Titu 1 - MUKANDA USANDU WA ZAMBI 1975

¹ Yami Paulu, ndungo ya Zambi, kanda postolo wa Yesu Kristu, nikulita ni Ufulielo wa waze a kutongola kuli Zambi, nikulita ni yinyingi ya umwenemwene uze wakulita ni uwayilo;

² mukutalatala mwono wa mutolo, uze Zambi, yoze keshi mahuza, walakenyene ku miakulwila;

³ aiioze ha miaka yalio, wasolwele liji lienyi mu sango lize angukunjikile, nikulita ni liji lia chiyulo cha Zambi Chilamwina chetu,

⁴ Kuli Titu, mwanami pundu mu Ufulielo wa eswe aali, niwe kanda niwami: Vumbi ni sambukila ya kuli Zambi Tata ni Kristu Yesu Chilamwina chetu.

⁵ Ha chikuma chino nakuhichikile mu Kreta, hanga ukalulike yize yuma yahonene, hanga Ukasele makulwana mu membo eswe, chizechene ngwe nakwambile;

⁶ kachi umwe masamba ku kusuma cheswe, lunga wa pwo umuwika, kali ni ana a kufuliela, waze keshi kusumiwa ha kuhungumuka ni yipi, hanji kukolema.

⁷ Mumu chatamba kalayi, se iye kaselo ka Zambi, akapwe keshi kapalia; hi mukwa pami ko, hi chitenu ko, hi mukwa kuzwela ko ku vinyu, hi mukwa kumbufula ko, yoze keshi chipululu cha upite wa sonyi;

⁸ aiioze mukwa kuzumbula ngeji, mukwa kufwila yipema, mukwa mana, mukwa ululi, musandu, mukwa kusúla;

⁹ mukwa kukakaminya ku liji liamwenemwene, lize liakulita ni longeso, hanga akahase kushinjila mu longeso lingunu ni kukumika akwa kuhamika nawa.

¹⁰ Mumu kwali akwa kukolema anji, akwa kumbambula, ni akwa kwonga, ahiana hakachi ka akwa ungalami.

¹¹ Chatamba kupakika makanwa jo; se kakulimbwisa mazuwo a muwundu, nikulongesa ha upite wa sonyi yuma yize kuchaatambile kulongesa.

¹² Umwe wa kuli ayo ene, profeta wo ene wambile ngwenyi, A-Kreta kanapu akwa mahuza matangwa eswe, ngongo api, yipulutu a kulelumioka.

¹³ Shindakenyo yino yamwenemwene. Ha chikuma chino, ukaakumike chikolo, hanga akapwe angunu mu Ufulielo,

¹⁴ kanda apanjika ku yishima yamokomoko ya A-Yunda, ni ku shimbi ja atu, aze akupiangula ku umwenemwene.

¹⁵ Kuli akwa kupema, yuma yeswe yipema; aiioze kuli akwa luchisa, ni waze keshi kufuliela, chuma chipema chakuhi nichimwe; aiioze ni kunyonga cho ni mbunge jo kujalichisa.

¹⁶ Kakwamba ngwo, Tunanyingika Zambi; aiioze ni yitanga kakulikata iye, akwa kuzelwokesa, yihulia; ha kutwala ku yitanga yeswe yipema yisáshili amokomoko.