Tiangu (Jake) 3 - MUKANDA USANDU WA ZAMBI 1975

¹ Kanda nupwa alongeshi anji, mandumbu jami, se nunanyingika yetu alongeshi mutukatambula upatwilo ukalu Wahiana.

² Mumu yetu eswe twakutalinga kanji, kachi umwe keshi kutalinga ha liji, iye mutu mungunu, kanahase kuhombola mujimba weswe nawa.

³ Talenu, twakusa lelia mu makanwa ja tuvwalu, hanga akatwononokene, twakuhingulula mijimba yo yeswe pewa.

⁴ Talenu nawa maulungu aze anene, akuhungumioka ku fuji yikalu, maakungulula ni leme yikepe chikolo kweswako mukwa kwendesa mapala.

⁵ Chocho limi nawa chihanda chikepe, aiioze kuliakulisangala yuma yinene. Talenu, musenge upwa haha muuwema ku kahia kakepekepe!

⁶ Ni limi linapu kahia: we uhenge weswe wa hano hashi; chocho limi hanalise hakachi ka yihanda yetu, lize liakupihisa mujimba weswe, liakuchocheka kahia ku yuma yeswe ya chisemewa, nelio hilinambula kahia ku Ngehena.

⁷ Mumu milali yeswe ya tushitu, ni tujila, milali yeswe ya tututu, ni tushitu a mu kalunga-lwiji, mahomboka, te hanahomboka ku vungu lia atu.

⁸ Alioze limi, mutu niumwe mahasa kulihombwesa; yipi ya kuzangajala, lia tò ni utende wa kufwa.

⁹ Twakufumanyisa nalio Mwene kanda Tata; twakushinga nalio atu aze aatangile mu kulifwa cha Zambi.

¹⁰ Mu kanwa limuwika munatuhuka uwape ni kushinga. Mandumbu jami, kuchalitele yino yuma kupwa chocho.

¹¹ Fuji mulivwelwoka mu kanwa limuwika ni meya ayema ni meya asasu, nyi?

¹² Mandumbu jami, mukuyu muuhasa kwima olevwe, hanji vindera muyihasa kwima makuyu, nyi? Chipwe fuji lia meya a mungwa kulishi kuhasa kuvwelwoka ni meya ayema.

¹³ Yoze mapwa mukwa mana, mukwa malinjekela hakachi kenu, akalweze ku kwenda chenyi chipema yitanga yenyi ni kushimbika cha mana.

¹⁴ Alioze kachi nuli ni ukwa usasu ni kulimanangana mu mbunge jenu, kanda nulisamba, kanda nuhanjika mahuza a kulimika ni umwenemwene.

¹⁵ Mana ano hi mana a kuhulumuka kwilu ko, aiioze a hashi, a musunya, a Ndiapu.

¹⁶ Mumu kuze kuuli ukwa ni kulimanangana, kuze kwene kuli vunda ni yilinga yeswe yipi.

¹⁷ Alioze mana a kwilu hatangu atoma, kulutwe a sambukila, ambovu, ashi, a tò ni keke ni mihuko yipema, keshi katonde, keshi ulembekese.

¹⁸ Alioze kakukuwa mihuko ya ululi mu sambukila hali waze akulinga sambukila.