Tiangu (Jake) 5 - MUKANDA USANDU WA ZAMBI 1975

¹ Achivwenu haliapwila, yenu pichi, lilenu, pozonokenu ha kulungajala chenu, chize muchiza hali yenu.

² Upite wenu unapolo, ni mahina jenu kanaliwa kuli ndulu.

³ Oru ni prata yenu hiyinakwata ngengeya; ni ngengeya yayo kumuyikapwa Shindakenyo ya kulimika ni yenu, kumuyikalia musunya wenu ngwe kahia. Hinunatulika upite ha matangwa a kusula.

⁴ Talenu, fweto ya akwa milimo jenu waze hanachi minda yenu, yize nwaalimwine, kuyakuteta; ni miteto ya waze hanachi hiyinanjila mu matwi ja Mwene wa yizavu ya tujita.

⁵ Hinunatwama ni upite wunji ni kuwaha hano hashi, hinunaluyukisa usona weswe; hinunahoko mbunge jenu ha tangwa lia kushika.

⁶ Hinunahisa, hinunashihi mwe mukwa ululi; iye kalimikine ni yenu.

⁷ Kashika lihumikizenu, mandumbu, ndo ku kuheta cha Mwene. Talenu, njimi matalatala mihuko yilemu ya hashi, malihumikiza ndo muyitambula vula wa musazu ni vula wa samakwasa.

⁸ Ni yenu nawa, lihumikizenu; takamisenu mbunge jenu: mumu kuheta cha Mwene hichakundama.

⁹ Kanda nulinyenyeta mandumbu, umwe hali mukwo ni mukwo, hanga kechi kanupatwila: Sopi kanamana ku pito.

¹⁰ Mandumbu jami, tambulenu ngwe chilweza cha kwivwa lamba ni cha uhumikizo, aprofeta waze ahanjikile mu jina lia Mwene.

¹¹ Twakwavuluka ngwetu, Akwa kuwaha, waze anyongonwene; hinunevu ha kunyongonona cha Jo, hinunamono songo lia mwe Mwene, ngwe chize Mwene iye wa tò ni vumbi, mukwa keke.

¹² Alioze kuhiana yuma yeswe, mandumbu jami, kanda nulishinga, chipwe ni lilu, chipwe ni hashi, chipwe ni shingo likwo nilimwe: aiioze “ewa” yenu yikapwe “ewa”, ni “ka” yenu yikapwe “ka”; hanga kunuchi kulimbukila mu upatwilo.

¹³ Kachi umwe hakachi kenu mevwa lamba, alembe, kachi umwe mapwa ni chisambu, akembe uhaliso.

¹⁴ Kachi umwe mayiza, atambike makulwana a chikungulwila; alembe hali iye, akamuwayise ni maji mu jina lia Mwene.

¹⁵ Kulemba cha Ufulielo kumuchilamwina mukwa kuyiza, ni Mwene kumamuhindwisa; nyi kachi hanavulumuna milonga, mamukonekenayo.

¹⁶ Kashika shikisenu milonga yenu umwe kuli mukwo ni mukwo, lilembelenu umwe mukwo ni mukwo, hanga nukahinduke. Kuliumba cha mukwa ululi kuchakutakama chikolo ha kulinga chacho.

¹⁷ Eliya wapwile mukwa usona wa kulifwa ni yetu, iye walembele ni mbunge yeswe hanga vula kechi kanoka; iye kanokene hano hashi ha miaka yitatu ni tukweji asambano.

¹⁸ Cheka nawa walembele; ni vula wanokene, ni hashi hasokesele mihuko yaho.

¹⁹ Mandumbu jami, kachi umwe hakachi kenu mapianguka ku umwenemwene, mba umwe mamuhilwisa;

²⁰ akanyingike ngwe yoze makondolola chivulumunyi ku kupianguka cha jila yenyi, makalamwina mutu ku kufwa, makafuka milonga yinji chikolo.