Shimbi 9 - MUKANDA USANDU WA ZAMBI 1975

¹ Enu A-Izalele, ivwenu, munuzauka Yordau musono, mununjila mu chifuchi, mukuhuma mavungu ananuhiana ni unene, ni ndundo, membo anene, ni yipanga ndo mwilu,

² atu anene, atolomoka, ana ja Anake, nunaanyingika, ha kutwala kuli ayo, nwevwile ngwo, Iya mahasa kumana kumeso ja ana a Anake?

³ Kashika, nyingikenu musono ngwami, Yehova Zambi yenu, iye kanazauka kumeso jenu ngwe kahia ka kulesa, iye kumakaakuwisa, kumakaakumba kumeso jenu, chocho munukaahuma, nikwakuwisa washi, ngwe ambile Yehova kuli yenu.

⁴ Ha kwahuma kumeso jenu kuli Yehova Zambi yenu, kanda nuhanjika mu mbunge jenu ngwenu, Mumu ha ululi wetu Yehova hanatuhetesamo mukuzuka chifuchi chino, alioze Yehova kanaahumu kumeso jenu mumu ha ungulungulu wa mavungu ano.

⁵ Hi ha ululi wenu ko, ka, hanji ha kululama cha mbunge jenu, nunahetemo, ni kuzuka chifuchi cho; alioze mumu ha ungulungulu wa mavungu ano, Yehova Zambi yenu anaahumu kumeso jenu, hanga akakolese liji lize alishingililelio Yehova kuli tulamba twenu, te kuli Apalahama, ni kuli Izake, ni kuli Yakomba.

⁶ Kashika, nyingikenu Yehova Zambi yenu kanuhele chifuchi chino chipema nuchizuke mumu ha ululi wenu; mumu kunwapwa akwa kupangula.

⁷ Iwulukenu, kanda nuvulama ngwe yenu nwehile Yehova Zambi yenu mu puya, chize ku tangwa nwakatukile ku chifuchi cha Engitu, ndo nwahetele kuno, enu kunwakolema Yehova.

⁸ Mu Horepe nawa yinwihia Yehova, Yehova yevwa utenu ni yenu, yamba kunwonwona.

⁹ Ha kukanduka chami ha mulundu mukulambula mikanda ya mawe, te ye mikanda ya usendo Yehova aukolesele ni yenu, yingutwama ha mulundu makumi awana a matangwa ni makumi awana a ufuku. Chalile, chipwe chanwine.

¹⁰ Yehova yakunjika kuli yami ye mikanda yiali ya mawe ya kusoneka ni munwe wa Zambi, kwasoneweneho nikulita ni maliji eswe Yehova wambile kuli yenu ha mulundu, liji Unatuhuka mukachi ka kahia, ha tangwa lia chikungulwila.

¹¹ Mba muze makumi awana a matangwa ni makumi awana a ufuku ahwile, Yehova yangwaha ye mikanda yiali ya mawe, te ye mikanda ya usendo.

¹² Yehova yamba kuli yami ngwenyi, Katuka, upalumukeko washi, mumu atu je waachijile mu Engitu hanalilumbula, hanahambuluka ku jila naambileyo, hanalizuzulwila kaponya.

¹³ Chikwo nawa, Yehova yamba kuli yami ngwenyi, Hinamona atu ano, kutala, kapwa akwa kupangula.

¹⁴ Ngweche, ngwaonwone, ngujimune jina lio kushi lia lilu. Mungukupwisa vungu lia kwahiana ni ndundo ni unene.

¹⁵ Chocho yingwalumuka ni kupalumuka mulundu, mulundu te unachiweme ni kahia, ye mikanda yiali ya usendo ha moko jami yili.

¹⁶ Yingutala, kumanyi, nwavulumuna Yehova Zambi yenu; nwalizuzulwila mwana-ngombe, nwahambuluka washiwashi ku jila anwambileyo Yehova.

¹⁷ Yingwanda ye mikanda yiali, yinguyimbila ku moko jami aali, yinguyishiha, enu nunachimono.

¹⁸ Yingufulamana hashi kumeso ja Yehova, ngwe nalingile kunyima, makumi awana a matangwa ni makumi awana a ufuku. Chalile, chipwe chanwine, mumu ha mulongo wenu weswe nwavulumwine ha kulinga chize chapwa chipi kumeso ja Yehova, mukumwihia.

¹⁹ Mumu yingwivwa woma wa utenu ni wa chikulikuli Yehova yanuvwila yenu, yamba kunwonwona. Alioze Yehova yangupanjika shimbu lize nawa.

²⁰ Yehova yatenukina chinji Arone, yamba kumushiha. Yingulembela Arone nawa shimbu lioliene.

²¹ Mulonga wenu, mwana-ngombe nwamuzuzulwile, yingumwanda, yingumwocha ni kahia, yingumufwenyona, yingumucheka fufuta yikepekepe ndo yapwile ngwe wungawunga. Yingumbila fufuta yenyi mu chitwetwe chinakatuka ku mulundu.

²² Yinwihia Yehova ku Tabera, ni ku Masa, ni ku Kibrote-Hatava.

²³ Ha kunutuma kuli Yehova, nukatuke ku Kandeshe-Mbania ngwenyi, Kandukenu nuzuke chifuchi nanuhelecho, yinukolema liji lia Yehova Zambi yenu, kunwamufulielele, chipwe kunwapanjikile ku liji lienyi.

²⁴ Chize ku tangwa lize nanunyingikine, hinwakolema Yehova.

²⁵ Chocho yingufulamana hashi kumeso ja Yehova makumi awana a matangwa ni makumi awana a ufuku yingufulamanako, mumu te Yehova wambile ngwenyi, Mungwaonwona.

²⁶ Yingulemba kuli Yehova ngwami, Mwene Yehova, kanda nwonwona atu jenu, chihinga chenu, yenu nwachikulile ni unene wenu, nwachichijile ku Engitu ni kwoko lia ndundo.

²⁷ Iwulukenu tuvumbi twenu, Apalahama, ni Izake, ni Yakomba. Kanda nutala upama wa atu ano, chipwe ungulungulu wo, chipwe mulonga wo,

²⁸ kuchina akwa chifuchi chize nwatuchijilemo mamba ngwo, Mumu te Yehova kahashile kwahetesa mu chifuchi nalakenyene, mumu te iye kanaavwila kole yaachiza hanga aashihe mu puya.

²⁹ Hindu o kapwa atu jenu, chihinga chenu, nwachichijile ni tachi jenu jinene ni ku kwoko lienu lia kwolola.