Tiangu (Jake) 1 - MUKANDA USANDU WA ZAMBI 1975

¹ Yami Tiangu, ndungo ya Zambi kanda ya Mwene Yesu Kristu, Ku mavungu kumi ni aali aze anamwangashana kweswe: Ngunanumeneka.

² Mandumbu jami, muze yeseko yeka ni yeka muyinuwana, chinyongenu kupwa uwahililo weswe;

³ se nunanyingika kweseka cha Ufulielo wenu kuchakulinga kunyongonona.

⁴ Alioze kunyongonona chikapwe ni chitanga chacho chingunu, hanga nukapwe angunu, a muwundu, nikuhona nichimwe.

⁵ Alioze kachi umwe wa kuli yenu mahona mana, akete kuli Zambi, yoze wakuhana kuli eswe ni kuvungumuna, keshi kuchoka; mba kumakamwaho.

⁶ Alioze akete ni Ufulielo, kanda ayambashana; mumu yoze mayambashana mapwa ngwe mukanya wa ku kalunga-lwiji, wa kuhehuka ni fuji ni wa kufuza.

⁷ Mumu yoze mutu kanda akashinginyeka ngwe makatambula chuma chimwe kuli mwe Mwene.

⁸ Mutu wa mbunge jiali, wakukokoloka mu majila jenyi eswe.

⁹ Alioze ndumbu mukehe akalisambe muze mamulemesa:

¹⁰ ni pichi akalisambe muze mamulelesa: mumu ngwe yitemo ya mwambu, kumakahwa.

¹¹ Mumu tangwa mulivumbuka ni chivukuminya chalio, mulilelesa mwambu; ni chitemo chawo muchiholoka, ni upeme wacho muuhwa: chocho pichi nawa makajimuka mu mawende jenyi.

¹² Kawaha mutu yoze manyongonona mu cheseko; mumu muze hamusela Shindakenyo yipema, makatambula chipangula cha mwono, chize Mwene hanalakenya kuli waze akumuzanga.

¹³ Mutu niumwe muze mamweseka kanda aamba ngwenyi, Kanangweseka kuli Zambi; mumu Zambi kechi kuhasa kumweseka ni yuma yipi, iye mwene keshi kweseka niumwe.

¹⁴ Alioze mutu ni mutu mamweseka, muze mamutwala ku usolo wenyi mwene, muze mamusongojola.

¹⁵ Mba usolo muze muuseseka, muusema shili: ni shili muze muyikola, muyisema kufwa.

¹⁶ Kanda nulionga, mandumbu jami a zango.

¹⁷ Kuhana cheswe chipema ni yawana yeswe yingunu kuyakuhulumuka kwilu, kuli mwe Tato ya pangu, muli iye kumushi kwalumuka, chipwe Chizulie cha kutewuluka.

¹⁸ Nikulita ni upale wenyi mwene watusemene ku liji lia umwenemwene; hanga tukapwe mulali umwe wa mihuko yitangu ya ku yitanga yenyi.

¹⁹ Nunanyingika chino, mandumbu jami a zango. Alioze mutu ni mutu alipupwise kwivwa, aiioze apwe makoke kuhanjika, makoke kutenuka;

²⁰ mumu utenu wa mutu kuushi kulinga ululi wa Zambi.

²¹ Kashika, mbilenu majilo eswe ni kulumbama cha uhuka, tambulenu ni kushimbika liji lize alitumbile muli yenu, lienalio kuliakuhasa kulamwina mbunge jenu.

²² Alioze pwenu akwa kulinga lie liji, hi akwa kwivwa wika ko, ngwe nunaliongo yenwene.

²³ Mumu kachi umwe mapwa mukwa kwivwa lie liji, hi mukwa kulinga ko, kachi malifwa ni mutu yoze matala meso jenyi mu katalilo:

²⁴ mumu malitala, maya, haze hene mavulama chize apwa ku meso.

²⁵ Alioze yoze matala kanawa mu shimbi yingunu ya utuswilo, mba manyongononamo, se iye kapwile mukwa kwivwa ni kuvulama, aiioze mukwa kulinga chitanga, yono kumakawaha ha kulinga chenyi.

²⁶ Kachi umwe malishinginyeka kupwa mukwa kuwayila, shimbu keshi kuhombola limi lienyi, aiioze kakwonga mbunge yenyi mwene, uwayilo wa yono wamokomoko.

²⁷ Uwayilo upema kuushi luchisa kumeso ja Zambi kanda ja mwe Tata, uno, Kunangisa ana-ashiwa ni twamishi ja mapwo mu luyinda wo, ni kulitunga mwene keshi chipeka ku yuma ya hano hashi.