, waze apwa twanuke two, kuzanga akwomalunga ni ana jo.

⁵ Akwa mana, akwa kutoma, akwa kufunga mazuwo jo, apema, akwa kuzeyela kuli akwo-malunga, hanga kechi kashililika liji lia Zambi.

⁶ Akweze chizechene ukaashinjile, akapwe ni mana.

⁷ Ha yuma yeswe nikulilweza yena mwene ngwe chilweza cha yitanga yipema; ha kulongesa che ni kulweza ungunu, kushi lwelia,

⁸ kuhanjika chingunu, chize kuchishi kuhasa kuhia; hanga akavwise sonyi mweswe malimika, se keshi chuma chipi nichimwe cha kwamba hali yetu.

⁹ Shinjila ndungo akazeyele kuli miata jo ene, akapemene chikolo ha yuma yeswe, hi nikuhamika ko;

¹⁰ hi nikwiya ko, aiioze nikusolola kushishika cheswe chipema; hanga akawahise longeso lia Zambi Chilamwina chetu ha yuma yeswe.

¹¹ Mumu vumbi lia Zambi hilinasoloka, Unaneha ulamwino kuli atu eswe,

¹² nikutufumba, ngwo, Chatutamba kwenda ni mana ni ululi ni uwayilo, ni kulikala utanganyanyi ni usolo wa hano hashi, ha mwakono haliapwila;

¹³ nikutwaminyina kutalatala chize chawaha, ni usolokelo wa uhenya wa Zambi yetu munene kanda Chilamwina Yesu Kristu;

¹⁴ yoze waliechele hali yetu, hanga akatukule ku uhenge weswe, hanga akapemese kuli iye mwene atu a kwapita mwene, a kukaula ni mbunge yeswe yitanga yipema.

¹⁵ Hanjika yino yuma, ukayishinjile, ukakumike ni chiyulo cheswe. Niumwe kanda akulelesa.