Tiangu (Jake) 2 - MUKANDA USANDU WA ZAMBI 1975

¹ Mandumbu jami, kanda nukapwa ni katonde hamwe ni Ufulielo wa Mwene Yesu Kristu, mwe Mwene wa uhenya.

² Mumu kachi umwe lunga manjila mu sunangonga yenu kanazala kazeya ka oru, ni hina lia mukambo lia kutemuka, ni chiswale manjila nawa kanazala mazalo api,

³ nyi munutala kuli yoze unazala hina lia mukambo wa kutemuka, munwamba ngwenu, Twama yena hano hapema; munwamba kuli chiswale ngwenu, Yena mana aku, hanji ngwenu, Twama kushi lia chitwamo cha yiliato yami;

⁴ kunwasele katonde hakachi ka yenwene, nyi? Kunwalipwishile sopi ni manyonga ja ungulungulu, nyi?

⁵ Ivwenu, mandumbu jami a zango, ngwami, Zambi te katongwele yiswale a hashi pichi ni Ufulielo, ni maswana ja wanangana, uze walakenyene kuli waze akumuzanga nyi?

⁶ Alioze yenu hinunasaula chiswale. Pichi keshi kunumwesa lamba, nyi? Keshi kunukoka ku usopelo, nyi?

⁷ Keshi kushililika jina lize lilemu ananuluku nalio, nyi?

⁸ Alioze kachi nwakulinga shimbi ya ku wanangana nikulita ni Chisoneko ngwo, Ukazange mwenyembo we ngwe wakulizanga yena mwene, kachi nwakulinga kanawa.

⁹ Alioze kachi munupwa ni katonde, kachi munuvulumuna, makukumika ku shimbi ngwe yitanguke.

¹⁰ Mumu mweswe mafunga shimbi jeswe lukombo, hindu matangula chihanda chimuwika, hahia ha jeswe.

¹¹ Mumu yoze wambile ngwenyi, Kanda ulinga utanji, wambile nawa ngwenyi, Kanda ushiha. Achi, kachi yena kushi kulinga utanji, aiioze mushiha, hiwapwa chitanguke cha shimbi.

¹² Chocho hanjikenu, chocho lingenu, nikulita ngwe waze makaapatwila ku shimbi ya utuswilo.

¹³ Yoze kalwezele keke kumakatambula upatwilo uze kuushi keke: keke kuyakukumba upatwilo.

¹⁴ Kufumbuka chika, mandumbu jami, kachi umwe mamba ngwenyi, Ufulielo nguli nawo, aiioze keshi yitanga? Ufulielo muuhasa kumulamwina, nyi?

¹⁵ Achi, kachi ndumbu hanji pangi mapwa ni uvu, mahona kulia cha tangwa ha tangwa,

¹⁶ mba umwe wa kuli yenu mamba kuli ayo ngwenyi, Nuye kanawa, nuvume, nukute; aiioze keshi kuhana yuma yize chatamba mujimba kupwa nayo; kufumbuka chika?

¹⁷ Chizechene nawa Ufulielo, kachi kuushi yitanga, kachi kuunafu ukawawo.

¹⁸ Alioze umwe mamba ngwenyi, Yena Ufulielo uli nawo, ni yami yitanga nguli nayo; ngulweze Ufulielo we kuushi yitanga, ni yami ku yitanga yami mungukulweza Ufulielo wami.

¹⁹ Yena Unafuliela ngwe Zambi kapwa umuwika; unalingi kanawa: andemoniu nawa kakufuliela nikuchikima.

²⁰ Alioze unazange kunyingika, yena mutu wamokomoko, ngwe Ufulielo kuushi yitanga kuunafu, nyi?

²¹ Te kasambishile kulwetu Apalahama ku yitanga muze alambwile mwanenyi Izake ha chilumbilo, nyi?

²² Unamono ngwe Ufulielo wenyi walingile hamwe ni yitanga yenyi, ngwe ku yitanga apwishile Ufulielo wenyi ungunu.

²³ Chisoneko chamanunukine chize chinambe ngwo, Apalahama wafulielele Zambi, mba achalwile kuli iye ha ululi; iye amulukile ngwo, Kasendo ka Zambi.

²⁴ Nunamono ngwe masambisa mutu ku yitanga, ni hi ku Ufulielo wika ko.

²⁵ Chizechene nawa kasambishile chikoi Rahape ku yitanga, muze azekele tunganda, aakatwishile ku jila yeka, nyi?

²⁶ Mumu chizechene ngwe mujimba kuushi Spiritu kuunafu, chocho nawa Ufulielo kuushi yitanga kuunafu.