Tiangu (Jake) 4 - MUKANDA USANDU WA ZAMBI 1975

¹ Kulihi kunakatuka jita, kulihi kunakatuka kulitachika hakachi kenu? Hi ku usolo ko, uze wakwasa jita mu yihanda yenu, nyi?

² Nwakwivwa usolo, aiioze kunwazukile: nwakushiha, nwakwivwa kuzo, aiioze kunwahashile kuzuka: nwakulitachika nikwasa jita; kunushi nichimwe, mumu kunushi kwita.

³ Nwakwita aiioze kunushi kutambula, mumu nwakwita ha yipi, hanga nukachihwise ha usolo wenu.

⁴ Yenu yitanji, kunwanyingikine kufwila cha hano hashi, kole kuli Zambi, nyi? Kashika mweswe mapala kupwa kasendo ka akwa hashi, malipwisa mukwa kole kuli Zambi.

⁵ Shina nunashinginyeka ngwe Chisoneko chinahanjika chamokomoko, nyi? Ngwo, Spiritu, yoze wakutwama muli yetu kakwivwa usona ndo ku ukwa, nyi?

⁶ Alioze kakuhana vumbi liahiana. Kashika chisoneko chinambe ngwo, Zambi kakulimika ni akwa kulizelula, aiioze kakuhana vumbi kuli akwa kulikehesa.

⁷ Lizeyesenu kashika kuli Zambi; aiioze limikenu ni Ndiapu mba kumakanuchina.

⁸ Kundamenu kuli Zambi, iye kumakakundama kuli yenu. Pemesenu moko jenu, yenu yivulumunyi; tomesenu mbunge jenu, yenu akwa mbunge jiali.

⁹ Lungajalenu, nenganyanenu, lilenu: kuseha chenu chialumuke kunenganyana, ni uwahililo wenu ualumuke kuhonga ku meso.

¹⁰ Likehesenu kumeso ja Mwene, iye kumakanulemesa.

¹¹ Kanda nuhanjika chipi umwe hali mukwo ni mukwo, mandumbu. Yoze mahanjika chipi hali ndumbwenyi, hanji yoze mapatwila ndumbwenyi, mahanjika chipi ha shimbi, mapatwila shimbi; aiioze kachi yena mupatwila shimbi, hi uli mukwa kulinga shimbi ko, aiioze uli sopi.

¹² Kwali Sopi umuwika, mukwa kuhana shimbi, yoze mahasa kulamwina; mahasa kwonwona: aiioze yena iya wakupatwila mukwenu?

¹³ Achivwenu haliapwila, yenu nwakwamba ngwenu, Musono, hanji hamene, mutukaya ku limbo lia nganji, mutukatwamako mwaka, mutukasepa, mutukafumbuka.

¹⁴ Alioze kunwanyingikine chize muchipwa ha tangwa lia hamene. Mwono wenu kuchi upwa? Unapu chishichishi, chize muchisoloka ha shimbu likepe ni kulutwe muchanduluka.

¹⁵ Shinaho Chanutamba kwamba ngwenu, Kachi Mwene mapala, nyi kachi mutupwa ni mwono, kachi mutukalinga Chikachi ni Chinganji.

¹⁶ Alioze haliapwila nwakulisamba ha kulizata chenu: kulisamba chino cheswe chipi.

¹⁷ Kashika kuli yoze manyingika kulinga kanawa, aiioze keshi kuchilinga, kuli iye kuchapwa shili.