Shimbi 7 - MUKANDA USANDU WA ZAMBI 1975

¹ Muze Yehova Zambi yenu manuhetesa mu chifuchi nunayi kuchizuka, ha kahuma mavungu anji kumeso jenu, A-Hete, ni A-Ngikashe, ni A-Amore, ni A-Kanana, ni A-Perize, ni A-Hevwe, ni A-Yepushe, mavungu shimbiali ananuhiana ni unene, ni ndundo,

² ha kwakunjika kumeso jenu kuli Yehova Zambi yenu munukaalamba, nukaakuwise liakulu, kanda nukakolesa no usendo niumwe, chipwe kanda nwavwila keke,

³ chipwe kanda nulimbata no, kanda nukahangisa malo ana jenu a mapwo kuli ana jo a malunga, chipwe ana jenu a malunga kanda alimbachila ana jo a mapwo.

⁴ Mumu o makahambulwisa ana jenu a malunga kungukaula yami, hanga akavumbike tuzambi tweka, chocho utenu wa Yehova muukanukasumukina, Yehova makanwonwona nikawashi.

⁵ Alioze chocho munulinga no. Nukaapuzule yilumbilo yo, nukapuzwole yipinji manguji jo, nukapakule Ashera jo, nukoche ni kahia tuponya two twa kusonga.

⁶ Mumu yenu kunwapwa atu asandu kuli Yehova Zambi yenu. Yehova Zambi yenu hananutongola nukapwe atu a mbala a iye mwene, nuhiane mavungu eswe ali hashi heswe.

⁷ Yehova kasele zango lienyi hali yenu, chipwe kunutongola mumu te nwahianyine kwoka hakachi ka mavungu, mumu nwapwile akepekepe ku mavungu eswe.

⁸ Alioze mumu te Yehova kanuzanga yenu, chikwo nawa, iye anazange kufunga liji lia shingo alishingile nalio kuli tulamba twenu, Yehova hananuchiza ni kwoko lia ndundo, hananukula ku zuwo lia upinji, ku kwoko lia Falau, mwanangana wa Engitu.

⁹ Kashika, nyingikenu ngwami, Yehova Zambi yenu, iye Zambi, Zambi mukwa jika, wakufunga usendo ni utu wa zango ku kanunu ka yisemuko, kuli waze eswe akumuzanga, te waze akufunga maliji jenyi a shimbi,

¹⁰ eswe akunuvwila kole iye kakwafwetesa ku meso jo, mukwaonwona. Iye kechi kalalukila yoze mamuvwila kole, makamufwetesa ku meso jenyi.

¹¹ Enu, kashika, nufunge liji lia shimbi, ni yiyulo, ni upatwilo ngunanwambeyo musono, mukuyilinga.

¹² Mba mumu te nunapanjika ku upatwilo uno ni kuufunga, ni kuulinga, kashika, Yehova Zambi yenu makafunga ni yenu we usendo ni we utu wa zango iye walishingile kuli tulamba twenu.

¹³ Iye manuzanga yenu, makanuwahisa, makanwokesa. Iye makawahisa nawa ana a ku mijimba yenu, ni mbuto yakusoka ha mavu jenu, ni mbuto yenu, ni vinyu yenu, ni maji jenu, ni kwoka cha yimuna jenu, ni ana ja mapanga jenu, mu chifuchi alishingile iye kuli tulamba twenu kunwahacho.

¹⁴ Makanuwahisa kuhiana mavungu eswe. Kuhechi kapwa hakachi kenu mumba niumwe, chipwe lunga, chipwe pwo, chipwe hakachi ka yimuna jenu.

¹⁵ Yehova makachiza kuli yenu kuyiza cheswe, kechi kusa hali yenu misongo yipi niyimwe ya Engitu nwayinyingikine, alioze makayisa hali eswe manuvwila kole.

¹⁶ Munukamanuna mavungu eswe Yehova Zambi yenu makakunjika kuli yenu, meso jenu kanda akaavwila keke. Kanda nukavumbika tuzambi two, mumu acho muchipwa kambwila kuli yenu.

¹⁷ Kachi yenu munwamba mu mbunge jenu ngwenu, Mavungu hoka, anatuhiana yetu. Ngwe kuchi mutuhasa kwatambula chifuchi?

¹⁸ Kanda nukaavwila woma. Iwulukenu kanawa yize alingile Yehova Zambi yenu kuli Falau, ni kuli A-Engitu eswe,

¹⁹ yeseko yinene meso jenu ayimwene, ni yilayi, ni yikomokeso, ni kwoko lia ndundo, ni kwoko lia kwolola, ni yenayo Yehova Zambi yenu wanuchijile. Yehova Zambi yenu alinge chizechene ku mavungu eswe nunaavwila woma.

²⁰ Chikwo nawa, Yehova Zambi yenu makatuma mboji hakachi ko, ndo eswe anachisalako, anachiswame kuli yenu, makuwa.

²¹ Kanda nususamiana mumu hali ayo, mumu Yehova Zambi yenu hwali hakachi kenu, Zambi munene, kole ni mwongo.

²² Yehova Zambi yenu kumakahuma mavungu ano kumeso jenu hakehe, hakehe, kunuchi kuhasa kwamanuna eswe hamwe, kuchina tushitu a mu yambu manwokela naye.

²³ Alioze Yehova Zambi yenu makaakunjika kumeso jenu maapinjisa ni kupinjisa chinene ndo makaonwona.

²⁴ Iye kumakakunjika mianangana jo mu moko jenu; enu kumunukajimisa majina jo kushi lia malilu, kukuchi kapwa mutu niumwe wa kumana kumeso jenu, ndo munukaonwona.

²⁵ Nukoche ni kahia tuponya two twa kusonga, kanda nwivwa chipululu cha prata ni oru jiliho, kanda nulichijilajo kuchina manutelamo kambwila, mumu hijapwa chizelwokeso kuli Yehova Zambi yenu.

²⁶ Kanda nunjisa mu mazuwo jenu chizelwokeso chimwe, kuchina munulifwa nacho mba munupwa ajila; nukachichine, nukachivwile lwaji lume; mumu kuchapwa chuma chajila.